GMT+7 21/05/2018 02:38

ລາວໂທລະຄົມ ສະຫລຸບການດຳເນີນທຸລະກິດ ໃນປີ 2017 ພ້ອມວາງແຜນ 2018

 

 

ໃນວັນທີ 14 ກຸມພາ 2018 ຢູ່ທີ່ສຳນັກງານໃຫຍ່ ບໍລິສັດລັດ ວິສາຫະກິດ ລາວໂທລະຄົມມະນໍາຄົມ ນະຄອນຫລວງວຽງຈັນ, ໄດ້ຈັດກອງປະຊຸມ ປະຈໍາປີ 2017 ຂຶ້ນຢ່າງເປັນທາງການ ເພື່ອສະຫລຸບຜົນງານ ການເຄື່ອນໄຫວວຽກງານ ດຳເນີນທຸລະກິດ ໃນປີ 2017 ແລະ ສະເໜີທິດທາງ ແຜນການໃນປີ 2018.

ກອງປະຊຸມດັ່ງກ່າວ, ດຳເນີນໄປພາຍໃຕ້ການ ເປັນປະທານຂອງທ່ານ ຖາວອນ ສົມສະກຸນ ຜູ້ ອຳນວຍການໃຫຍ່ ບໍລິສັດ ລັດວິສາຫະກິດ ລາວໂທລະຄົມມະນໍາຄົມ, ໂດຍມີ ທ່ານ ທັນສະໄໝ ກົມມະສິດ ລັດຖະມົນຕີ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ, ກໍາມະການສະພາຂາຮຸ້ນ, ຜູ້ແທນຈາກ ລັດວິສາຫະກິດ ລາວ ໂທລະຄົມມະນໍາຄົມ ສູນກາງ ແລະ ສາຂາ ແຂວງທົ່ວປະເທດ, ພ້ອມດ້ວຍແຂກ ຖືກເຊີນ ທັງໝົດ 340 ກວ່າທ່ານເຂົ້າຮ່ວມ.

ໃນພິທີດັ່ງກ່າວ, ທ່ານ ຖາວອນ ສົມສະກຸນ ໄດ້ຍົກໃຫ້ເຫັນຜົນງານ ທີ່ພົ້ນເດັ່ນຫລາຍດ້ານ ທີ່ ລາວໂທລະຄົມ ສາມາດຍາດແຍ່ງມາໄດ້ ໃນໜຶ່ງປີຜ່ານມາ ເປັນຕົ້ນ ແມ່ນໄດ້ລົງທຶນ ຂະຫຍາຍຕາໜ່າງລະບົບ ໂທລະຄົມມະນາຄົມ ໃນມູນຄ່າ ທັງໝົດ 82,8 ລ້ານ ໂດລາ ສະຫະລັດ. ປັດຈຸບັນ ລາວໂທລະຄົມ ມີສະຖານນີມືຖື 2G, 3G, 4G ແລະ 4.5G ທັງໝົດ 5.711 ສະຖານນີ, ມີສັນຍານໂທລະສັບມືຖື ຄວບຄຸມ 18 ແຂວງ, 148 ເມືອງ, 8.500 ກວ່າບ້ານ, ໃນນີ້ 2G ກວມ 59%, 3G ກວມ 38%, 4G ກວມ 10% ຂອງຈຳນວນໝູ່ບ້ານທັງໝົດ ແລະ 4.5G ກວມເອົາ 5% ຂອງຕົວເມືອງໃຫຍ່.

ທັງໝົດເຫລົ່ານັ້ນ, ມັນໄດ້ກາຍເປັນ ປັດໄຈຫລັກທີ່ຜັກດັນ ໃຫ້ລາວໂທລະຄົມ ສາມາດຂະຫຍາຍລູກຄ້າໃໝ່ ແລະ ຮັກສາຈຳນວນລູກຄ້າ ເກົ່າໄວ້ໄດ້. ມາຮອດປັດຈຸບັນ ມີລູກຄ້າໃຊ້ໂທລະສັບມືຖື ໃນລະບົບຈຳນວນ 1,6 ລ້ານເລກໝາຍ, ໂທລະສັບຕັ້ງໂຕະ 40 ພັນເລກໝາຍ, ໂທລະສັບວິນໂຟນ430.000 ກວ່າເລກໝາຍ ແລະ ອິນເຕີເນັດ 1,5 ລ້ານລູກຄ້າ.

