GMT+7 21/05/2018 06:26

ປີ 2018 ເມືອງທ່າແຕງຕັ້ງເປົ້າໝາຍພັດທະນາວຽກງານ ຖວທ ໃຫ້ມີຄຸນນະພາບ

 

 

ໃນປີ 2018 ນີ້ການພັດທະນາວຽກງານຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ແມ່ນມີຄວາມຈໍາເປັນເຊິ່ງຈະຕ້ອງໄດ້ດຳເນີນໄປຄຽງຄູ່ກັບການເຕີບໂຕທາງດ້ານເສດຖະກິດ-ສັງຄົມ ນະໂຍບາຍວິທີການທີ່ສອດຄ່ອງໂດຍສຸມທຸກຄວາມພະຍາຍາມບຸກບືນຍາດແຍ່ງເອົາເງື່ອນໄຂອັນເອື້ອອໍານວຍຄວາມສະດວກເພື່ອແນໃສ່ສ້າງພື້ນຖານອັນໜັກແໜ້ນໃຫ້ແກ່ການພັດທະນາວຽກງານຖະແຫຼງຂ່າວ, ວັດທະນະທຳ ແລະ ທ່ອງທ່ຽວໃຫ້ມີຄຸນນະພາບດີຂຶ້ນ.

ທ່ານ ພູວົງ ກອງຊັບ ຫົວໜ້າຫ້ອງການຖະແຫຼງຂ່າວ, ວັດທະນະທໍາ ແລະ ທ່ອງທ່ຽວເມືອງທ່າແຕງໃຫ້ຮູ້ເມື່ອບໍ່ດົນນີ້ວ່າ: ປີ 2018 ເປັນໄລຍະແຫ່ງການກະກຽມສ້າງພື້ນຖານ ແລະ ທ່ວງທ່າເພື່ອກ້າວຂຶ້ນເປັນເຈົ້າໃນການພັດທະນາວຽກງານຖະແຫຼງຂ່າວ, ວັດທະນະທໍາ ແລະ ທ່ອງທ່ຽວໃຫ້ມີຄຸນນະພາບດີຂຶ້ນເລື້ອຍໆ. ທັງນີ້ຕ້ອງໄດ້ປະຕິບັດທິດທາງໂດຍສ້າງໃຫ້ໄດ້ວັດທະນະທຳທີ່ມີລັກສະນະຊາດແນໃສ່ບໍາລຸງສ້າງຄົນລາວໃຫ້ມີນໍ້າໃຈຮັກຊາດ, ຮັກລະບອບປະຊາທິປະໄຕປະຊາຊົນ, ມີຄຸນສົມບັດສິນທໍາ, ມີແບບແຜນດໍາລົງຊີວິດອັນສົດໃສ, ມີຄວາມຮູ້ຄູ່ກັບຄວາມຕ້ອງການຂອງພາລະກິດປ່ຽນແປງໃໝ່ສາມາດຮັບເອົາຜົນສຳເລັດຄວາມ ກ້າວໜ້າຂອງຍຸກສະໄໝ, ປົກປັກຮັກສາ ແລະ ເສີມຂະຫຍາຍມູນເຊື້ອວັດທະນະທຳຂອງຊາດ ແລະ ຂອງເຜົ່າໄປພ້ອມກັບການເອົາໃຈໃສ່ສົ່ງເສີມເຜົ່າຕ່າງໆໃນການສືບທອດມູນເຊື້ອສິລະປະວັດທະນະທຳທີ່ມີຫຼາຍຮູບຫຼາຍສີໃຫ້ກ້າວເປັນວັດທະນະທໍາຂອງວົງຄະນາຍາດແຫ່ງຊາດ.

ຫົວໜ້າຫ້ອງການຖະແຫຼງຂ່າວ, ວັດທະນະທໍາ ແລະ ທ່ອງທ່ຽວເມືອງທ່າແຕງ ໃຫ້ຮູ້ຕື່ມວ່າ: ໂດຍປະຕິບັດຕາມເປົ້າໝາຍພັດທະນາວຽກງານຖະແຫຼງຂ່າວ, ວັດທະນະທໍາ ແລະ ທ່ອງທ່ຽວໃຫ້ປາກົດຜົນເປັນຈິງນັ້ນ.ມີຄວາມຈຳເປັນຕ້ອງໄດ້ຢຶດໝັ້ນແນວທາງປ່ຽນແປງໃໝ່ຮອບດ້ານທີ່ມີຫຼັກການຂອງພັກເອົາໃຈໃສ່ສຶກສາອົບຮົມການເມືອງແນວຄິດໃຫ້ພະນັກງານລັດຖະກອນຢ່າງເຄັ່ງຄັດໂດຍນຳເອົາລະບຽບກົດໝາຍ, ມະຕິຄຳສັ່ງ ແລະ ນິຕິກຳຕ່າງໆເປັນເນື້ອໃນສຳຄັນໃນຂະນະທີ່ວຽກງານຖະແຫຼງຂ່າວ-ສື່ມວນຊົນຕ້ອງສ້າງໃຫ້ໄດ້ຄ່ານິຍົມ ແລະ ດຶງດູດຄວາມສົນໃຈຈາກຜູ້ອ່ານຜູ້ຟັງໂດຍເລັງໃສ່ກໍ່ສ້າງບຸກຄະລະກອນບັນນາທິການ-ນັກຂ່າວໂຄສົກ,ເຕັກນິກໃຫ້ມີປະສິດທິຜົນດີຂຶ້ນກ່ວາເກົ່າ. ນອກຈາກນີ້ກໍ່ຕ້ອງໄດ້ສຸມໃສ່ສົ່ງເສີມປະຊາຊົນບັນດາເຜົ່າຮັກສາມູນເຊື້ອວັດທະນະທໍາຮີດຄອງປະເພນີຂອງຊາດ ແລະ ຂອງເຜົ່າ, ຟື້ນຟູ, ສົ່ງເສີມສີໄມ້ລາຍມືຫົວຄິດປະດິດສ້າງທາງດ້ານສິລະປະກໍາ ແລະ  ຫັດຖະກຳໃຫ້ກາຍເປັນສິນຄ້າ, ເອົາໃຈໃສ່ຊຸກຍູ້ສົ່ງເສີມວຽກງານທ່ອງທ່ຽວໃຫ້ມີຈຸດສຸມໂດຍສະເພາະການກໍ່ສ້າງພື້ນຖານໂຄງລ່າງສະຖານທີ່ທ່ອງທ່ຽວທໍາມະຊາດ, ປະຫັວດສາດ ແລະ ວັດທະນະທຳດ້ວຍຄວາມຮັບຜິດຊອບສູງ.

 

 

ຂໍຂອບໃຈຂໍ້ມູນຈາກ: ເສດຖະກິດ-ສັງຄົມ

 

 

ຄວາມຄິດເຫັນຂອງຜູ້ອ່ານ (0)