GMT+7 24/02/2018 06:51

ເມືອງຫຼວງພະບາງ ປິດສາກກິລາເຂດ 3, 4 ເມືອງໃຕ້ ຄັ້ງທີ 4 ມອບຕໍ່ໃຫ້ ເມືອງຊຽງເງິນ

 

ປິດສາກລົງຢ່າງເປັນທາງການແລ້ວ ສຳລັບການແຂ່ງຂັນກິລາເຂດ III. 4 ເມືອງໃຕ້ຄັ້ງທີ 4 ຄື: ເມືອງຊຽງເງິນ, ເມືອງນານ, ເມືອງພູຄູນ ແລະ ເມືອງຫຼວງພະບາງ ເຈົ້າພາບປີ 2018, ພົບກັນໃໝ່ຄັ້ງທີ 5 ທີ່ເມືອງຊຽງເງິນ ຮັບກຽດເປັນເຈົ້າພາບໃນປີ 2019.

ພິທີປິດການແຂ່ງຂັນ ແລະ ມອບລາງວັນໄດ້ຈັດຂື້ນໃນຕອນເຊົ້າຂອງວັນທີ 8 ກຸມພາຜ່ານມາ ທີ່ສະໜາມກິລານາຫຼວງ ແຂວງຫຼວງພະບາງ ໂດຍການໃຫ້ກຽດເຂົ້າຮ່ວມຂອງ ທ່ານ ສຸກັນ ບຸນຍົງ ເຈົ້າເມືອງຫຼວງພະບາງ ປະທານຈັດງານ, ທ່ານ ຊາຍສະຫັວນ ຈັນມານິດ ຮອງຫົວໜ້າພະແນກສຶກສາທິການ ແລະ ກິລາແຂວງ,ມີຄະນະນຳຈາກ 4 ເມືອງ,ຄະນະຮັບຜິດຊອບ,ຄູຝຶກ ແລະ ນັກກິລາ ພ້ອມດ້ວຍແຂກຖືກເຊີນເຂົ້າຮ່ວມ.

 

 

ການແຂ່ງຂັນກິລາເຂດຄັ້ງນີ້ກໍ່ເພື່ອສ້າງຂະບວນການສະເຫຼີມສະຫຼອງບັນດາວັນປະຫວັດສາດທີ່ສຳຄັນຂອງພັກກໍ່ຄື: ວັນສ້າງຕັ້ງປະຊາຊົນປະຕິວັດລາວຄົບຮອບ63ປີ,ທັງເປັນການຂຳນັບຮັບຕ້ອນວັນແມ່ຍິງສາກົນຄົບຮອບ 108 ປີ, ພິເສດກໍ່ຄືການເປີດປີທ່ອງທ່ຽວລາວ 2018 ແລະ ການກຽມປະກາດເມືອງຫຼວງພະບາງໃຫ້ເປັນນະຄອນຫຼວງພະບາງໃນມໍ່ໆນີ້ ອີກດ້ານໜຶ່ງກໍ່ເພື່ອເປັນການແລກປ່ຽນບົດຮຽນເຊິ່ງກັນແລະກັນລະຫວ່າງເມືອງຕໍ່ເມືອງ ແລະ ນັກກິລາແຕ່ລະພາກສ່ວນມີຄວາມສາມັກຄີໄມຕີຈິດມິດຕະພາບອັນໜັກແໜ້ນໃນການຮ່ວມມືປະສານສົມທົບພົວພັນທາງດ້ານວຽກງານເວົ້າລວມ,ເວົ້າສະເພາະແມ່ນວຽກງານການທ່ອງທ່ຽວແລະກິລາສິລະປະວັນນະຄະດີໃນຕໍ່ໜ້າ.

ການແຂ່ງຂັນດັ່ງກ່າວປະກອບມີ 6 ປະເພດກິລາ, ມີ 13 ລາຍການແຂ່ງຂັນ,ປະເພດກິລາແຂ່ງຂັນມີ: ບານເຕະ,ບານສົ່ງ,ກະຕໍ້ຫວາຍ,ແລ່ນລານ,ໜ້າເກັກ,ເປຕັງ.ຜ່ານການແຂ່ງຂັນ ຕະຫຼອດໄລຍະ 3 ວັນຜົນ.

