GMT+7 24/02/2018 06:49

ຍ້ອງຍໍນັກຮຽນ ທີ່ສ້າງຜົນງານໃຫ້ແກ່ປະເທດຊາດ

 

 

ພິທີ​ຍ້ອງຍໍ​ຊົມເຊີຍ​ນັກຮຽນ ແລະ ຄູ-ອາຈານ ທີ່​ເຂົ້າ​ຮ່ວມແຂ່ງຂັນ​ກິດຈະກຳ​ວິທະຍາສາດ ແລະ ເຕັກ​ໂນ​ໂລ​ຊີ ພາຍ​ໃຕ້​ໂຄງການ​ຕັ້ງ​ຄ້າຍ ແລະ ກອງ​ປະຊຸມກ່ຽວ​ກັບ​ນັກຮຽນ​ທີ່​ມີ​ພອນ​ສະຫວັນ​ທາງ​ດ້ານ​ວິທະຍາສາດ ​ຄັ້ງທີ 9 ຈັດ​ຂຶ້ນ​ວັນ​ທີ 8 ກຸມພາ 2018 ທີ່​ກະຊວງ​ວິທະຍາສາດ ແລະ ເຕັກ​ໂນ​ໂລ​ຊີ ມີ​ທ່ານ ຫຸມພັນ ອິນ​ທະ​ຣາດ ຮອງ​ລັດ​ຖະ​ມົນຕີກະຊວງ​ວິທະຍາສາດ ແລະ ເຕັກ​ໂນ​ໂລ​ຊີ ບັນດາ​ກົມ​ພະ​ແນກຜູ້ອຳນວຍການ ຄູ-ອາຈານ ຜູ້​ປົກຄອງ ແລະ ນັກຮຽນ​ເຂົ້າ​ຮ່ວມ.

ທ່ານ ຄຳ​ເພັດ ວົງ​ດາລາ ຮັກສາ​ການ​ຫົວໜ້າ​ກົມ​ແຜນການ ແລະ ຮ່ວມ​ມື ກະຊວງ​ວິທະຍາສາດ ແລະ ເຕັກ​ໂນ​ໂລ​ຊີ ກ່າວວ່າ: ກິດຈະກຳ​ດັ່ງກ່າວ​ຈັດ​ຂຶ້ນ​ວັນທີ 5-12 ມັງກອນ 2018 ທີ່​ເມືອງຊູ​ວອນ ສ ເກົາຫຼີ ມີ​ນັກຮຽນ ແລະ ຄູ-ອາຈານເຂົ້າ​ຮ່ວມ​ທັງໝົດ 9 ປະເທດ ຄື: ລາວ ກໍາ​ປູເຈຍ ອິນ​ໂດ​ເນ​ເຊຍ ຟິ​ລິບ​ປິນ ສິງກະ​ໂປ ໄຕ້​ຫວັນ ໄທ ຫວຽດນາມ ຈີນ ແລະ ສ ເກົາຫຼີ ເຈົ້າພາບ ​ມີນັກຮຽນ 77 ຄົນ ອາຈານ​ນຳພາ ແລະ ຜູ້​ສັງເກດ​ການ 37 ຄົນ ໃນນັ້ນ ລາວ​ເຮົາ​ມີ​ນັກຮຽນ 8 ຄົນ ແລະ ຄູ 1 ຄົນ ຈາກ​ໂຮງຮຽນກຽດ​ຕິ​ສັກ​ນາໆຊາດ ແລະ ຈາກກະຊວງ​ວິທະຍາສາດ ແລະ ເຕັກໂນ​ໂລ​ຊີ 1 ຄົນ.

ຜ່ານ​ການ​ເຂົ້າ​ຮ່ວມ​ກິດຈະກຳຄົ້ນຄວ້າ​ໃນ​ຫົວຂໍ້​ຕ່າງໆ​ ຕາມພອນ​ສະຫວັນ​ຂອງ​ຕົນ ແລະ ນຳສະເໜີ​ຜົນ​ຂອງ​ການ​ຄົ້ນຄວ້າ​ທີ່​ໄດ້ເລືອກ​ຂຶ້ນ​ມາ​ ໃຫ້​ແກ່​ຄະນະ​ກຳ​ມະການ​ໄດ້​ກວດກາ​ນັກຮຽນ​ລາວ​ສາມາດ​ຍາດ​ມາ​ໄດ້ 1 ຫຼຽນ​ຄຳ (2 ຄົນ) 1 ຫຼຽນ​ເງິນ (3 ຄົນ) ແລະ 1 ຫຼຽນ​ທອງ (3 ຄົນ) ເຫັນ​ວ່າການ​ເຂົ້າ​ຮ່ວມ​ແຂ່ງຂັນ​ຄັ້ງ​ນີ້ ມີຜົນສຳເລັດ​ເປັນ​ຢ່າງ​ສູງ ທີ່​ສາມາດ​ຍາດ​ໄດ້​ລາງວັນ ແລະ ສາມາດ​ເຂົ້າ​ຮ່ວມ​ແຂ່ງຂັນ​ງານ​ວິ​ທະຍາ​ສາດ​ໃນ​ລະດັບ​ພາກ​ພື້ນ ແລະ ສາກົນ ເຊິ່ງ​ໄດ້​ນຳ​ເອົາ​ຊື່​ສຽງ​ມາສູ່​ປະເທດ​ຊາດ ເຮັດ​ໃຫ້​ບັນດາ​ປະເທດ​ອາ​ຊຽນ ແລະ ປະເທດ​ຄູ່ຮ່ວມ​ມື​ ໄດ້​ຮັບ​ຮູ້​ເຖິງ​ຄວາມ​ສາມາດ​ຂອງ​ບັນດາ​ນັກຮຽນ​ຈາກລາວ​ຫຼາຍ​ຂຶ້ນ.

 

 

ຂໍ້ມູນຈາກ: ວຽງຈັນໃຫມ່

ຄວາມຄິດເຫັນຂອງຜູ້ອ່ານ (0)