GMT+7 21/05/2018 06:33

ກະຕ່າຂອງຂວັນຜະລິດຈາກໄມ້ປ່ອງ ດ້ວຍສີມືຂອງຄົນລາວ

 

 

ວຽກ​ງານ​ຫັດຖະກຳ​ຈັກສານ ເປັນ​ວຽກ​ງານ​ໜຶ່ງ​ທີ່​ຕິດ​ພັນ​ກັບວຽກ​ງານ​ທ່ອງ​ທ່ຽວ ເນື່ອງ​ຈາກຫັດຖະກຳ​ທີ່​ຜະລິດ​ຈາກ​ສີ​ໄມ້​ລາຍມື​ຂອງ​ປະຊາຊົນ​ບັນດາເຜົ່າ​ ສາມາດ​ເປັນ​ເຄື່ອງໃຊ້​ສອຍ ແລະ ເປັນ​ຂອງ​ທີ່​ລະນຶກ​ຂອງຝາກ​ຂອງຕ້ອນ​ໃຫ້​ແຂກ ແລະ ນັກ​ທ່ອງທ່ຽວ​ທັງ​ພາຍ​ໃນ ແລະ ຕ່າງ​ປະເທດ​ໄດ້ ໃນ​ໂອກາດ​ເປີດ​ປີ​ທ່ອງທ່ຽວ​ລາວ 2018 ກຸ່ມ​ຫັດຖະກຳຕ່າງໆ ​ກໍ່​ໄດ້​ຄົ້ນ​ຄິດ​ອອກ​ແບບ​ຜະລິດ​ຕະ​ພັນ​ຫຼາຍ​ຢ່າງ ເພື່ອ​ໃຫ້​ປະຊາ​ຊົນ​ໄດ້​ນຳໄປ​ຜະລິດ​ເປັນ​ສິນຄ້າ ສ້າງ​ລາຍ​ຮັບ​ໃຫ້​ແກ່​ຕົນ​ເອງ ໃນ​ນັ້ນ ກໍ່​ມີ​ກຸ່ມ​ຫັດຖະກຳ​ເມືອງສັງ​ທອງ ນະຄອນຫຼວງ​ວຽງ​ຈັນ ທີ່ໄດ້​ອອກ​ແບບ​ຜະລິດ​ກະຕ່າ​ຂອງຂວັນ​ທີ່​ເປັນ​ສິ່ງ​ໃໝ່ ເຮັດ​ໃຫ້​ຍອດຂາຍ​ສູງ ແລະ ປະຊາຊົນ​ຜູ້​ຜະລິດມີ​ລາຍ​ຮັບ​ເປັນ​ປະຈຳ.

