GMT+7 24/02/2018 06:58

ຫລວງພະບາງທຳລາຍຕູ້ເກມ ຜິດກົດໝາຍ 33 ໜ່ວຍ

 

 

ໃນວັນທີ 6 ກຸມພາ 2018 ນີ້, ພະແນກຖະແຫລງຂ່າວ ວັດທະນະທຳ ແລະ ທ່ອງທ່ຽວ ແຂວງຫລວງພະບາງ ໄດ້ຈັດພິທີທຳລາຍຕູ້ເກມຢອດຫລຽນ ແລະ ຕູ້ເກມການພະນັນ ທີ່ຜິດກົດໝາຍ ຈຳນວນ 33 ໜ່ວຍ. ໃນນັ້ນ ມີຕູ້ເກມຢອດ ຫລຽນນ້ອຍ 8 ໜ່ວຍ, ຕູ້ເກມການພະນັນຂະໜາດກາງ 14 ໜ່ວຍ ແລະ ຕູ້ເກມການພະນັນໃຫຍ່11 ໜ່ວຍ.

            
ທ່ານ ສີສະຫວາດ ຍີ່ລັດໃຈ ຫົວໜ້າຂະແໜງວັດທະນະທຳ ໄດ້ໃຫ້ຮູ້ວ່າ: ຄະນະກຳມາການສະເພາະກິດ ແຂວງຫລວງພະບາງ ໄດ້ສົມທົບກັບພາກສ່ວນກ່ຽວຂ້ອງ ຕັ້ງໜ້າລົງເຄື່ອນໄຫວ ກວດກາ ແລະ ປະຕິບັດໜ້າທີ່ຕາມພາລະບົດບາດ ດ້ວຍຄວາມຮັບຜິດຊອບສູງ ເຊິ່ງໄລຍະຜ່ານມາ ໄດ້ຈັດພິທີທຳລາຍໄປແລ້ວ 3 ຄັ້ງ ແລະ ຄັ້ງນີ້ເປັນຄັ້ງທີ4. ສຳລັບທິດທາງໃນຕໍ່ໜ້າ ຈະໄດ້ປັບປຸງ ແລະ ແກ້ໄຂນິຕິກໍາທີ່ມີຢູ່ ແລ້ວໃຫ້ຮັດກຸມ ແລະ ສອດຄ່ອງກັບການຜັນຂະຫຍາຍ ຕາມສະ ພາບເສດຖະກິດ-ສັງຄົມ ໃນປັດຈຸບັນ, ຈະສືບຕໍ່ເອົາຂໍ້ກໍານົດ, ກົດລະບຽບ ແລະ ນິຕິກໍາຕ່າງໆ ລົງເຜີຍແຜ່ໃຫ້ອໍານາດ ການປົກຄອງບ້ານ, ພາກສ່ວນກ່ຽວຂ້ອງ ແລະ ຜູ້ປະກອບການທຸລະກິດໄດ້ຮັບຮູ້ ແລະ ເຊື່ອມຊຶມ, ເອົາໃຈໃສ່ຕິດຕາມ, ກວດກາ, ຊຸກຍູ້ເຈົ້າຂອງທຸລະກິດ ໃຫ້ມີການເຄື່ອນໄຫວທີ່ຖືກຕ້ອງ.


ພ້ອມກັນນັ້ນ ກໍປະສານສົມທົບກັບ ພາກສ່ວນກ່ຽວຂ້ອງ ໃນການຕິດຕາມກວດກາ ບັນດາຜູ້ເຄື່ອນໄຫວລັກເປີດ ບໍລິການຫ້ອງຫລິ້ນເກມຢອດຫລຽນ ແລະ ເກມການພະນັນ ທີ່ຜິດກົດໝາຍ, ຄຽງຄູ່ກັນນັ້ນ ກໍຈະໄດ້ຄົ້ນຄ້ວາ, ຖອດຖອນ ບົດຮຽນ ກັບພາກສ່ວນຕ່າງໆ ພ້ອມທັງສະຫລຸບລາຍງານ ຜົນການປະຕິບັດງານ ໃຫ້ຂັ້ນເທິງຊາບ ເພື່ອຂໍທິດຊີ້ນໍາຈາກຂັ້ນເທິງ ມາຈັດຕັ້ງປະຕິບັດ ເປັນແຕ່ລະໄລຍະ.

 

 

ຂໍ້ມູນຈາກ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)