GMT+7 21/05/2018 06:35

1 ປີ ຜ່ານມາອົງການໄອຍະການປະຊາຊົນສູງສຸດມີຜົນສຳເລັດຫລາຍດ້ານ

 

 

ອົງການ​ໄອ​ຍະ​ການ​ປະຊາຊົນ​ສູງ​ສຸດ ​ໄດ້​ຈັດ​ກອງ​ປະຊຸມ​ສະຫລຸບ ​ການ​ເຄື່ອນ​ໄຫວ​ວຽກ​ງານ​​ ໄອ​ຍະ​ການ​ປະຊາຊົນ​ທົ່ວ​ປະ​ເທດ ປະຈຳ​ປີ 2017 ​ແລະ ວາງ​ທິດ​ທາງ​ແຜນການ​ເຄື່ອນ​ໄຫວ​ ວຽກ​ງານ​ປະຈຳ​ປີ 2018 ​ໃນ​ວັນ​ທີ 25 ມັງກອນ ຢູ່​ນະຄອນຫລວງ​ວຽງ​ຈັນ, ​ໂດຍ​ມີ​ ທ່ານ ຄຳ​ສານ ສຸ​ວົງ  ຫົວໜ້າອົງການ​ໄອ​ຍະ​ການ​ປະຊາຊົນ​ສູງ​ສຸດ, ບັນດາ​ການ​ນຳ​ຂອງ​ ກຳມາ​ທິການ​ຍຸຕິ​ທຳ​ ສະພາ​ແຫ່ງ​ຊາດ, ສານ​ປະຊາຊົນ​ສູງ​ສຸດ, ການ​ນຳ​ກະຊວງ, ອົງການ​ອ້ອມ​ຂ້າງ​ສູນ​ກາງ, ການ​ນຳ​ຂອງ​ບັນດາ​ແຂວງ-ນະ ຄອນຫລວງ ​ແລະ ພາກສ່ວນ​ກ່ຽວຂ້ອງ ​ເຂົ້າ​ຮ່ວມ.


