GMT+7 21/05/2018 06:32

ລົງທຶນ 42 ຕື້ກວ່າກີບ ກໍ່ສ້າງຕະຫຼາດສົມຫວັງ

 

 

ພິທີ​ວາງ​ສີ​ລາ​ລຶກ​ໂຄງການ​ກໍ່ສ້າງ​ຕະຫຼາດ​ສົມ​ຫວັງ ບ້ານ​ຫາດຊາຍ​ຂາວ ເມືອງ​ຫາ​ຊາຍ​ຟອງ ນະຄອນຫຼວງ​ວຽງ​ຈັນ ຈັດ​ຂຶ້ນ​ວັນທີ 27 ມັງກອນ 2017 ໃຫ້​ກຽດເຂົ້າ​ຮ່ວມ​ຂອງ​ທ່ານ​ພົນ​ຕີ ທອງລອຍ ສິລິ​ວົງ ເຈົ້າແຂວງ​ໄຊ​ສົມບູນ ທ່ານ ແກ່ນ ວໍລະ​ສານ ວ່າການ​ເຈົ້າເມືອງ​ຫາດ​ຊາຍ​ຟອງ ທ່ານ​ພົນ​ຈັດຕະວາ ຄຳ​ຫຼ້າ ໄຊຍະ​ສຸກ ຫົວໜ້າ​ການເມືອງ​ວິ​ທະຍາ​ຄານ​ປ້ອງ​ກັນ​ຊາດ ພ້ອມ​ດ້ວຍຜູ້ຕາງໜ້າ​ຈາກ​ກະຊວງ ພະ​ແນກການ​ທີ່​ກ່ຽວຂ້ອງ ນາຍບ້ານ ແລະ ແຂກ​ຖືກ​ເຊີນ​ເຂົ້າ​ຮ່ວມ.

ທ່ານ ສົມ​ຫວັງ ມາ​ລິ​ຍາ ຜູ້​ອຳນວຍ​ການຕະຫຼາດ​ສົມ​ຫວັງ ກ່າວ​ວ່າ: ການ​ສ້າງ​ຕະຫຼາດ​ສົມຫວັງ ​ເພື່ອ​ສົ່ງເສີມ​ຊ່ວຍເຫຼືອ​ປະຊາ​ຊົນ​ຊາວ​ຄ້າຂາຍ ຊາວ​ກະ​ສິກອນ​ຢູ່​ພາຍ​ໃນ​ເມືອງ​ຫາດ​ຊາຍຟອງ ກໍ່​ຄືບັນດາ​ເມືອງ​ອ້ອມ​ຂ້າງ ນະຄອນຫຼວງ​ວຽງ​ຈັນ ຕ່າງແຂວງ ແລະ ຕ່າງປະເທດ ທີ່​ມີເງື່ອນໄຂ​ນຳ​ຜະລິດ​ຕະ​ພັນ​ຂອງຕົນ​ເອງ​ມາ​ວາງ​ຂາຍ ທັງ​ເປັນການ​ຊຸກຍູ້​ສົ່ງເສີມ​ຜະລິດ​ກະ​ສິກຳ ອຸດສາຫະກຳ-ຫັດຖະກຳ ອຸດສາ​ຫະ​ກຳ​ປຸງ​ແຕ່ງ ແລະ ຫົວຄິດປະດິດ​ສ້າງ​ຂອງ​ປະຊາຊົນ ຜູ້​ປະກອບ​ການ​ພາຍ​ໃນ​ເມືອງ​ໃຫ້​ມີການ​ຂະຫຍາຍຕົວ ກາຍເປັນ​ຜະລິດ​ສິນຄ້າ​ທີ່​ມີ​ຄຸນະພາບ​ສູງ ສາມາດ​ແຂ່ງຂັນ​ກັບ​ຕະຫຼາດ​ໄດ້​ໃນປັດຈຸບັນ ພ້ອມ​ນັ້ນ ເປັນ​ການ​ໂຄສະ​ນາ​ການ​ຕະຫຼາດ ການ​ຈຳໜ່າຍ​ສິນຄ້າ​ພາຍ​ໃນ ສ້າງ​ຕາໜ່າງ​ຮອງ​ຮັບ​ຜະລິດ​ຕະ​ພັນ​ສິນຄ້າ​ໃຫ້​ເປີດ​ກວ້າງ ແລະ ເພື່ອແລກປ່ຽນ​ບົດຮຽນ ປະສົບ​ການ ເຕັກນິກ​ການ​ຜະລິດ ແນໃສ່​ເຮັດໃຫ້​ຄຸນະພາບ​ດີ​ຂຶ້ນ ແລະ ເປັນການ​ດຶງ​ດູດ​ຄວາມ​ສົນໃຈ ການລົງທຶນ​ເຂົ້າ​ມາ​ພັດທະນາ​ເມືອງຫາດ​ຊາຍ​ຟອງ​ໃຫ້​ຂະຫຍາຍຕົວຂຶ້ນ ເຊິ່ງ​ຕະຫຼາດ​ດັ່ງກ່າວ​ມີ​ເນື້ອທີ່​ທັງ​ໝົດ 26.520 ຕາ​ແມັດ ມູນຄ່າ​ຈົດ​ທະບຽນ 1 ຕື້​ກີບ ມູນ​ຄ່າການ​ກໍ່ສ້າງ​ຄາດ​ຄະເນ ປະມານ 42,1 ຕື້​ກີບ ເລີ່ມ​ລົງມື​ກໍ່ສ້າງ​ວັນທີ 1 ມັງກອນ 2018 ປະກອບ​ມີໂຊນ​ຈອດ​ລົດ​ສອງ​ຈຸດ ທາງ​ເຂົ້າອອກ 3 ທາງ ອາຄານ​ດ້ານ​ໜ້າ ຂາຍ​ພືດ​ຜັກ ຂາຍເຄື່ອງ​ຂອງ​ບັນດາ 17 ແຂວງ​ທົ່ວ​ປະເທດ ຂາຍເຄື່ອງໃຊ້​ສອຍ​ຊີວິດ​ປະຈຳ​ວັນ ຂາຍ​ອາຫານ​ສຸກ ເຄື່ອງນຸ່ງ​ຫົ່ມ ຊີ້ນ​ໝູ ງົວ ຄວາຍ ເປັດ ໄກ່ ແລະ ໂຊນຂາຍເຄື່ອງ​ທະເລ ແລະ ປາ ສຳລັບ​ໂຄງການ​ກໍ່ສ້າງ​ຈະ​ໃຫ້​ສຳເລັດ​ວັນ​ທີ 1 ມິຖຸນາ 2019.

 

 

ຂໍ້ມູນຈາກ: ວຽງຈັນໃຫມ່

 

ຄວາມຄິດເຫັນຂອງຜູ້ອ່ານ (0)