GMT+7 21/05/2018 02:39

ເຈົ້າແຂວງສະຫວັນນະເຂດ ມອບເຄື່ອງຊ່ວຍເຫລືອ ໂຮງຮຽນຊົນເຜົ່າເມືອງພີນ ແລະ ເຊໂປນ

 

 

ໃນວັນທີ 10 ກຸມພາ 2018 ນີ້, ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ພ້ອມດ້ວຍຄອບຄົວ, ທ່ານ ໂພໄຊ ໄຊຍະສອນ ຮອງເຈົ້າແຂວງສະຫວັນນະເຂດ, ມີຫົວໜ້າ ເຂດເສດຖະກິດ ພິເສດສະຫວັນ-ເຊໂນ, ສະມາຄົມນັກທຸລະກິດຍິງ ແລະ ພາກສ່ວນກ່ຽວຂ້ອງຂອງແຂວງ ໄດ້ນຳເອົາຜ້າຫົ່ມ ແລະ ເຄື່ອງອຸປະໂພກ-ບໍລິໂພກ ລວມມູນຄ່າ 60 ລ້ານກີບ ໄປມອບແກ່ໂຮງຮຽນ ປະຖົມຊົນ ເຜົ່າເຊໂປນ (ໂຮງຮຽນ ມສ ຊົນເຜົ່າ ເມືອງເຊໂປນ ໃນປະຈຸບັນ) ແລະ ໂຮງຮຽນກິນນອນຊົນເຜົ່າໄຊພູວຽງ ເຂດຈຸດສຸມຫ້ວຍຫອຍ-ທູນຂາມ ເມືອງພີນ.


ທັງນີ້ ກໍຍ້ອນຍຄວາມເປັນຫ່ວງເປັນໄຍຕໍ່ ການດຳລົງຊີວິດຂອງລູກຫລານນັກຮຽນ ທີ່ຢູ່ໃນເຂດຫ່າງໄກສອກຫລີກຊົນນະບົດ ທີ່ຍັງຂາດປັດໄຈໃນການຮ່ຳຮຽນ ແລະ ດຳລົງຊີວິດຫລາຍ ຢ່າງບວກກັບ ສະພາບອາກາດ ໃນປະຈຸບັນທີ່ມີ ຄວາມໜາວເຢັນກວ່າໃນປີຜ່ານມາ, ເຊິ່ງເຄື່ອງທີ່ນຳໄປມອບໃນຄັ້ງນີ້ປະກອບມີ: ອຸປະກອນການຮຽນ, ອຸປະກອນກິລາ, ເຄື່ອງ ອຸປະໂພກ-ບໍ ລິໂພກ, ຜ້າຫົ່ມ, ອຸປະກອນການ ທຳສວນຄົວ ຈຳນວນໜຶ່ງ ໂດຍໄດ້ຈາກການລະດົມ ແລະ ປະກອບສ່ວນຊ່ວຍເຫລືອ ຂອງບັນດາຄອບຄົວ ການນຳຂອງແຂວງ, ສະມາຄົມນັກທຸລະກິດຍິງ ຂອງແຂວງ ແລະ ພະແນກການກົມກອງ ຈຳນວນໜຶ່ງ. ພ້ອມນີ້, ບັນດາການນຳຂອງແຂວງ, ພ້ອມດ້ວຍຄອບຄົວການນຳ ແລະ ສະມາຄົມນັກທຸລະກິດຍິງ ຂອງແຂວງ ຍັງໄດ້ມອບທຶນ ຈຳນວນ 3 ລ້ານກີບ ໃຫ້ກັບໂຮງຮຽນ ມສ ເຊໂປນ ເພື່ອນຳໃຊ້ ເຂົ້າໃນການພັດທະນາ ການສຶກສາຂອງໂຮງຮຽນຕື່ມອີກ.

            
ໂອກາດນີ້, ທ່ານ ສັນຕິພາບ ພົມວິຫານ ກໍໄດ້ເນັ້ນໜັ້ກໃຫ້ລູກຫລານນັກຮຽນ ຈົ່ງພ້ອມກັນເອົາໃຈໃສ່ ໃນການຮ່ຳຮຽນ ແລະ ຝຶກຝົນຫລໍ່ຫລອມຕົນເອງ ໃນທຸກດ້ານ ເພື່ອໃຫ້ກາຍເປັນ ນັກຮຽນທີ່ມີທັງ ຄວາມຮູ້ມີຄຸນສົມບັດ,  ພ້ອມທັງ ຮຽກຮ້ອງມາຍັງ ບັນດາຄູ-ອາຈານ ຈົ່ງເອົາໃຈໃສ່ໃນການສິດສອນ ແລະ ສົ່ງຄວາມຮູ້ແກ່ລູກຫລານນັກຮຽນ ໃຫ້ມີຄວາມຮູ້ມີຄວາມ ສາມາດກາຍເປັນ ອະນາຄົດທີ່ດີ ຂອງປະເທດຊາດໃນຕໍ່ໜ້າ.

 

 

ຂໍ້ມູນຈາກ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)