GMT+7 21/05/2018 06:22

ເອກະຊົນຈະລົງທຶນ 200 ລ້ານໂດລາ ພັດທະນາ ເດີ່ນບິນເກົ່າ ວັງວຽງ ໃຫ້ກາຍເປັນແຫລ່ງທ່ອງທ່ຽວ

 

 

ແຂວງວຽງຈັນ ອະນຸຍາດ ໃຫ້ບໍລິສັດ ອີ​ຈິ​ນ ວິສາວະ​ກຳ​​ກໍ່ສ້າງລາວ​ ຈຳກັດ ສຳປະທານເດີ່ນ​ບິນ​ເກົ່າ​ວັງ​ວຽງ​ ໃນ​ເນື້ອ​ທີ່ 16​ ເຮັກຕາ​ກວ່າ​ ໃຫ້ກາຍ​ ເປັນ​ແຫລ່ງທ່ອງ​ທ່ຽວ​, ເຊິ່ງປະກອບມີ​ໂຮງ​ແຮມຫ້າ​ດາວ,​ ໂຮງໝໍ, ໂຮງຮຽນ ​ສອນ​ການ​ທ່ອງ​ທ່ຽວ, ຮ້ານ​ຄ້າ​ປອດພາສີ​ ແລະ ກາ​ຊິ​ໂນ ​​ໃນມູນຄ່າ 200 ລ້ານໂດລາສະຫະລັດ ເພື່​ອດຶງ​ດູດ ​ນັກ​ທ່ອງ​ທ່ຽວຊາວ​ຈີນ ກໍຄື ນັກທ່ອງທ່ຽວທົ່ວ​ໂລກ​ ເຂົ້າ​ມາ​ທ່ຽວ​ວັງ​ວຽງ​ ​ນັບ​ມື້​ຫລາຍຂຶ້ນ. ​ເມື່ອ​ໂຄງການ ​ນີ້​ສຳເ​ລັດ ​ຈະ​ສາມາດ​ສ້າງ​ວຽກ​ເຮັດ​ງານ​ທຳ​ ໃຫ້​ແກ່​ປະຊາຊົນ​ລາວ ​ໄດ້ປະມານ  2.000 - 3.000 ຄອບຄົວ.

ໃນວັນທີ 13 ກຸມພາ 2018 ໄດ້ມີພິທີ​ເຊັນ​ສັນຍາ ​ເພື່ອ​ພັດທະນາ ເຂດດັ່ງກ່າວ, ລະຫວ່າງ​ ທ່ານ​ ຫລິວ ​ຟຸກວາງ ປະທານ​ບໍລິສັດ ​ອີ​ຈິນວິ​ສາວະ​ກຳ ​ກໍ່ສ້າງ​ລາ​ວ ຈຳກັດ ໃນ​ນາມ​ຜູ້​ລົງທຶນ ​ກັບ​ ທ່ານ​ ສຸ​ກັນ​ ວິ​ໄລຣັດ ຫົວໜ້າ​ພະ​ແນ​ກ ​ແຜນການ- ການ​ລົງທຶນ ​ແຂວງ ວຽງ​ຈັນ, ​ໂດຍ​ຊ້ອງ​ໜ້າ ​ທ່ານ ​ວິ​ດົງ​ ໄຊ​ຍະ​ສອນ​ ເຈົ້າ​ແຂວງ​ວຽງ​ຈັນ ແລະ ພາກສ່ວນກ່ຽວຂ້ອງ ສອງຝ່າຍເຂົ້າຮ່ວມ ເປັນສັກຂີພິຍານ.

ພາຍຫລັງ​ ເຊັນສັນຍາ​ແລ້ວ ທາງບໍລິສັດຈະ​ໄດ້​ເລັ່ງ ປະຕິບັດໂຄງການ, ໂດຍຈະ​ຈ້າງ​ບໍ​ລິ​ສັດ ​ທີ່​ມີ​ຄວາມ​ສາມາ​ດ ມາ​ອອກ​ແບບ​ລາຍ​ລະອຽ​ດ​ ໃນ​ບັນດາ​ກິດຈະກຳ ​ຂອງ​ໂຄງການ​ຄື ກໍ່ສ້າງ​ໂຮງ​ແຮມ 5 ດາວ,​ ໂຮງໝໍ,​ ໂຮງຮຽນ​ທ່ອງ​ທ່ຽວ, ຫໍສະ ແດງວັດທະນະທຳປະເພນີຊົນເຜົ່າລາວ ເພື່ອເກັບປີ້ນັກທ່ອງທ່ຽວເຂົ້າຊົມ, ຮ້ານ​ຄ້າ​ປອດ​ພາສີ, ກາ​ຊິໂນ ສຳລັບ ​ນັກ​ທ່ອງ​ທ່ຽວ​ຕ່າງປະ​ເທດ​ ແລະ​ ກິດຈະກຳ​ອື່ນໆ ​ທີ່​ກ່ຽວຂ້ອງ ໂດຍຈະໃຊ້ເວລາ ໃນການ​ກໍ່ສ້າງ 5 ປີ,​ ເຊິ່ງໄລຍະ​ສຳ​ປະທານ 50 ປີ​.

