GMT+7 24/02/2018 06:47

ງານວາງສະແດງສິນຄ້າເຟີນີເຈີວຽງຈັນ ຈະຈັດຂຶ້ນທ້າຍເດືອນມີນາ

 

 

ສະມາຄົມ​ເຟີ​ນີ​ເຈີ​ລາວ (​ສຟລ) ຈະ​ຈັດ​ງານ​ວາງສະແດງສິນຄ້າ​ເຟີ​ນີ​ເຈີ​ວຽງ​ຈັນ ຄັ້ງ​ທີ 3 ປະຈຳ​ປີ 2018 ຂຶ້ນ​ວັນ​ທີ 24 ມີນາ-1 ເມສາ 2018 ຢູ່​ສູນ​ການຄ້າລາວ-ໄອ​ເຕັກ ໂດຍ​ຈະ​ນຳເອົາ​ຜະລິດ​ຕະ​ພັນ​ເຄື່ອງ​ເຟີ​ນີ​ເຈີ ທີ່​ຜະລິດດ້ວຍ​ໄມ້ຫວາຍ ໄມ້ປ່ອງ ວັດ​ສະ​ດຸ​ເສດ​ເຫຼືອ​ຕ່າງໆ​ທີ່​ເຮັດເປັນ​ເຄື່ອງ​ເຟີ​ນີ​ເຈີ ລວມ​ເຖິງ​ຜະລິດ​ຕະ​ພັນຫັດຖະກຳ ເຄື່ອງ​ແກະສະຫຼັກ ອຸປະກອນ​ປະກອບ​ຮັບ​ໃຊ້ ເຄື່ອງມື ແລະ ເຄື່ອງ​ຈັກ​ຕ່າງໆ​ກ່ຽວ​ກັບເຟີ​ນີ​ເຈີ ມາ​ວາງສະແດງ ແລະ ຈຳໜ່າຍ​ໃນ​ລາຄາ​ໂຮງງານ ນອກ​ນີ້ຍັງ​ຈະ​ມີ​ການ​ຫຼຸດ​ລາຄາພິເສດ ພ້ອມ​ທັງແຈກ ແຖມ.

ພິທີ​ຖະແຫຼງ​ຂ່າວ​ຈັດ​ງານ​ໄດ້ມີ​ຂຶ້ນ​ວັນ​ທີ 7 ກຸມພາ 2018 ຢູ່​ສະພາ​ການ​ຄ້າ ແລະ ອຸດສາຫະກຳແຫ່ງ​ຊາດ​ລາວ ມີ​ທ່ານ ສີ​ສັງຄົມ ໂຄດ​ໂຍທາ ຮອງ​ຫົວໜ້າ​ກົມ​ສົ່ງເສີມ​ການ​ຄ້າ ກະຊວງ​ອຸດ​ສາ​ຫະກຳ ແລະ ການ​ຄ້າ ທ່ານ ກອງມາລາ ພົມມາ​ໄລ ຮອງ​ປະທານ ​ສຟລ ພ້ອມ​ດ້ວຍ​ຕາງໜ້າ​ພະແນກ​ການ​ກ່ຽວຂ້ອງ ແລະ ຜູ້​ປະກອບ​ການ​ເຂົ້າ​ຮ່ວມ.

ທ່ານ ກອງ​ມາລາ ພົມມາ​ໄລ ກ່າວ​ວ່າ: ການ​ຈັດ​ງານ​ວາງ​ສະແດງ​ຄັ້ງ​ນີ້ ເພື່ອ​ເປັນ​ການຈັດຕັ້ງຜັນ​ຂະຫຍາຍ​ເນື້ອ​ໃນ​ຈິດໃຈ​ຂອງຂັ້ນ​ເທິງ ໂດຍ​ສະເພາະຄຳ​ສັ່ງເລກ​ທີ 15/​ນຍ ໃຫ້​ປາກົດ​ຜົນ​ເປັນຈິງ ເພື່ອ​ປົກ​ປັກ​ຮັກສາ​ປ່າໄມ້ ນຳໃຊ້​ໄມ້​ໃຫ້​ເກີດ​ປະໂຫຍດ ໂດຍການ​ປຸງ​ແຕ່ງ​ເປັນ​ຜະລິດ​ຕະ​ພັນສຳເລັດ​ຮູບ​ ຕິດ​ພັນ​ກັບ​ການ​ນຳ​ໃຊ້ເຕັກນິກ ເຕັກ​ໂນ​ໂລ​ຊີ​ທີ່​ທັນ​ສະໄໝ​ໃນ​ການ​ຜະລິດ ເພື່ອ​ສ້າງ​ມູນຄ່າ​ເພີ່ມ​ໃຫ້​ໄມ້​ລາວ​ເປັນ​ທີ່​ຕ້ອງການ​ຂອງ​ຕະຫຼາດ​ພາຍ​ໃນ ແລະ ຕ່າງປະເທດ ທັງ​ເປັນ​ການ​ສົ່ງເສີມ ແລະ ສ້າງ​ຄວາມ​ເຂັ້ມແຂງໃຫ້​ຫົວໜ່ວຍ​ທຸລະ​ກິດ​ເຟີ​ນີ​ເຈີ ໂດຍ​ສະເພາະ ການ​ພັດທະນາ​ສີໄມ້​ລາຍ​ມື​ຂອງ​ຄົນ​ລາວ ສ້າງວຽກ​ເຮັດ​ງານ​ທຳ ແລະ ສ້າງລາຍ​ຮັບ​ໃຫ້​ປະຊາຊົນ ແລະ ປະເທດ​ຊາດ ພາຍ​ໃນ​ງານ​ນອກຈາກ​ຈະ​ມີ​ການວາງສະແດງ​ຜະລິດ​ຕະ​ພັນ​ສິນຄ້າ​ລາຄາ​ຖືກ​ແລ້ວ ຍັງ​ຈະ​ມີ​ການ​ສາທິດ​ຜະລິດ​ເຄື່ອງເຟີ​ນີ​ເຈີ ແກະສະຫຼັກ​ໄມ້ ສະແດງສິນລະປະ​ວັນນະຄະດີ ຈັບ​ສະຫຼາກ​ມອບ​ລາງວັນ ຕິດ​ພັນ​ກັບການ​ຈັດ​ກິດຈະກຳ​ສົ່ງເສີມ​ການທ່ອງ​ທ່ຽວ​ຕື່ມ​ອີກ.

 

 

ຂໍ້ມູນຈາກ:​ວຽງຈັນໃຫມ່

ຄວາມຄິດເຫັນຂອງຜູ້ອ່ານ (0)