GMT+7 21/05/2018 06:30

ພິທີຕ້ອນຮັບ ແລະ ປິດຊຸດຝຶກອົບຮົມແຮງງານລາວ ຊຸດທຳອິດ ຢູ່ ສ.ເກົາຫລີ

 

 

ພາຍ​ຫລັງ​ ທີ່​ລັ​ດ​ຖະ​ບານ​ລາວ ແລະ ສ.ເກົາ​ຫລີ ໄດ້​ມີ​ການ​ ຮ່ວມ​ມື ແລະ ເຊັນບົດ​ບັນ​ທຶກ​ຊ່ວຍ​ຈຳ (MOU) ວ່າ​ດ້ວຍ ການ​ສົ່ງ-ຮັບ​ແຮງ​ງານ​, ໂດຍ​ຜ່ານ ​ລະ​ບົບ​ການ​ຈ້າງ​ງານ ໃນ​ທ້າຍ​ປີ 2016. ໃນຕອນ​ເຊົ້າ​ ວັນ​ທີ 06 ກຸມ​ພາ 2018, ​ທີ່ສະ​ໝາມ​ບິນ​ສາ​ກົນ ​ອິນ​ຊອນ ສ.ເກົາ​ຫລີ ໄດ້​ ມີ​ພິ​ທີ​ຕ້ອນຮັບ ​ແຮງ​ງານ​ຈາກ ສ​ປ​ປ ລາວ ຊຸດ​ທຳ​ອິດ ຈຳ​ນວນ 26 ຄົນ ຜູ້​ທີ່​ໄດ້​ຜ່ານ​ການ​ສອບ​ເສັງ​, ໂດຍ​ຜ່ານ​ລະ​ບົບ ​ການ​ຈ້າງ​ແຮງ​ງານ​ຂອງ ສ.ເກົາ​ຫລີ (Employment Permit System ຫລື EPS) ທີ່ ນະ​ຄອນ​ຫລວງ​ວຽງ​ຈັນ ໃນ​ປີ 2017 ຜ່ານ​ມາ, ໂດຍ​ການເຂົ້າ​ຮ່ວມ ​ໃນ​ພິ​ທີ​​ຂອງ ທ່ານ ຄຳ​ສວຍ ແກ້ວ​ດາ​ລາ​ວົງ ເອກ​ອັກ​ຄະ​ລັດ​ຖະ​ທູດລາວ ປະ​ຈຳ ສ.ເກົາ​ຫລີ, ທ່ານ ກິມ ດັອງ ມັນ (Kim Dong Man) ປະ​ທານ​ສຳ​ນັກ​ງານ ​ພັດ​ທະ​ນາ​ຊັບ​ພະ​ຍາ​ກອນ​ມະ​ນຸດ (Human Resources Development Service of Korea ຫລື HRD Korea), ທ່ານ ກິມ ດົງ ໂຮ (Kim Dong Ho) ຫົວ​ໜ້າ​ກົມ​ແຮງ​ງານ ​ຕ່າງ​ປະ​ເທດ, ກະ​ຊວງ​ການ​ຈ້າງ​ງານ ແລະ ແຮງ​ງານ, ​ມີ​ ທ່ານ ​ເລ​ຂາ​ທິ​ການ​ໃຫຍ່ ມູນ​ນິ​ທິ​ແຮງ​ງານ​ເກົາ​ຫລີ (Korea Labor Foundation), ທ່ານ​ຜູ້​ຕາງ​ໜ້າ​ສູນ EPS ປະ​ຈຳ​ ລາວ ແລະ ​ພາກ​ສ່ວນກ່ຽວ​ຂ້ອງ ເຂົ້າ​ຮ່ວມ.

