GMT+7 21/05/2018 06:35

GIZ ສະໜັບສະໜູນການສ້າງລັດ ທີ່ປົກຄອງດ້ວຍກົດໝາຍ

 

 

ວັນ​ທີ 18 ມັງກອນ 2018 ທີ່ໂຮງແຮມ​ຄາວ​ພລາ​ຊາ ນະຄອນ​ຫຼວງ​ວຽງ​ຈັນ ກົມ​ແຜນການ ແລະ ການ​ຮ່ວມ​ມື ກະຊວງ​ພາຍໃນ ຮ່ວມ​ກັບອົງການ ຈີ​ໄອ​ແຊັດ (GIZ) ຈັດ​ພິທີ​ລົງ​ນາມ​ການ​ຈັດຕັ້ງ​ປະຕິບັດ ​ແຜນການ​ມີ​ສ່ວນຮ່ວມ​ຂອງ​ປະຊາຊົນ​ຕໍ່​ວຽກ​ງານການ​ປົກຄອງ​ທີ່​ດີ ແລະ ການສ້າງ​ລັດ​ທີ່​ປົກຄອງ​ດ້ວຍ​ກົດໝາຍ ລະຫວ່າງ​ລັດຖະບານ ​ສປປ ລາວ ຕາງໜ້າ​ໂດຍ​ກະຊວງ​ພາຍ​ໃນ ໃນ​ນາມ​ຕາງໜ້າ​ໃຫ້​ບັນດາ​ພາກສ່ວນ​ຈັດ​ຕັ້ງ​ປະຕິບັດ​ໂຄງການ ລົງ​ນາມ​ໂດຍ​ທ່ານ ມີ​ສິດ ແກ້ວປັນຍາ ຫົວໜ້າ​ກົມ​ແຜນການ ແລະ ການ​ຮ່ວມ​ມື ກະຊວງ​ພາຍໃນ ແລະ ທ່ານ ​ໂທ​ມັດສ ລາ​ບານ ຜູ້ອຳນວຍການ​ອົງການ GIZ ປະຈຳ​ລາວ ຕາງໜ້າ​ຜູ້​ໃຫ້​ທຶນຈາກສະຫະພາບ​ເອີ​ຣົບ ລັດຖະບານເຢຍ​ລະ​ມັນ ແລະ ລັດຖະບານ ປະເທດ​ສະ​ວິດ ໂດຍ​ມີ​ທ່ານ ຄຳ​ມູນ ວິ​ພົງ​ໄຊ ຮອງ​ລັດ​ຖະ​ມົນ​ຕິກະຊວງ​ພາຍ​ໃນ ທ່ານ​ເອກ​ອັກ​ຄະລັດ​ຖະ​ທູດ​ສະຫະພາບ​ເອີ​ຣົບ ປະຈຳ​ລາວ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ແຜນການ​ມີ​ສ່ວນ​ຮ່ວມ​ຂອງປະຊາຊົນ​ຕໍ່​ວຽກ​ງານ​ການ​ປົກຄອງ​ທີ່​ດີ ແລະ ການ​ສ້າງ​ລັດ​ທີ່ປົກຄອງ​ດ້ວຍ​ກົດໝາຍ ໄດ້​ຮັບ​ທຶນສະໜັບສະໜູນ ມູນ​ຄ່າ 17 ລ້ານເອີ​ໂຣ ປະມານ 172 ຕື້​ກວ່າ​ກີບ ໄລຍະ​ປະຕິບັດ​ງານ 2017-2020 ເພື່ອ​ສົ່ງເສີມ​ການ​ມີ​ສ່ວນຮ່ວມ​ຂອງ​ປະຊາຊົນ​ ຕໍ່​ວຽກ​ງານພັດທະນາ​ເສດຖະກິດ-ສັງຄົມແຫ່ງ​ຊາດຂອງ​ລັດຖະບານ ວຽກງານ​ປົກຄອງ​ທີ່​ດີ ດ້ານ​ສິດທິ​ມະນຸດ ແລະ ການ​ສ້າງ​ລັດ​ແຫ່ງ​ກົດໝາຍ ​ຕາມ​ແນວທາງ​ນະໂຍບາຍ ແລະ ແຜນ​ຍຸດ​ທະ​ສາດ​ຂອງ​ລັດຖະ​ບານ ແຜນ​ງານ​ດັ່ງກ່າວ​ປະກອບ​ມີ​ພາກສ່ວນ​ຈັດ​ຕັ້ງ​ປະຕິບັດຫຼັກ ຄື: ສະພາ​ແຫ່ງ​ຊາດ ກະຊວງ​ຍຸຕິ​ທຳ ກະຊວງ​ການ​ຕ່າງ​ປະເທດ ກະຊວງ​ພາຍ​ໃນ ແລະ ການ​ປະກອບສ່ວນ​ຂອງ​ອົງການຈັດ​ຕັ້ງ​ສັງຄົມ.

ຈຸດປະສົງ​ສະເພາະ​ສຳລັບ​ແຕ່ລະ​ຂົງເຂດ ເພື່ອ​ປັບປຸງ​ສະພາບແວດ​ລ້ອມ ແລະ ສ້າງ​ຄວາມອາດ​ສາມາດ​ໃຫ້​ແກ່​ກະຊວງພາຍ​ໃນ ກ່ຽວ​ກັບ​ການ​ມີ​ສ່ວນຮ່ວມ​ຂອງ​ອົງ​ການຈັດຕັ້ງ​ສັງຄົມ ເຂົ້າ​ໃນ​ວຽກ​ງານ​ການ​ປົກຄອງ ແລະ ການ​ພັດທະນາ​ແບບ​ຍືນ​ຍົງ ສ້າງ​ຄວາມ​ອາດ​ສາມາດ​ໃນ​ການປຶກສາ ການ​ສ້າງ​ກົດໝາຍ ແລະ ການ​ປະຕິບັດ​ພາລະ​ບົດບາດ​ໜ້າທີ່​ຂອງ​ສະພາ​ແຫ່ງ​ຊາດ ແລະ ເພື່ອ​ສະໜັບສະໜູນ​ໃຫ້​ກະຊວງຍຸຕິ​ທຳ ແລະ ກະຊວງ​ການ​ຕ່າງປະເທດ ກ່ຽວ​ກັບ​ການ​ສົ່ງເສີມການ​ປະຕິບັດ​ພັນທະ​ສາກົນ ກ່ຽວກັບ​ວຽກ​ງານ​ສິດທິ​ມະນຸດ ແລະ ການ​ສ້າງ​ລັດ​ແຫ່ງ​ກົດໝາຍຂອງ ​ສປປ ລາວ ແລະ ທີ່​ສຳຄັນແມ່ນເພື່ອ​ພັດທະນາ​ເສດຖະກິດ-ສັງຄົມ​ແຫ່ງ​ຊາດ 5 ປີ ລວມ​ທັງເປັນ​ການ​ສະໜັບສະໜູນ​ໃຫ້​ແກ່ການ​ປະຕິບັດ​ເປົ້າ​ໝາຍ​ພັດທະນາແບບ​ຍືນ​ຍົງ​ຂອງ ​ສປປ ລາວ.

 

 

ຂໍ້ມູນຈາກ: ວຽງຈັນໃຫມ່

ຄວາມຄິດເຫັນຂອງຜູ້ອ່ານ (0)