ທ່ານ​ ຫລິວ ຟຸກວາງ ໄດ້​ໃຫ້​ສຳພາດ ​ຕໍ່​​ສື່​ມວນຊົນ​ວ່າ: ສາ​ເຫດ​​ທີ່​​ເຂົ້າ​ມາ​ລົງທຶນ​ ໃນ​ໂຄງການ​ນີ້​, ຍ້ອນ​​​ເຫັນ​ທ່າ​ແຮງ ​​ດ້ານ​ການທ່ອງທ່ຽວ​, ເຊິ່ງ ສປປ ລາວ ​​ເປັນ​ຈຸດ​ເຊື່ອມ​ຈອດ ​ລະຫວ່າງ​ ຈີນ​ ແລະ​ ອາ​ຊຽນ ແລະ ​ເປັນ​ປະ​ເທດ​ທີ່​ນອນ ​​ໃນ​ໜຶ່ງ​ແລວ​ ໜຶ່ງ​ເສັ້ນທາງ ​ຂອງ​ຈີນ​ ແລະ​ ທີ່ສຳຄັນ​ ເມືອງ​ວັງ​ວຽງ​ ກໍມີ​ສະຖານ​ນີລົດ​​ໄຟ​ລາ​ວ-ຈີນ ເມື່ອ​ທາງ​ລົດ​ໄຟ​ລາວ-​ຈີນ​ ສຳ​ເລັດ ​ນັກ​ທ່ອງ​ທ່ຽວຈາກຈີ​ນ ຈະ​ເຂົ້າ​ມາທ່ຽວ​ຊົມ ​ເມືອງ​ລາວ ​ກໍ​ຄື​ ເມືອງວັງ​ວຽງ ​ຫລາຍ​ຂຶ້ນ. ສ່ວນການສ້າງ​ໂຮງໝໍ​ ທັນ​ສະ​ໄໝ ທີ່ຮ່ວມມືກັບໂຮງໝໍທີ່ມີຊື່ສຽງ ຂອງປະເທດຈີນ, ໂດຍມີຊ່ຽວຊານ ປິ່ນປົ່ວພະຍາດສະເພາະ ​ເຊິ່ງ​ໃນ​ຕໍ່ໜ້າ ​ຈະ​ເປັນ​ການ​ຫລຸດ​ຜ່ອນ​ ຄົນເຈັບຈາກລາວ ໄປ​ໃຊ້​ບໍລິການ​​ ຢູ່ໂຮງໝໍ​ປະ​ເທດ​ໃກ້ຄຽງ ໃຫ້​ນັບ​ມື້​ ຫລຸດໜ້ອຍ​ລົງ.

ທ່ານ​ ຫລິວ ຟຸກວາງ ​ຍັງໄດ້ສະແດງ ຄວາມ​ເຊື່ອໝັ້ນວ່າ: ​​ໂຄງການ ​ສ້າງ​ແຫລ່ງທ່ອງ​ທ່ຽວ​ຢູ່​ເດີ່ນ​ບິນ​ເກົ່າ ​ເມືອງ​ວັງ​ວຽງ ​ຈະ​ສ້າງ​ແຜນລາຍຮັບຫລາຍດ້ານ ໃຫ້ແກ່ແຂວງວຽງຈັນ ແລະ ເຮັດໃຫ້ປະຊາຊົນທ້ອງຖີ່ນ ມີວຽກ​ເຮັດ​ງານ​ທຳ ​ຫລາຍ​ພັນ​ຄົນ​ໃນ​ອະນາ​ຄົດ ​ເຊິ່ງຈະ​ເປັນ​ການ​ ປະກອບສ່ວນ​ຊ່ວຍ​ແກ້​ໄຂ​ຄວາມທຸກ​ຍາກ ​ຂອງ​ປະຊາຊົນ ຕື່ມອີກ​.

 

 

ຂໍ້ມູນຈາກ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)