ສຳ​ລັບ​ ແຮງ​ງານ​ໃໝ່ທີ່​ມາ​ອອກ​ແຮງ​ງານ ​ຢູ່ ສ.ເກົາ​ຫລີ, ທັນ​ທີ​ ທີ່​ເດີນ​ທາງ​ມາ​ຮອດ ສ.​ເກົາ​​ຫລີ ຈະ​ຕ້ອງ​ໄດ້​ຜ່ານ​ການ ​ຝຶກ​ອົບ​ຮົມ​​ໄລ​ຍະ​ສັ້ນເປັນເວລາ 2 ຄືນ 3 ມື້ ​ຢູ່ສູນ​ຝຶກ​ອົບ​ຮົມ​ແຮງ​ງານ ຂອງ ມູນ​ນິ​ທິ ​ແຮງ​ງານ​ເກົາ​ຫລີ, ທີ່ ເມືອງ​ຢໍ​ຈູ (Yeoju), ແຂວງ​ກັອງ​ກີ (Gyeonggi), ເພື່ອ​ ຊ່ວຍ​ໃຫ້​ເຂົາ​ເຈົ້າຮັບ​ຮູ້ ແລະ ​ເຂົ້າ​ໃຈ​ສະ​ພາບ​ການ ​ເຮັດ​ວຽກ ແລະ ການ​ດຳລົງ​ຊີ​ວິດ ​ຢູ່ ສ.ເກົາ​ຫລີ. ໃນ​ຕອນ​ເຊົ້າ​ ວັນ​ທີ 08 ກຸມ​ພາ 2018, ຈຶ່ງ​ໄດ້​ມີ​ພິ​ທີ​ປິດ​ຊຸດ​ຝຶກ​ອົບ​ຮົມ​ ໃຫ້​ແກ່​ແຮງ​ງານ​ລາວ​ ຢູ່​ສູນ​ຝຶກ​ອົບ​ຮົມ​ດັ່ງ​ກ່າວ, ໂດຍ​​ເຂົ້າ​ຮ່ວມ​ ໃນ​ພິ​ທີ​ມີ​ທ່ານ​ເອກ​ອັກ​ຄະ​ລັດ​ຖະ​ທູດ ຄຳ​ສວຍ ແກ້ວ​ດາ​ລາ​ວົງ, ທ່ານ ລີ ຈັອງ ຊິກ (Lee Jung Sik), ເລ​ຂາ​ທິ​ການ​ໃຫຍ່ ມູນ​ນິ​ທິ​ແຮງ​ງານ​ເກົາ​ຫລີ, ​ທ່ານ ແບ ຊູ ນາມ (Bae Soo Nam), ​ຜູ້​ອຳ​ນວຍ​ການ ​ສູນ​ແຮງ​ງານ​ສາ​ກົນ, ມີ​ຜູ້​ຕາງ​ຫນ້າ ແລະ ພະ​ນັກ​ງານ​ ຈາກ​ພາກ​ສ່ວນ​ທີ່​ກ່ຽວ​ຂ້ອງ ແລະ ສະ​ຖານ​ທູດ​ລາວ ເຂົ້າ​ຮ່ວມ. ໂອ​ກາດນີ້, ທ່ານ ເອກ​ອັກ​ຄະ​ລັດຖະ​ທູດ ກໍ​ກ່າວໄດ້​ຊົມ​ເຊີຍ ແລະ ​ມີ​ຄຳ​ເຫັນວ່າ ນີ້ເປັນຜົນສຳເລັດ ໃນເບື້ອງຕົ້ນຊື່ງ ສອງຝ່າຍລາວ-ເກົາຫລີ ຈະຕ້ອງໄດ້ ສືບຕໍ່ພັດທະນາໄປເລື້ອຍໆ ພ້ອມສະແດງ ຄວາມຫວັງຢາກເຫັນແຮງງານລາວ ເຮັດວຽກຢູ່ ສ.ເກົາຫລີ ເປັນຈຳນວນຫລາຍຄືກັບປະເທດອື່ນໆ.