ໃນໂອກາດ​ດັ່ງກ່າວ, ທ່ານ ​ໄຊຊະນະ ​ໂຄດ​ພູທອນ ຮອງ​ຫົວໜ້າອົງການ​ ໄອ​ຍະ​ການ​ປະຊາຊົນ​ສູງ​ສຸດ ​ໄດ້​ຂຶ້ນ​ຜ່ານ​ຮ່າງ​ບົດ​ສະຫລຸບ ​ການ​ເຄື່ອນ​ໄຫວ​ວຽກງານ ​ຮອບດ້ານ​ ປະຈຳ​ປີ 2017, ​ໂດຍ​ມີ​ບາງ​ຕ​ອນສຳຄັນ​ໃຫ້​ຮູ້​ວ່າ: ​ໃນ​​ໄລຍະ 1 ປີ ຜ່ານ​ມາ ອົງການ​ໄອ​ຍະ​ການ​ປະຊາຊົນ​ສູງ​ສຸດ ​ໄດ້​ມີ​ຜົນສຳ​ເລັດ​ໃນ​ຫລາຍ​ດ້ານ ​ອັນ​ພົ້ນ​ເດັ່ນ ສາມາດ​ສ້າງຕັ້ງ​ອົງການ​ໄອ​ຍະ​ການ​ປະຊາຊົນ​ເຂດ ຕື່ມ 2 ​ເຂດ ຄື: ​ເຂດ 1 ​ແຂວງ​​ໄຊ​ສົມບູນ ​ແລະ ​ເຂດ 3 ​ແຂວງ​ຈຳປາ​ສັກ. ມາ​ຮອດ​ງວດ IV ປີ 2017 ມີ​ພະນັກ​ງານ-ລັດ ຖະກອນ 1.692 ຄົນ, ຍິງ 599 ຄົນ. ​ໃນ​ນີ້, ສັງກັດ​ຢູ່​ອົງການ ​ໄອ​ຍະ​ການ​ປະຊາຊົນ​ສູງ​ສຸດ 236 ຄົນ, ຍິງ 97 ຄົນ ກວມ 13,9%, ອົງການ​ປະຊາຊົນ​ແຂວງ-ນະຄອນຫລວງ 537 ຄົນ, ຍິງ 214 ຄົນ ກວມ 31,73%, ອົງການ​ໄອ​ຍະ​ການ​ປະຊາຊົນ​ໃນ​ທົ່ວ​ປະ​ເທດ ​ໄດ້​ຮັບ​ຄຳ​ຮ້ອງ​ຂໍ​ຕິດຕາມ​ກວດກາ​ ການຈັດ​ຕັ້ງ​ປະຕິບັດ​ຄຳ​ຕັດສິນ​ຂອງ​ສານ ຈຳນວນ 349 ​ເລື່ອງ, ​ແກ້​ໄຂ​ແລ້ວ 293 ​ເລື່ອງ, ຍັງ​ພວມ​ຄົ້ນຄວ້າ 56 ​ເລື່ອງ. ຜ່ານ​ມາ​ໄດ້​ຮັບ​ຄະດີ​ອາຍາ 18.040 ​ເລື່ອງ, ປະຕິບັດ​ສຳ​ເລັດ 1.162 ​ເລື່ອງ ​ເທົ່າ​ກັບ 9,91%, ພວມ​ປະຕິບັດ 16.252 ​ເລື່ອງ ​ເທົ່າ​ກັບ 90,08%, ຄະດີ​ແພ່ງ 6.886 ​ເລື່ອງ, ປະຕິບັດ​ສຳເລັດ 1.162 ​ເລື່ອງ ​ເທົ່າ​ກັບ 16,87%, ພວມ​ປະຕິບັດ 5.724 ​ເລື່ອງ ​ເທົ່າ​ກັບ 83,12%. ພ້ອມ​ດຽວ​ກັນ​ນັ້ນ, ​ຖັນ​ແຖວ​ສະມາຊິກ​ພັກ-ພະນັກງານ ​ໃນ​ທົ່ວ​ປະ​ເທດ ລະບົບ​ອົງການ​ໄອ​ຍະ​ການ​ປະຊາຊົນ ​ໄດ້​ມີ​ຄວາມ​ໜັກ​ແໜ້ນ​ ທາງ​ດ້ານ​ຄຸນ​ທາດ​ການ​ເມືອງ, ມີ​ຄວາມ​ຮັບຜິດຊອບ​ຕໍ່ໜ້າ​ທີ່​ວຽກ​ງານ, ມີ​ສະຕິ​ຕໍ່​ການຈັດ​ຕັ້ງ ​ປະຕິບັດ​ສິດ ​ແລະ ໜ້າ​ທີ່​ ດ້ວຍ​ຄວາມ​ສື່​ສັດ​ບໍລິສຸດ, ລະບົບ​ການຈັດ​ຕັ້ງ​ ຂອງ​ອົງການ​ໄອ​ຍະ​ການ ​ປະຊາຊົນທຸກ​ຂັ້ນ ​ໄດ້​ຮັບ​ການ​ປັບປຸງ​ໃຫ້​ມີ​ຄວາມ​ເຂັ້ມ​ແຂງ​ກວ່າ​ເກົ່າ, ການ​ພັດທະນາ​ບຸກຄະລາ​ກອນ ​ໄດ້​ຮັບ​ການ​ຍົກ​ສູງ​ຂຶ້ນ​ທາງ​ດ້ານ​ຈຳນວນ ​ແລະ ຄຸນ​ນະພາ​ບ.

​ພ້ອມ​ນັ້ນ, ​ໃນ​ກອງ​ປະຊຸມຍັງ​ໄດ້​ ພ້ອມ​ກັນ​ຄົ້ນຄວ້າ ​ແລະ ປະກອບ​ຄຳ​ເຫັນສຸມ​ໃສ່​ ບັນດາ​ເນື້ອ​ໃນ ​ແລະ ວຽກ​ງານ​ທີ່​ສຳຄັນ, ບົດ​ສະຫລຸບ​ຕີ​ລາຄາ​ປະ​ເມີນ​ຜົນ​ ການຈັດ​ຕັ້ງ​ເຄື່ອນ​ໄຫວ ​ວຽກ​ງານ​ຮອບດ້ານ​ໃນ​ໄລຍະ 1 ປີ ຜ່ານ​ມາ, ຈຸດ​ອ່ອນ, ຂໍ້ຄົງຄ້າງ ​ແລະ ທິດ​ທາງ​ແຜນການ​ພັດທະນາ​ ວຽກງານ​ອົງການ​ໄອ​ຍະ​ການ​ ປະຊາຊົນ​ປະຈຳ ​ປີ 2018 ​ແລະ ອື່ນໆ.

 

 

ຂໍ້ມູນຈາກ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)