GMT+7 21/05/2018 02:39

ລາວ ຍັງມີເດັກນ້ອຍ-ຊາວໜຸ່ມ 380.000 ກວ່າຄົນບໍ່ທັນເຂົ້າເຖິງການສຶກສາ

 

 

ຜ່ານ​ການລົງ​ສຳຫລວດ ​ແລະ ​ເກັບ​ກຳ​ຂໍ້​ມູນ ​ໃນ​ໄລຍະ 3 ປີ ຜ່ານມາ ຢູ່ ​ສປປ ລາວ ມີ​ເດັກນ້ອຍ ​ແລະ ຊາວ​ໜຸ່ມ ຫລາຍ​ກວ່າ 380.000 ຄົນ ​ຍັງບໍ່​ທັນ​ເຂົ້າ​ເຖິງ​ການ​ສຶກສາ. ຂະນະ​ທີ່ຜູ້​ໃຫຍ່​ຫລາຍ​ລ້ານ​ຄົນ ​ທີ່​ຍັງ​ຕ້ອງການ​ມີຄວາມ​ຕ້ອງການ​ຝຶກ​ທັກ​ສະ ​ແລະ ຮຽນ​ຮູ້​ໜັງສື.


ກອງ​ປະຊຸມ​ຄູ່​ຮ່ວມ​ພັດທະນາ ​ເພື່ອ​ສະໜັບສະໜູນ​ວຽກ​ງານ​ ການ​ສຶກສານ​ອກ​ໂຮງຮຽນ ​ໄດ້​ຈັດ​ຂຶ້ນ​ໃນ​ວັນ​ທີ 13 ກຸມພາ 2018 ທີ່​ ໂຮງ​ແຮມ​ວຽງ​ຈັນ​ພລາຊາ, ​ໂດຍ​ການ​ເປັນ​ປະ​ທ່ານ ​ຂອງ​ທ່ານ ນາງ ພິລາ​ນີ ພິດສະ​ໄໝ ຮອງ​ຫົວໜ້າ​ກົມການ​ສຶກສານ​ອກ​ໂຮງຮຽນ ກະຊວງ​ສຶກສາ​ທິການ ​ແລະ ກິ ລາ, ທ່ານ ອີ​ຈິ​ໂຣ ມິ​ຢາ​ຊາ​ວາ ຜູ້​ຊ່ຽວຊານ​ດ້ານ​ການ​ຮຽນ​ຮູ້​ຕະຫລອດ​ຊີວິດ, ທ່ານ ​ອູ​ເວີ ກາກ​ເຕິ​ນສະ​ແລ​ເກີ ຜູ້ອຳນວຍການ ​ຫ້ອງການ​ຮ່ວມ​ມືນາໆ​ຊາດ​ເພື່ອ​ການ​ສຶກສາ​ຜູ້​ໃຫຍ່ ຂອງ​ເຢຍລະ​ມັນປະຈຳ​ລາວ ​ມີ​ບັນດາ​ພະນັກ​ງານ​ທີ່​ກ່ຽວຂ້ອງ ​ເຂົ້າ​ຮ່ວມ.

ຈຸດປະສົງ​ ແມ່ນ​ເພື່ອ​ເປັນ​ການ​ລະດົມ ​ທຶນ​ສະໜັບສະໜູນ​ ວຽກ​ງານ​ການ​ສຶກສານ​ອກ​ໂຮງຮຽນ ພ້ອມ​ທັງ​ນຳ​ສະ​ເໜີ​ແຜນ​ງານ​ການ​ຮຽນ​ຮູ້ ​ແລະ ຄວາມ​ສຳ​ເລັດ​ໃນ​ປັດຈຸ​ບັນ ​ແລະ ​ເພື່ອ​ກຳນົດ​ໂອກາດ, ຊັບ​ພະຍາກອນ ​ແລະ ການ​ເຮັດ​ວຽກ​ຮ່ວມ​ກັນ​ຢ່າງ​ມີ​ປະສິດທິພາບ ໃນການສະໜອງໂອກາດ ການຮຽນຮູ້ສຳລັບເດັກນ້ອຍ ຕົກຫລົ່ນຈາກໂຮງຮຽນ ແລະ ການກໍ່ສ້າງສູນການສຶກສານອກໂຮງຮຽນ ໃນລະ ດັບຕົວເມືອງ ແລະ ລະດັບບ້ານ.


ທ່ານ ນາງ ພິລາ​ນີ ພິດສະ​ໄໝ ​​ກ່າວ​ວ່າ: ​ການ​ສຶກສາ​ທີ່​ໄດ້​ກຳນົດ​ເປົ້າ​ໝາຍ ​ໄປ​ຍັງ​ຜູ້​ດ້ອຍ​ໂອກາດ​ ທັງ​ໃນ​ດ້ານ​ເຕັກນິກ ​ແລະ ການ​ເງິນ ​ແຕ່​ກໍ​ຍັງ​ບໍ່​ທັນ​ພຽງພໍ​ ກັບ​ຄວາມ​ຕ້ອງການ. ເພື່ອ​ບັນລຸ​ເປົ້າໝາຍ​ ການ​ພັດທະນາ​ແບບ​ຍືນ​ຍົງ​ ໃນ​ດ້ານ​ການ​ສຶກສາຄື ຮັບປະກັນ​ການ​ສຶກສາ ​ໃຫ້​ມີ​ຄຸນ​ນະພາ​ບ​ເທົ່າ​ທຽມທົ່ວ​ເຖິງ ​ແລະ ສົ່ງ​ເສີມ​ກາລະ​ໂອກາດ​ ໃນ​ການ​ຮຽນ​ຮູ້​ຕະຫລອດ​ຊີວິດ ​ສຳລັບ​ໝົດ​ທຸກ​ຄົນ, ການ​ສະໜອງ​ການ​ສຶກສານ​ອກ​ໂຮງຮຽນ​ ເປັນ​ຍຸດ​ທະ​ສາດ​ທີ່​ສຳຄັນ ​ແລະ ​ເປັນ​ວິທີ​ການ​ປະຕິບັດ ​ເພື່ອ​ໃຫ້​ເດັກ ນ້ອຍ​ຕົກ​ຫລົ່ນ​ຈາກ​ໂຮງຮຽນ, ຊາວ​ໜຸ່ມ ​ແລະ ຜູ້​ໃຫຍ່​ ໄດ້​ມີ​ໂອກາດ​ໃນ​ການ​ຮຽນ​ຮູ້​ທີ່​ມີ​ປະສິດທິພາບ.

 

 

ຂໍ້ມູນຈາກ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)