ທ່ານ​ນາງ ບຸນ​ຕອງ ຫົງ​ວິໄລ ເຈົ້າ​ຂອງ​ຫັດຖະກຳເມືອງ​ສັງທອງ ໃຫ້​ຮູ້​ວ່າ: ຫັດຖະກຳ​ເມືອງສັງ​ທອງ ແມ່ນ​ນຳ​ໃຊ້​ໄມ້ປ່ອງຈາກ​ທຳ​ມະ​ຊາດ (ໄມ້ໄຜ່) ມາ​ຜະລິດ​ເປັນ​ເຄື່ອງ​ຈັກສານ ເພື່ອ​ໃຊ້ສອຍ ແລະ ເປັນ​ຂອງຂວັນ ຈາກການ​ຜະລິດ​ມາ​ຫຼາຍ​ປີ​ເຫັນ​ວ່າ ຜະລິດ​ຕະ​ພັນ​ທີ່​ຜະລິດ​ຈາກ​ສີໄມ້​ລາຍ​ມື​ຂອງ​ປະຊາຊົນ ​ແມ່ນເປັນ​ທີ່​ຍອມຮັບ​ຈາກ​ລູກ​ຄ້າ ກໍ່​ຄືສັງຄົມ ດັ່ງນັ້ນ ມາ​ຮອດ​ປີ 2014 ຫັດຖະກຳ​ເມືອງ​ສັງ​ທອງ ​ຈຶ່ງ​ໄດ້ຮັບ​ກາ​ໝາຍ​ສິນຄ້າ​ໜຶ່ງ​ເມືອງ​ໜຶ່ງຜະລິດ​ຕະ​ພັນ​ແຫ່ງ​ຊາດ ຫຼື ໂອດ໋ອບ ຈາກ​ກົມ​ສົ່ງເສີມ ແລະ ພັດທະ​ນາ​ສິນຄ້າ ກະຊວງ​ອຸດ​ສາ​ຫະກຳ ແລະ ການ​ຄ້າ ສິ່ງ​ທີ່​ພົ້ນ​ເດັ່ນມາ​ຮອດ​ປີ 2017 ເປັນຕົ້ນ​ມາ ໄດ້ມີ​ການ​ປັບປຸງ​ສິນຄ້າ ແລະ ຄຸ​ນະພາບ​ຜະລິດ​ຕະ​ພັນ ນອກຈາກ​ຜະລິດ​ຕາມ​ແບບ​ທີ່​ຕົນ​ເອງ​ຄົ້ນ​ຄິດແລ້ວ ຍັງ​ຜະລິດ​ຕາມ​ແບບ​ລູກຄ້າ​ສັ່ງ​ຕື່ມ​ອີກ ມາ​ຮອດ​ປັດຈຸບັນ ມີ​ຫຼາຍ​ກວ່າ 30 ລາຍການ ໂດຍໄດ້​ເລັ່ງ​ຜະລິດ​ແບບ​ທີ່​ຜູ້​ຊົມໃຊ້​ສົນໃຈ​ທັງ​ຄົນ​ລາວ ແລະ ຄົນ​ຕ່າງ​ປະເທດ ສິນຄ້າ​ທີ່​ລູກ​ຄ້າ​ສົນໃຈ​ຫຼາຍກວ່າ​ໝູ່​ແມ່ນ​ປະເພດ ໂຕະຕັ່ງ​ກິນເຂົ້າ ໂຕະ​ໂຊ​ຟາ ແລະ ກະຕ່າຂອງຂວັນ ປັດຈຸບັນ ມີ 8 ຄອບຄົວ ທີ່​ເປັນ​ສະມາຊິກ​ຈັກສານດ້ວຍ​ມື ຜ່ານ​ມາ​ໄດ້​ມີ​ການ​ປັບປຸງສີສັນແບບ​ຮູບຊົງ ແລະ ຄຸ​ນະພາບໄດ້​ແລ້ວ 80% ທີ່​ສາມາດຊົມໃຊ້​ໄດ້ ອັນ​ໄດ້​ສ້າງ​ວຽກ​ເຮັດງານ​ທຳ​ໃຫ້​ປະຊາຊົນ ສະເພາະກະຕ່າ​ຂອງຂວັນ​ສາມາດ​ຜະລິດໄດ້​ຫຼາຍ​ພັນ​ໜ່ວຍ ໂດຍ​ຂ້າ​ພະເຈົ້າ​ເອງ​ເປັນ​ຜູ້​ອອກ​ແບບ​ໃຫ້​ສະມາ​ຊິກ ເຊິ່ງ​ເປັນ​ທີ່​ສົນໃຈ​ຂອງ​ລູກຄ້າ​ຫຼາຍ​ທີ່​ສຸດ ເຮັດ​ໃຫ້​ຍອດ​ຂາຍກະຕ່າ​ຂອງຂວັນ​ນຳ​ໜ້າ ສ່ວນລູກ​ຄ້າ​ມີ​ທັງ​ຄົນ​ຕ່າງປະເທດ ແລະ ຄົນ​ລາວ​ທີ່​ມີ​ຕົວ​ເລກ​ຍອດຊື້​ເທົ່າ​ກັນ ຖ້າ​ທຽບໃສ່​ເມື່ອ​ກ່ອນເຫັນ​ວ່າ ຄົນ​ລາວ​ກໍ່​ຊື້​ຫຼາຍ​ຂຶ້ນ ເຫັນ​ໄດ້​ຄຸນຄ່າ​ຂອງ​ຜະລິດ​ຕະ​ພັນຈາກ​ທຳ​ມະ​ຊາດ​ທີ່​ແປ​ຮູບ​ເປັນ​ຜະລິດ​ຕະ​ພັນ​ທີ່​ງົດ​ງາມ.

