GMT+7 24/02/2018 07:17

ຫ້ອງວ່າການປະທານປະເທດ ປິດຊຸດຝຶກອົບຮົມທິດສະດີ 45 ວັນ

 

 

ພິທີ​ປິດ​ຊຸດ​ຝຶກອົບຮົມ​ ທິດ​ສະ​ດີກາ​ນ​ເມືອງ-ການ​ປົກຄອງ​ ໄລຍະ​ສັ້ນ 45 ວັນ ຊຸດ​ທີ 1 ​​ຂອງ​ຫ້ອງ​ວ່າການ​ປະທານ​ປະ​ເທດ ​ໄດ້​ມີ​ຂຶ້ນໃນ​ວັນ​ທີ 13 ກຸມພາ 2018, ​​ໂດຍ​ມີ​ທ່ານ ຄຳ​ເມິງ ພົງ​ທະ​ດີ ກຳມະການສູນກາງພັກ, ເລຂາຄະນະພັກ, ລັດຖະມົນຕີ, ຫົວໜ້າຫ້ອງວ່າການປະທານປະເທດ, ມີ​ບັນດາ​ຄະນະ​ພັກ, ຫົວໜ້າ​ກົມ, ຮອງ​ກົມ ​ພ້ອມ​ດ້ວຍ ພາກສ່ວນ​ກ່ຽວຂ້ອງ ​ເຂົ້າ​ຮ່ວມ.


ຊຸດ​ອົບຮົມ​ຄັ້ງ​ນີ້, ໄດ້​ເລີ່​ມ​ແຕ່​ວັນ​ທີ 11 ທັນວາ 2017 ຫາ 12 ກຸມພາ 2018, ມີ​ສຳ​ມະ​ນາກອນ ທັງ​ໝົດ 32 ທ່ານ, ຍິງ 18 ທ່ານ, ​​ໄດ້​ຮຽນ​ຮູ້ຫລາຍ​ພາກ​ວິຊາ ​ເປັນ​ຕົ້ນພາກ​ວິຊາ​ປັດ​ສະຍາ, ​ເສດຖະສາດ​ການ​ເມືອງ, ລັດທິສັງຄົມ​ນິຍົມ​ວິທະຍາສາດ, ບໍລິຫານ​ສາດ ​ແລະ ພາກ​ວິຊາ​ກໍ່ສ້າງພັກ, ​ໂດຍ​​ແມ່ນ​ອາຈານ​ ຈາກ​ສະ​ຖາ​ບັນ​ ການ​ເມືອງ​-ການ​ປົກຄອງ​ແຫ່ງ​ຊາດ ​ເປັນ​ຜູ້​ສິດສອນ. ຊຸດ​ຝຶກ​ອົບຮົມ ດັ່ງກ່າວ, ຈັດ​ຂຶ້ນ ​ເພື່ອ​ຍົກ​ລະດັບ​ຄວາມ​ຮູ້​ພື້ນຖານ ​ດ້ານ​ທິດ​ສະ​ດີ-ກາ​ນ​ເມືອງ ​ເປັນ​ຕົ້ນ​ຫລັກ​ມູນ​ພື້ນຖານ​ ທິດ​ສະ​ດີ​ມາກ-​ເລ​ນິນ ​ໃຫ້​ແກ່​ສະມາ​ຊິກ​ພັກ, ພະນັກງານ​ຫລັກ​ແຫ​ລ່ງ, ​ໃຫ້​ມີ​ຫລັກ​ໝັ້ນ, ທັດສະນະ​ຊົນ​ຊັ້ນ​ກຳມະກອນ, ​ເຊື່ອ​ໝັ້ນ​ຕໍ່​ແນວທາງ​ການ​ນຳພາ​ຂອງ​ພັກ, ​ເຊື່ອມ​ຊຶມ ​ແລະ ກຳ​ແໜ້ນ ​ແນວທາງ​ນະ​ໂຍບາຍ​ຂອງ​ພັກ ກໍ​ຄື ​ແນວທາງ​ປ່ຽນ​ແປງ​ໃໝ່​ຮອບດ້ານ​ ຢ່າງມີ​ຫລັກການ​ຂອງ​ພັກ ​ເພື່ອ​ນຳ​ໄປ​ຜັນ​ຂະຫຍາຍ ​ແລະ ຈັດ​ຕັ້ງ​ປະຕິ ບັດໃນ​ຂົງ​ເຂດ​ວຽກ​ງານ​ຕົວ​ຈິງ ທີ່​ຕົນ​ຮັບ​ຜິດ​ຊອບ​ໃຫ້​ເກີດ​ດອກ​ອອກ​ຜົນ.


​ໂອກາດ​ດັ່ງກ່າວ, ທ່ານ ຄຳ​ເມິງ ພົງ​ທະ​ດີ ​ໄດ້​ສະ​ແດງ​ຄວາມ​ຊົມ​ເຊີຍ ຕໍ່​ຊຸດ​ຝຶກ​ອົບຮົມ​ດັ່ງກ່າວ ພ້ອມ​ທັງ ຮຽກຮ້ອງໃຫ້ສຳມະນາກອນ ຈົ່ງນຳເອົາຄວາມຮູ້ຄວາມສາມາດ ທີ່ໄດ້ຮ່ຳຮຽນມາ ໄປພັດທະນາເຂົ້າໃນ ໜ້າ​ທີ່​ວຽກ​ງານຂອງຕົນຮັບຜິດ ຊອບ ໃຫ້ເກີດປະໂຫຍດສູງສຸດ, ໂດຍສະເພາະແມ່ນ ຄວາມຮູ້ພື້ນຖານທາງດ້ານ ທິດສະດີການເມືອງ-ການປົກຄອງ, ຄວາມຮູ້ພື້ນຖານ ທິດສະດີມາກ-ເລນິນ, ບັນດາແນວທາງ ການພັດທະນາ ເສດຖະກິດ-ສັງຄົມຂອງພັກ ໃນໄລຍະໃໝ່, ການຄຸ້ມຄອງລັດ ແລະ ຄຸ້ມຄອງສັງຄົມ ດ້ວຍກົດໝາຍ ​ແລະ ອື່ນໆ. 

 

 

ຂໍ້ມູນຈາກ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)