GMT+7 21/05/2018 02:25

ຢຶດຖືອາຊີບປູກຜັກຂາຍ ສ້າງລາຍຮັບໃຫ້ຄອບຄົວ

 

 

ທ່ານ​ນາງ ເງິນ ສີ​ສົມບັດ ບ້ານ​ຈຽມປາງ ເມືອງ​ຫາດ​ຊາຍຟອງ ນະຄອນຫຼວງ​ວຽງ​ຈັນ ໃຫ້ສຳພາດ​ວ່າ: ໂດຍ​ອີງ​ຕາມ​ເງື່ອນໄຂ​ຂອງ​ຄອບຄົວ ທັງ​ເປັນ​ການສືບ​ທອດ​ມູນເຊື້ອ​ປູກ​ຜັກ​ມາ​ແຕ່​ພໍ່ແມ່ ເຊິ່ງ​ເຮັດ​ມາ​ໄດ້ 20 ກວ່າ​ປີ ໃນ​ແຕ່​ລະ​ປີ​ພາຍຫຼັງ​ສຳເລັດ​ການເກັບ​ກ່ຽວ​ເຂົ້ານາ​ປີ​ແລ້ວ ຄອບຄົວຕົນ​ໄດ້​ເລີ່ມ​ລົງມື​ປູກ​ຜັກ ໂດຍເລືອກ​ເອົາ​ແນວ​ຜັກ​ທີ່​ຕະຫຼາດ ຕ້ອງການ ແລະ ເປັນ​ຜັກ​ທີ່​ບົວ​ລະບັດ​ງ່າຍ ໃຫຍ່​ໄວ​ໃຊ້​ເວລາ 1 ເດືອນ-2 ເດືອນ ສາມາດ​ເອົາອອກ​ຂາຍ​ໄດ້​ປະກອບ​ມີ ຜັກຫອມປ້ອມ ສະຫຼັດ ແລະ ຜັກ​ເຊີ​ນາລີ ມີ​ເນື້ອ​ທີ​ປູກ​ຈຳນວນ 10 ໄລ່ ໃນ​ນີ້ ລົງທຶນ​ຊື້​ແກ່ນ​ແນວ​ພັນ ໄຖ​ພວນດິນ ແລະ ອຸປະກອນ​ສຳລັບ​ການປູກ​ຜັກ​ຈຳນວນ 5 ລ້ານ​ກີບ​ຕໍ່​ຊຸດ ປີ​ໜຶ່ງ​ຈະ​ປູກ​ຜັກ​ໄດ້ 2 ງວດ ເມື່ອເວລາ​ຜັກ​ໃຫຍ່​ພໍ​ຂາຍ​ຈະ​ມີ​ແມ່​ຄ້າ​ມາ​ຊື້​ກັບ​ທີ່​ໂດຍ​ຂາຍ​ຜັກຫອມປ້ອມ ຜັກ​ສະຫຼັດ​ຂາຍ​ໝື່ນ​ລະ 20 ພັນ​ກີບ ສ່ວນ​ຜັກ​ເຊີ​ນາລີ​ຂາຍໝື່ນ​ລະ 40 ພັນ​ກີບ ເນື່ອງ​ຈາກວ່າ​ເປັນ​ຜັກ​ທີ່​ມີ​ອາຍຸ​ການ​ປູກ​ດົນໃຊ້​ເວລາ 2 ເດືອນ​ກວ່າ ​ຈຶ່ງ​ສາມາດ​ເກັບ​ກູ້​ໄດ້ ນອກຈາກ​ນີ້ ລາຄາ​ຜັກ​ແຕ່​ລະ​ຊະນິດ​ທີ່​ປູກ​ແມ່ນຂຶ້ນ​ກັບ​ລາຄາ​ຂອງ​ຕະຫຼາດ ຖ້າໄລຍະ​ໃດ​ທີ່​ຜັກ​ມີ​ລາຄາ​ກໍ່​ຈະ​ໄດ້ກຳໄລ​ຫຼາຍ ສະເລ່ຍ​ປີ​ໝຶ່ງ​ສາມາດ​ສ້າງ​ລາຍ​ຮັບ​ໃຫ້​ກັບ​ຄອບຄົວ 4-5 ສິບ​ລ້ານ​ຕໍ່​ປີ.

ທ່ານ​ນາງ ເງິນ ສີ​ສົມບັດ ກ່າວຕື່ມ​ອີ​ກວ່າ: ຜັກ​ຂອງ​ຕົນ​ແມ່ນ​ໃຊ້ຝຸ່ນ​ຄອກ ແລະ ສີດ​ນ້ຳ​ໝັກ​ຝຸ່ນຊີວະ​ພາບ​ທີ່​ເຮັດ​ເອງ​ ສີດ ເພື່ອຮັກສາ​ສຸຂະພາບ​ຂອງ​ຜູ້​ປູກ ແລະ ຜູ້​ບໍລິໂພກ ປັດຈຸບັນ ຜັກ​ຂອງພວກ​ເຮົາ​ກຳ​ລົງ​ລົງມື​ປູກ ຄາດວ່າ​ກາງ​ເດືອນ​ມີນາ​ສາມາດ​ສົ່ງຂາຍ​ອອກ​ຕະຫຼາດ​ໄດ້ ເຊິ່ງ​ແມ່​ຄ້າທ່ານ​ໃດ​ຕ້ອງການ​ຊື້​ຂາຍ​ຕໍ່ ຫຼື ຊື້ໄປ​ບໍລິໂພກ​ພາຍ​ໃນ​ຄອບຄົວ ສາມາດ​ຊື້​ໄດ້​ທີ່​ສວນ​ຜັກ​ຂອງ​ເພິ່ນ​ຢູ່ບ້ານ​ຈຽມປາງ ເມືອງ​ຫາດ​ຊາຍຟອງ ນະຄອນຫຼວງ​ວຽງ​ຈັນ ຫຼື ໂທ 020 5633 5920.

 

 

ຂໍ້ມູນຈາກ: ວຽງຈັນໃຫມ່

ຄວາມຄິດເຫັນຂອງຜູ້ອ່ານ (0)