GMT+7 24/02/2018 07:12

ຮ່ວມກັນຈັດກິດຈະກຳ ສອນນ້ອງສ້າງອອມ

 

 

ພິທີ​ເປີດ​ໂຄງການ​ສອນ​ນ້ອງສ້າງ​ອອມ​ ຄັ້ງ​ທີ I ນຳພາ​ໂດຍ ຄູ ອາຈານ ແລະ ນັກ​ສຶກ​ສາ​ປີ 3-4 ພາກ​ວິຊາ​ການ​ເງິນ ແລະ ການທະນາຄານ ຄະນະ​ເສດຖະສາດ ແລະ ບໍລິຫານ​ທຸລະ​ກິດ​ ມະຫາວິທະຍາໄລ​ແຫ່ງ​ຊາດ​ລາວ ໂດຍຈັດ​ຂຶ້ນ​ວັນ​ທີ 9 ກຸມພາ 2018 ທີ່ໂຮງຮຽນ ​ມສ ບ້ານ​ເກິນ ເມືອງ​ທຸລະ​ຄົມ ແຂວງ​ວຽງ​ຈັນ ໃຫ້​ກຽດກ່າວ​ເປີດ​ພິທີ ແລະ ມອບ​ເຄື່ອງໂດຍ​ທ່ານ ​ຮສ ບຸນ​ເຮັ່ງ ສີ​ລາ​ກຸນ ຫົວໜ້າ​ພາກ​ວິຊາ​ການ​ເງິນ ແລະ ການ​ທະນາຄານ ແລະ ກ່າວ​ຮັບໂດຍ​ອາຈານ ບຸນ​ເລີດ ລາຊະວົງ ຜູ້ອຳນວຍການ​ໂຮງຮຽນ ​ມສ ບ້ານ​ເກິນ ໂດຍ​ມີ​ຄູ ອາຈານ ນັກຮຽນ ແລະ ຕາງໜ້າ​ທະນາຄານການ​ຄ້າ​ຕ່າງປະເທດ​ລາວ ມະຫາຊົນ ​ເຂົ້າ​ຮ່ວມ.

ທ່ານ ​ຮສ ບຸນ​ເຮັ່ງ ສີ​ລາ​ກຸນ ກ່າວ​ວ່າ: ໂຄງການ​ສອນ​ນ້ອງສ້າງ​ອອມ​ຈຸດປະສົງ​ແມ່ນ​ເພື່ອສ້າງ​ໂອກາດ ​ໃຫ້​ນັກ​ສຶກ​ສາ​ໄດ້​ນຳໃຊ້​ທິດ​ສະ​ດີ​ທີ່​ຮຽນ​ມາ ແລະ ສ້າງປະໂຫຍດ​ໃຫ້​ແກ່​ຊຸມ​ຊົນ​ໃນ​ຂົງເຂດ​ການ​ບໍລິຫານ​ການ​ເງິນສ່ວນ​ບຸກຄົນ ເຊິ່ງ​ເປັນ​ໜຶ່ງ​ໃນ​ວິຊາ​ຮຽນ​ໃນ​ຫຼັກສູດ​ຂອງ​ພາກ​ວິຊາ​ການ​ເງິນ ແລະ ການ​ທະ​ນາຄານ ທີ່​ມີ​ເນື້ອ​ໃນ​ສ່ອງ​ແສງ​ໃຫ້ເຫັນ​ເຖິງ​ຄວາມ​ສຳຄັນ​ໃນ​ການວາງ​ແຜນການ​ຈັດການ ການເງິນ ແລະ ຊຸກຍູ້​ໃຫ້​ມີ​ການ​ອອມເງິນ ເພື່ອ​ໝູນ​ໃຊ້​ໃນ​ອະນາຄົດ ພ້ອມ​ທັງ​ເພື່ອ​ໃຫ້​ສອດຄ່ອງ​ກັບ 5 ຫຼັກ​ມູນ​ການ​ສຶກ​ສາ ໂດຍ​ສະເພາະແມ່ນ​ດ້ານ​ປັນຍາ​ສຶກ​ສາ ເພື່ອ​ປູກ​ຈິດ​ສຳນຶກ​ໃຫ້​ນ້ອງ​ນັກຮຽນ​ໄດ້​ຮູ້ຈັກ​ການ​ອອມ​ເງິນ ແລະ ໃຊ້​ຈ່າຍ​ເງິນ​ຢ່າງ​ປະຢັດ ໂຄງການ​ດັ່ງກ່າວ​ຈະ​ສືບຕໍ່​ໃນ​ປີ​ຕໍ່ໆໄປ ແລະ ເພີ່ມ​ເຂົ້າ​ໃນ​ການ​ເຄື່ອນໄຫວ​ນອກ​ຫຼັກສູດ​ຂອງ​ນັກ​ສຶກ​ສາ ປີ​ທີ 4 ຂອງ​ພາກ​ວິຊາ.

ໂຄງການ​ດັ່ງກ່າວ ເຖິງ​ແມ່ນວ່າ​ຈະ​ເປັນ​ຄັ້ງ​ທຳ​ອິດ ແຕ່​ກໍ​ໄດ້​ຮັບການ​ສະໜັບສະໜູນ​ຈາກ​ຫຼາຍພາກສ່ວນ ຄື: ທະນາຄານ ແຫ່ງ ​ສປປ ລາວ ທະນາຄານ​ການຄ້າ​ຕ່າງປະເທດ​ລາວ​ມະຫາຊົນ ທະນາຄານ​ສົ່ງເສີມ​ກະສິກຳ ບໍ​ລິສັດ ​ຫຼັກ​ຊັບ​ລ້ານ​ຊ້າງ ມະຫາຊົນ ບໍລິສັດ ພັນ​ຊະນະ​ຂົນສົ່ງ​ໂດຍສານ ແລະ ທ່ອງ​ທ່ຽວ ແລະ ໂຮງຮຽນ​ນີ​ລະດາ ລວມ​ມີ​ເງິນສົດນ້ຳ​ດື່ມ ເສື້ອ​ຍືດ ປະຕິທິນ ແລະ ປຶ້ມ​ແບບຮຽນ ລວມ​ມູນ​ຄ່າ 8,5 ລ້ານ​ກີບ ແລະ ນັກ​ສຶກ​ສາ​ປະກອບ​ສ່ວນ​ຮ່ວມ​ກັນ 3,5 ລ້ານກີບ ລວມ​ມູນ​ຄ່າ​ທັງ​ໝົດ 12 ລ້ານ​ກີບ.

 

 

ຂໍ້ມູນຈາກ: ວຽງຈັນໃຫມ່

ຄວາມຄິດເຫັນຂອງຜູ້ອ່ານ (0)