GMT+7 24/02/2018 07:17

ພະແນກໄປສະນີ ແລະ ການສື່ສານ ແຂວງອັດຕະປື ຝຶກອົບຮົມທິດສະດີ ໄລຍະສັ້ນ

 

 

ເມື່ອບໍ່ດົນມານີ້, ໂຮງຮຽນທິດສະດີ ການເມືອງ​ ແລະ ການປົກຄອງ ແຂວງອັດຕະປື ໄດ້ເປີດຝຶກອົບຮົມວຽກງານທິດສະດີການເມືອງ-ການປົກຄອງ ໄລຍະສັ້ນ ​ໃຫ້​ແກ່​ພະນັກງານ​ຫລັກ​ແຫລ່ງ ພະແນກໄປສະນີໂທລະຄົມ ແລະ ສື່ສານ ຮຸ່ນທີ I ພາຍໃຕ້ການເປັນປະທານຂອງ ທ່ານນາງ ມີນາພອນ ໄຊສົມພູ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ, ມີທ່ານ ສຸຕັນ ໄຊສົງຄາມ ຜູ້ອຳນວຍການໂຮງຮຽນທິດສະດີ ການເມືອງ-ການປົກຄອງແຂວງ, ມີບັນດາຄູ-ອາຈານ, ພະນັກງານຫລັກແຫລ່ງ ຈາກພະແນກການກ່ຽວຂ້ອງ ເຂົ້າຮ່ວມ.

          ຊຸດຝຶກອົມຮົມທິດສະດີ ການເມືອງ-ການປົກຄອງ ຄັ້ງນີ້ ມີສຳມະນາກອນເຂົ້າຮ່ວມທັງໝົດ 31 ສະຫາຍ, ຍິງ 8 ສະຫາຍ ເຊິ່ງສ່ວນຫລາຍແມ່ນ ພະນັກງານຫລັກແຫລ່ງ ພາຍໃນພະແນກ ໄປສະນີໂທລະຄົມ ແລະ ສື່ສານ ແລະ ຈາກພະແນກການອ້ອມຂ້າງຈຳນວນໜຶ່ງ, ໄລຍະການຝຶກອົບຮົມ ແມ່ນ 45 ວັນ, ຫລັກສູດການຮຽນ-ການສອນ ທີ່ທາງໂຮງຮຽນທິດສະດີ ການເມືອງ-ການປົກຄອງ ໄດ້ນຳມາຝຶກເທື່ອນີ້ປະກອບມີ ພາກປັດສະຍາ ມາກ-ເລນິນ 8 ບົດ, ພາກວິຊາເສດຖະກິດການເມືອງ 10 ບົດ, ພາກລັດທິສັງຄົມນິຍົມ ວິທະຍາສາດ ປະກອບມີ  8 ບົດ, ພາກບໍລິຫານສາດ ມີ 8 ບົດ ແລະ ພາກກໍ່ສ້າງພັກ ມີ  5 ບົດ

          
ໂອກາດນີ້, ທ່ານນາງ ມີນາພອນ ໄຊສົມພູ ໄດ້ໃຫ້ທິດຊີ້ນຳຕໍ່ພິທີວ່າ: ການຈັດຊຸດອົບຮົມຄັ້ງນີ້ ກໍເພື່ອເປັນການປະກອບຄວາມຮູ້ຂັ້ນພື້ນຖານ, ຍົກລະດັບຄວາມຮູ້ ດ້ານທິດສະດີ ການເມືອງ-ການປົກຄອງ ໃຫ້ພະນັກງານຫລັກແຫລ່ງ ມີຫລັກໝັ້ນຕໍ່ແນວທາງນະໂຍບາຍຂອງພັກ ແລະ ທັດສະນະຕໍ່ຊົນຊັ້ນກຳມະກອນ ບົນຈິດໃຈປະຕິວັດ, ຮູ້ຈຳແນກມິດ-ສັດຕູ ນຳເອົາບົດຮຽນໄປຜັນຂະຫຍາຍ ແລະ ຈັດຕັ້ງປະຕິບັດໃນຂົງເຂດວຽກງານ ໃຫ້ເກີດດອກອອກຜົນດີກວ່າເກົ່າ.

 

 

ຂໍ້ມູນຈາກ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)