ຈາກນັ້ນ ກໍໄດ້ແນະ​ນຳ​​ໃຫ້ແຮງ​ງານ​ລາວ​ ເອົາ​ໃຈ​ໃສ່ ​ປະ​ຕິ​ບັດ​​ລະ​ບຽບກົດ​ຫມາຍ, ລະ​ບຽບ​ຂອງ​ຜູ້​ຈ້າງ​ງານ​ ທີ່​ລະ​ບຸ​ໄວ້​ໃນ​ສັນ​ຍາ, ເອົາ​ໃຈ​ໃສ່​​ດຸ​ໝັ່ນ ໃນ​ການ​ເຮັດ​ວຽກ, ມີ​ຄວາມ​ ມາ​ນະ​ອົດ​ທົນ, ຊື່​ສັດ​ສຸ​ຈະ​ລິດ, ປະ​ຕິ​ບັດ​ໂມງ​ເວ​ລາ ​ຢ່າງ​ເຂັ້ມ​ງວດ, ປະ​ຢັດ​ມັດ​ທະ​ຍັດ ແລະ ບໍ່​ຫລິ້ນ​ກິນ​ຟູມ​ເຟືອຍ. ຄຽງ​ຄູ່​ກັບ​ວຽກ​ງານ ກໍ​ໄດ້ຮຽກຮ້ອງໃຫ້ ​ຮຽນ​ຮູ້​​ວັດ​ທະ​ນະ​ທຳ ແລະ ນັບ​ຖື ຮີດ​ຄອງ​ປະ​ເພ​ນີ, ຮ່ຳ​ຮຽນ​ພາ​ສາ​ເກົາ​ຫລີ​ ທີ່​ມີ​ຄວາມ​ຈຳ​ເປັນ​ສຳ​ລັບ​ວຽກ​ງານ ແລະ ການ​ດຳ​ລົງ​ຊີ​ວິດ, ທັງ​ນີ້​ ກໍເພື່ອ​ພັດ​ທະ​ນາ​ຄວາມ​ຮູ້​ຄວາມ​ສາ​ມາດ​ ຂອງຕົນ​ເອງ​ໄປ​ນຳ​ໃຊ້​  ໃນ​ອະ​ນາ​ຄົດ​ຂ້າງ​ໜ້າ. ທ່ານ​ເອກ​ອັກ​ຄະ​ລັດ​ຖະ​ທູດ​ຍັງ​ ໄດ້​ຢ້ຳ​ຕື່ມ​ວ່າ ແຮງ​ງານ​ລາວ​ ຊຸດ​ທຳ​ອິດນີ້ ຖື​ເປັນ​ຊຸດ​ເປີດ​ທາງ ​ໃນ​ການ​ມາ​ເຮັດ​ວຽກ​ຢູ່ ສ.ເກົາ​ຫລີ, ສະ​ນັ້ນ ຕ້ອງ​ໄດ້​ເປັນ​ແບບ​ຢ່າງ​ທີ່ດີ​ ໃນ​ການ​ສ້າງ​ຊື່​ສຽງ​ເພື່ອ​ຊຸດ​ຕໍ່ໆ​ ໄປ ​ທັງ​ນີ້​ກໍ​ເພື່ອ ​ເປັນ​ກຽດ ແລະ ຊື່​ສຽງ​ໃຫ້​ແກ່​ປະ​ເທດ​ຊາດ ແລະ ປະ​ຊາ​ຊົນລາວ ​ຂອງ​ພວກ​ເຮົາ.​ ໃນ​ທ້າຍ​ເດືອນ​ກຸມ​ພາ 2018 ນີ້ ກໍ​ຈະ​ມີ​ແຮງ​ງານ​ລາວ​ ອີກ​ຈຳ​ນວນ​ໜຶ່ງ​ທີ່​ຈະ​ເດີນ​ທາງ​ມາ​ເຮັດ​ວຽກ ຢູ່ ສ.ເກົາ​ຫລີ ຕື່ມອີກ.

 

 

ຂໍ້ມູນຈາກ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)