ປະກົດວ່າ: ຊະນະເລີດປະເພດກິລາບານເຕະຊາຍໄດ້ແກ່ ເມືອງຫຼວງພະບາງເຈົ້າພາບ,ບານສົ່ງຊາຍຊະນະເລີດໄດ້ແກ່ເມືອງພູຄູນ,ກະຕໍ້ຊາຍຊະນະເລີດໄດ້ແກ່ເມືອງຊຽງເງິນ,ກະຕໍ້ຍິງຊະນະເລີດໄດ້ເເກ່ເມືອງຫຼວງພະບາງ,ແລ່ນລານ800 ແມັດຊາຍຊະນະເລີດເປັນຂອງເມືອງຫຼວງພະບາງເຈົ້າພາບ,ແລ່ນລານ800ແມັດຍິງຊະນະເລີດໄດ້ແກ່ເມືອງພູຄູນ,ແລ່ນລານ 3ພັນແມັດຍິງ ແລະ 5ພັນແມັດຊາຍຊະຊະເລີດເປັນຂອງເມືອງພູຄູນ.

 

 

ກິລາເຕັ້ນຍາວ(ຊາຍ) ຊະນະເລີດໄດ້ແກ່ເມືອງຫຼວງພະບາງ,ເຕັ້ນຍາວ(ຍິງ)ຊະນະເລີດຕົກເປັນຂອງເມືອງຊຽງເງິນ,ກິລາໜ້າເກັກ(ຊາຍ)ຊະນະເລີດໄດ້ແກ່ເມືອງຫຼວງພະບາງ ແລະ ໜ້າເກັກ(ຍິງ)ຊະນະເລີດໄດ້ແກ່ເມືອງພູຄູນ, ສ່ວນກິລາເປຕັງທີມການນຳຊະນະເລີດໄດ້ແກ່ເມືອງຫຼວງພະບາງ,ສັງລວມຕີລາຄາເປັນຫຼຽນ ແລະ ຈັດອັນດັບລວມຜົນການແຂ່ງຂັນໄດ້: ເມືອງຫຼວງພະບາງ ໄດ້ 6 ຫຼຽນຄຳ, 4 ຫຼຽນເງິນ ແລະ 5 ຫຼຽນທອງລວມທັງໝົດ 15 ຫຼຽນຈັດອັນດັບໄດ້ທີ1,ເມືອງພູຄູນ ໄດ້ 5 ຫຼຽນຄຳ,6 ຫຼຽນເງິນ ແລະ 1 ຫຼຽນທອງ ລວມ 12 ຫຼຽນ ເປັນອັນດັບທີ2, ເມືອງຊຽງເງິນ ໄດ້ 2 ຫຼຽນຄຳ ແລະ 4 ຫຼຽນທອງໄດ້ອັນດັບທີ 3, ເມືອງນານໄດ້ 3ຫຼຽນເງິນ ແລະ 3ຫຼຽນທອງ ເປັນອັນດັບທີ 4ໃນການແຂ່ງຂັນ.

ຕອນທ້າຍຂອງພິທີ ທ່ານ ສຸກັນ ບຸນຍົງເຈົ້າເມືອງຫຼວງພະບາງໄດ້ໃຫ້ກຽດກ່າວມອບທຸງກິລາໃຫ້ເມືອງຊຽງເງິນ ເພື່ອເປັນເຈົ້າພາບ ຄັ້ງທີ່ 5 ໃນປີ 2019 ແລະ ກ່າວຮັບທຸງກິລາ ໂດຍທ່ານ ສາຍສະໝອນ ທິດາກອນ ເຈົ້າເມືອງຊຽງເງິນ.

 

 

ຂໍ້ມູນມາຈາກ : laosupdate

ຄວາມຄິດເຫັນຂອງຜູ້ອ່ານ (0)