GMT+7 22/02/2018 09:39

ເມືອງໄຊເສດຖາ ຍົກລະດັບການບໍລິການ ໂຮງແຮມ-ເຮືອນພັກ ແລະ ຮ້ານອາຫານ

 

 

ວັນທີ 14 ກຸມພາ 2018 ນີ້, ຂະແໜງທ່ອງທ່ຽວ ພະແນກ ຖວທ ແຂວງອັດຕະປື ໄດ້ເປີດຊຸດອົບຮົມກ່ຽວກັບການບໍລິການໂຮງແຮມ, ເຮືອນພັກ ແລະ ຮ້ານອາຫານ ໃຫ້ບັນດາຜູ້ປະກອບ ການໂຮງແຮມ, ເຮືອນພັກ ແລະ ຮ້ານອາຫານ  ພາຍໃນເມືອງໄຊເສດຖາ ແຂວງອັດຕະປື ໂດຍມີທ່ານນາງ ບຸນນານ ບຸນນະແສງ ຫົວໜ້າພະແນກ ຖວທ ແຂວງ, ມີຫົວໜ້າຫ້ອງຫານ ຖວທ ເມືອງ, ພະນັກງານ ກ່ຽວຂ້ອງ ແລະ ບັນດາຫົວໜ່ວຍຜູ້ປະກອບການ ເຂົ້າຮ່ວມ.


ຊຸດອົບຮົມຄັ້ງນີ້ ສຳມະນາກອນໄດ້ຮຽນຮູ້ ທັງພາກທິດສະດີ ແລະ ພາກປະຕິບັດຕົວຈິງ, ໃນນັ້ນປະກອບມີ ຄວາມຮູ້ທົ່ວໄປກ່ຽວກັບການທ່ອງທ່ຽວ, ການບໍລິການໂຮງແຮມ, ເຮືອນພັກ ແລະ ຮ້ານອາ ຫານ, ເຕັກນິກການແກ້ໄຂບັນຫາ ແລະ ຄຸນນະພາບການບໍລິການ ແລະ ການເອົາໃຈໃສ່ລູກຄ້າ ໂດຍມີຈຸດປະສົ່ງ ເພື່ອຍົກລະດັບຄຸນນະພາບ ການບໍລິການ ຂອງພະນັກງານ ບໍລິການໂຮງແຮມ, ເຮືອນພັກ ແລະ ຮ້ານອາຫານ ໃຫ້ມີຄວາມຮູ້ພື້ນຖານ ດ້ານການບໍລິການ ສ່ວນໜ້າ, ການບໍລິການອາຫານ-ເຄື່ອງດື່ມ, ການບໍລິການແມ່ເຮືອນ ແລະ ການປຸງແຕ່ງອາຫານ ເພື່ອບໍລິການນັກທ່ອງທຽ່ວ ໃຫ້ມີຄວາມປະທັບໃຈ.


ທ່ານນາງ ບຸນນານ ບຸນນະແສງ ໃຫ້ຮູ້ວ່າ: ຊຸດອົບຮົມຫົວໜ່ວຍທຸລະກິດ ດ້ານການບໍລິການ ໂຮງແຮມ, ເຮືອນພັກ ແລະ ຮ້ານອາຫານ ຢູ່ເມືອງ ໄຊເສດຖາ ເປັນເມືອງສຸດທ້າຍຂອງແຂວງ ແນໃສ່ຮັບ ປະກັນໃຫ້ແກ່ ການເປັນເຈົ້າພາບທີ່ດີ ໃນກິດຈະກຳສົ່ງເສີມປີທ່ອງທຽ່ວລາວ 2018 ຢູ່​ແຂວງອັດຕະປື ໃຫ້ເປັນຂະບວນຟົດຟື້ນ ແລະ ເປັນການປະກອບສ່ວນ ເຂົ້າໃນວຽກງານພັດທະນາ ການທ່ອງທ່ຽວ ຂອງແຂວງ ໃນຂະແໜງການທ່ອງທ່ຽວ ໃຫ້ມີຄວາມເຂັ້ມແຂງ ທັງເປັນການສ້າງລາຍຮັບ ໃຫ້ແກ່ທຸລະກິດຕົນເອງ ປະກອບສ່ວນເຂົ້າໃນການພັດທະນາ ເສດຖະກິດ-ສັງຄົມ ເທື່ອລະກ້າວ.


ປັດຈຸບັນ ເມືອງໄຊເສດຖາ ມີຮ້ານອາຫາທັງໝົດ 8 ແຫ່ງ, ເຮືອນພັກ 11 ແຫ່ງ, ຮ້ານບັນເທີງ 3 ແຫ່ງ ແລະ ຮ້ານບໍລິການ 18 ແຫ່ງ ນອກນີ້ຍັງມີແຫລ່ງທ່ອງທ່ຽວ ທາງທຳມະຊາດ 2 ແຫ່ງ, ວັດທະນະ ທຳ 2 ແຫ່ງ ແລະ ແຫລ່ງທ່ອງທ່ຽວ ທາງປະຫວັດສາດ 1 ແຫ່ງ. 

 

 

ຂໍ້ມູນຈາກ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)