ໃນປີ 2017 ມາສາມາດ ສ້າງລາຍຮັບໄດ້ທັງໝົດ 1.843,5 ຕື້ກີບ (ລວມອາກອນ) ເພີ່ມຂຶ້ນຈາກປີ 2016 ເທົ່າກັບ 1,8%, ໃນນັ້ນ ມີກຳໄລສຸດທິ381 ຕື້ກີບ ສາມາດ ປະຕິບັດພັນທະໃຫ້ລັດຖະບານໄດ້ ທັງໝົດຈຳນວນ 535,2 ຕື້ກີບ, ກວມເອົາອັດຕາສ່ວນ 34,7% ຂອງລາຍຮັບທີ່ລາວ ໂທລະຄົມປະຕິບັດໄດ້ ໃນປີ 2017. ນອກຈາກນັ້ນ, ຍັງໄດ້ ປັບປຸງລະບຽບ, ນະໂຍບາຍສະຫວັດດີການ ສັງຄົມຕ່າງໆ ເພື່ອຍົກສູງ ລະດັບຊີວິດການເປັນຢູ່ ໃຫ້ພະນັກງານໃຫ້ດີຂຶ້ນເລື້ອຍໆ ໄປຄຽງຄູ່ກັບການ ດຳເນີນທຸລະກິດ, ພ້ອມທັງ ປະກອບສ່ວນຊ່ວຍເຫລືອ ແລະ ໃຫ້ການ ອຸປະຖຳຕໍ່ອົງການ ຈັດຕັ້ງພັກ-ລັດ ແລະ ສັງຄົມ ເປັນມູນຄ່າ 1,2 ຕື້ກວ່າກີບ.

ສຳລັບແຜນປີ 2018 ນີ້, ລາວໂທລະຄົມຈະສູ້ຊົນ ສ້າງຖານລູກຄ້າໃຫ້ໄດ້ 3,4 ລ້ານເລກໝາຍ ແລະ ສ້າງລາຍຮັບ ໃຫ້ໄດ້ທັງໝົດ 1.985,5 ຕື້ກີບ, ທຽບໃສ່ປີ 2017 ເພີ່ມຂຶ້ນ 7,7%, ໂດຍຄາດຄະເນ ກຳໄລສຸດທິໃຫ້ໄດ້ 409,7ຕື້ກີບ ເພີ່ມຂຶ້ນ  7,5% ແລະ ຄາດຄະເນ ຈະສາມາດມອບພັນທະໃຫ້ລັດຖະບານ ຈຳນວນ 568 ຕື້ກີບ, ເຊິ່ງກວມເອົາ ອັດຕາສ່ວນບໍ່ຫລຸດ 30% ຂອງລາຍຮັບປີ 2018.ນອກຈາກນັ້ນ, ຍັງຈະໄດ້ລົງທຶນ ໃນເບື້ອງຕົ້ນມູນຄ່າ 50ລ້ານໂດລາສະຫະລັດ ເພື່ອສືບ ຕໍ່ປັບປຸງ ແລະ ຂະຫຍາຍຕາໜ່າງ ລະບົບໂທລະຄົມມະນາຄົມ ໂດຍສະເພາະ ແມ່ນອິນເຕີເນັດ Mobile Broad band and Fixed Broadband ໃຫ້ຮັບປະກັບ ທາງດ້ານປະລິມານ ແລະ ຄຸນນະພາບ, ຂໍ້ມູນ ມີຄວາມປອດໄພ ແລະ ເປັນລະບົບ  ທັນສະໄໝ ເພື່ອຮັບປະກັນ ໃຫ້ແກ່ການບໍລິການສັງຄົມ.

ລາວໂທລະຄົມ ຈະຂະຫຍາຍ ສະຖານນີມືຖືໃຫ້ໄດ້ 6 ພັນກວ່າສະຖານນີ ໃນຂອບເຂດທົ່ວປະເທດ. ໃນນີ້, ມີສະຖານີ 4,5G ຈຳນວນ 125 ສະຖານນີ ທັງໝົດເຫລົ່ານີ້ ກໍເພື່ອ ໃຫ້ບັນລຸຕາມແຜນຍຸດທະສາດ ແລະ ວິໃສທັດ ກ້າວໄປສູ່ຍຸກ Lao Digital Life ໃນອີກ 3 ປີຂ້າງໜ້າ ແລະ ສູ້ຊົນນຳເອົາບໍລິສັດ ໃຫ້ກາຍເປັນບໍລິສັດມະຫາຊົນ ໃຫ້ສຳເລັດ ໃນປີ 2018.

 

 

ຂໍ້ມູນຈາກ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)