GMT+7 24/02/2018 07:18

ປີ 2017 ທໍາລາຍລະເບີດບໍ່ທັນແຕກທີ່ຕົກຄ້າງ ໃນໂຄງການກໍ່ສ້າງທາງລົດໄຟ ລາວ-ຈີນ ເກືອບ 130 ໜ່ວຍ

 

 

ໃນປີ 2017 ຜ່ານມາຄະນະຮັບຜິດຊອບກວດກູ້ ແລະ ທໍາລາຍລະເບີດບໍ່ທັນແຕກທີ່ຕົກຄ້າງ ໃນໂຄງການກໍ່ສ້າງທາງລົດໄຟ ລາວ-ຈີນ ແຕ່ບໍ່ເຕັນເຖິງ ນະຄອນຫລວງວຽງຈັນ, ໄດ້ກວດພົບລະເບີດ ບໍ່ທັນແຕກທີ່ຕົກຄ້າງເຖິງ 128 ໜ່ວຍ. ໃນເນື້ອທີ່ທັງໝົດ 1.026 ກວ່າເຮັກຕາ ແລະ ຊີ້ນສ່ວນລະເບີດ ແລະ ໂລຫະຕ່າງໆໄດ້ 211.560 ກວ່າຊີ້ນສ່ວນ.


ໃນວັນທີ 13 ກຸມພາ 2018 ທີ່ສະໂມສອນກອງບັນຊາການ ທະຫານແຂວງຫລວງພະບາງ ໄດ້ມີກອງປະຊຸມສະຫລຸບ ວຽກງານປະຈໍາປີ 2017 ແລະ ວາງແຜນການປະຈໍາປີ 2018, ໂດຍການເປັນ ປະທານຂອງທ່ານ ພົນໂທ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ, ມີທ່ານເຈົ້າແຂວງຫລວງພະບາງ, ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ, ມີບັນດາຄະນະຮັບ ຜິດຊອບໄລຍະທາງລົດໄຟ ລາວ-ຈີນ, ພ້ອມດ້ວຍພາກສ່ວນທີ່ກ່ຽວຂ້ອງ ເຂົ້າຮ່ວມ.

ທ່ານ ພົນຕີ ຄໍາລຽນ ອຸທະໄກສອນ ຮອງຫົວໜ້າກົມໃຫຍ່ເສນາທິການກອງທັບ ກະຊວງປ້ອງກັນປະເທດ, ຄະນະຮັບຜິດຊອບວຽກງານ ກວດກູ້ລະເບີດທາງລົດໄຟ ໄດ້ຜ່ານບົດສະຫລຸບ ວ່າ: ເພື່ອຮັບປະກັນຄວາມປອດໄພ ໃຫ້ການກໍ່ສ້າງ ທາງລົດໄຟລາວ-ຈີນ ແຕ່ບໍ່ເຕັນເຖິງ ນະຄອນຫລວງວຽງຈັນ ໃຫ້ມີຄວາມປອດໄພຮອບດ້ານນັ້ນ.ໃນນາມຄະນະຮັບຜິດ ຊອບໂດຍກົງ ໃນວຽກງານດັ່ງກ່າວ, ກະຊວງປ້ອງກັນປະເທດ ຈຶ່ງໄດ້ຕົກລົງມອບໃຫ້ກົມໃຫຍ່ ເສນາທິການເປັນ ຜູ້ຊີ້ນໍາ ໂດຍນໍາໃຊ້ກໍາລັງເຫລົ່າຮົບຊ່າງແສງ ແລະ ກອງພົນທະຫານຮາບທີ່ 1,2,3,4 ຈໍານວນ 300 ກວ່າສະຫາຍ, ໂດຍຈັດຕັ້ງເປັນ 6 ກອງກວດກູ້ລະເບີດປະຈໍາ 6 ໄລຍະທາງ. ນອກນີ້, ໄດ້ຈັດຕັ້ງ 1ໝວດເພື່ອເຮັດໜ້າທີ່ ເຄື່ອນທີ່ກວດກູ້ ແລະ ທໍາລາຍລະເບີດທາງພາກ ພື້ນນໍ້າແກ້ໄຂລະເບີດ ໃນກໍລະນີສຸກເສີນ. ຂະນະດຽວເພື່ອສືບຕໍ່ຕາມແຜນການ ຂອງບໍລິສັດຜູ້ຮັບເໝົາກໍ່ສ້າງ ໃນການກວດກູ້ໃນປີ 2018 ຈະໃຫ້ໄດ້ປະມານ 1.798 ກວ່າເຮັກຕາ ໃນນີ້ປະກອບ ມີແລວທາງ, ສະຖານີ, ບ່ອນຖີ້ມດິນ ແລະ ທາງຊອຍ.


ທ່ານ ພົນຕີ ຄໍາລຽນ ອຸທະໄກສອນ ກ່າວຕື່ມວ່າ: ສໍາລັບໃນປີ 2017 ສາມາດກວດກູ້ລະເບີດບໍ່ທັນແຕກສໍາເລັດ ແລະ ໄດ້ຮັບການກວດກາຢັ້ງຢືນ ຄຸນນະພາບໄດ້ທັງໝົດ1.026 ກວ່າເຮັກຕາ ໃນນີ້ມີເນື້ອທີ່ກວດກູ້ລະເບີດ ບໍ່ທັນແຕກຢູ່ພື້ນ ນໍ້າ 9 ກວ່າເຮັກຕາ. ເນື້ອທີ່ຖາງປ່າອານາໄມພື້ນທີ່ ເພື່ອກວດກູ້ລະເບີດທັງໝົດ 571 ກວ່າເຮັກຕາ.ກວດກູ້ລະເບີດ ບໍ່ທັນແຕກ ທີ່ຕົກຄ້າງໄດ້ 128 ໜ່ວຍ. ໃນນີ້ມີໂບມ 250 ປອນ ຫລື 125 ກິໂລ 2 ໜ່ວຍ (ກວດກູ້ໄດ້ຢູ່ພື້ນທີ່ຂອງ ບ້ານພິກນ້ອຍ ເມືອງຫລວງພະບາງ1 ໜ່ວຍ ແລະ ຢູ່ພື້ນທີ່ຂອງ ບ້ານລາດຫານ ເມືອງງາ ແຂວງອຸດົມໄຊ 1 ໜ່ວຍ) ກວດກູ້ຊີ້ນສ່ວນລະເບີດ ແລະ ໂລຫະຕ່າງໆໄດ້ທັງໝົດ 211.562 ຊີ້ນ, ສ່ວນທຽບໃສ່ແຜນການທັງໝົດຂອງໂຄງ ການແມ່ນປະຕິບັດໄດ້ປະມານ 40%.

 

 

ຂໍ້ມູນຈາກ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)