ທ່ານ​ນາງ ບຸນ​ຕອງ ຫົງ​ວິໄລ ກ່າວ​ຕື່ມ​ວ່າ: ເຖິງ​ວ່າ​ຜະລິດ​ຕະພັນ​ຫັດຖະກຳ​ໄມ້ປ່ອງ​ຈາກ​ເມືອງສັງ​ທອງ ​ຈະ​ມີ​ຍອດ​ຂາຍ​ດີ​ຂຶ້ນ​ກໍ່ຕາມ ແຕ່​ກໍ່​ມີ​ສິ່ງ​ທ້າ​ທາຍ ເປັນຕົ້ນ ກໍ່​ແມ່ນ​ບັນຫາ​ການ​ຜະລິດ​ທີ່ບໍ່​ທ່ວງ​ທັນ​ກັບ​ຄວາມ​ຕ້ອງການຂອງ​ຕະຫຼາດ ເນື່ອງ​ຈາກ​ປັດ​ຈຸບັນ ຕະຫຼາດ​ມີ​ຄວາມ​ຕ້ອງການສູງ​ທຽບໃສ່​ເມື່ອ​ກ່ອນ ແຕ່​ຜູ້​ຜະລິດ​ຍັງ​ມີ​ໜ້ອຍ ນອກ​ນີ້ຍັງ​ຜະລິດດ້ວຍ​ມື​ບໍ່​ທັນ​ເປັນ​ໂຮງງານ​ເທື່ອ ແລະ ໃນ​ອະນາຄົດ​ມີ​ແຜນ​ຈະສ້າງ​ເປັນ​ໂຮງງານ​ເພື່ອ​ຜະລິດເປັນ​ຈຳນວນ​ຫຼາຍ ແຕ່​ປັດຈຸບັນທຶນຮອນ​ທີ່​ຈະ​ສ້າງ​ເປັນ​ໂຮງງານຍັງ​ບໍ່​ທັນ​ພຽງພໍ ຢາກ​ໃຫ້​ພາກ​ລັດຊ່ວຍ​ທຶນຮອນ​ສ້າງ​ໂຮງງານ ແລະ ຊ່ວຍ​ສະຖານທີ່​ຂາຍ​ຢູ່​ຊັ້ນ 5 ຕຶກ​ໃໝ່​ສູນ​ການ​ຄ້າ​ໄອ​ເຕັກ​ມໍ ສ່ວນ​ຕະຫຼາດ​ຂາຍ​ປະຈຳ​ຢູ່​ບ້ານເພຍ​ລາດ ເມືອງ​ສັງ​ທອງ ຊັ້ນສອງ​ສູນ​ການ​ຄ້າ​ໄອ​ເຕັກ​ມໍ ສວນອິນ​ແປງ​ຂາຍ​ຕາມ​ງານ​ວາງ​ສະແດງ​ສິນຄ້າ ແລະ ສົ່ງ​ຂາຍ​ໃຫ້ແມ່​ຄ້າ​ຢູ່​ບ້ານ​ດົງ​ນາ​ທອງ.

 

 

ຂໍ້ມູນຈາກ: ວຽງຈັນໃຫມ່

ຄວາມຄິດເຫັນຂອງຜູ້ອ່ານ (0)