GMT+7 23/01/2018 07:19

ຍີ່ປຸ່ນປະທ້ວງຈີນ ລ່ອງເຮືອເຂົ້າໃກ້ຫມູ່ເກາະເຊນກາກຸ

 

 

ລັດຖະບານຍີ່ປຸ່ນ ເຊີນເອກອັກຄະລາຊະທູດຈີນເຂົ້າພົບ ຫລັງເຮືອຟຣິເກດຂອງອີກຝ່າຍລ່ອງເຂົ້າໃກ້ຫມູ່ເກາະພິພາກໃນທະເລຈີນຕາເວັນອອກ

 

ສຳນັກຂ່າວຕ່າງປະເທດລາຍງານຈາກກຸງໂຕກຽວ ປະເທດຍີ່ປຸ່ນເມື່ອວັນທີ 12ມັງກອນວ່າ: ກະຊວງການຕ່າງປະເທດຍີ່ປຸ່ນອອກຖະແຫລງການວ່າ: ທ່ານຊິນສຶເກະ ຊຶກິຍາມະ ລັດຖະມົນຕີກະຊວງການຕ່າງປະເທດ ແລະ ທ່ານເຄນຈິ ຄານາຊຶງິ ຜູ້ອຳນວຍການສຳນັກງານກິດຈະການເອເຊຍ ແລະ ໂອເຊຍເນຍ ເຊີນທ່ານເສີງ ຫຍົ່ງຫົວ ເອກອັກຄະລາຊະທູດຈີນປະຈຳກຸງໂຕກຽວ ເຂົ້າພົບເມື່ອວັນພະຫັດທີ່ຜ່ານມາ ເພື່ອຫາລື ແລະ ເປັນການສະແດງຄວາມວິຕົກກັງວົນ ຂອງຝ່າຍຍີ່ປຸ່ນຫລັງເຮືອຟຣິເກດລຳນື່ງຂອງກອງທັບປົດປ່ອຍປະຊາຊົນຈີນ (ພີແອລເອ) ລ່ອງເຂົ້າມາໃກ້ກັບຫມູ່ເກາະພິພາກລະຫວ່າງສອງປະເທດທີ່ຕັ້ງຢູ່ໃນທະເລຈີນຕາເວັນອອກ

 

ທັງນີ້ເນື້ອຫາໃນຖະແຫລງການຂອງກະຊວງການຕ່າງປະເທດຍີ່ປຸ່ນລະບຸວ່າ: ເຮືອຂອງຈີນບໍ່ໄດ້ລະເມີດນ່ານນໍ້າ ແລະ ເອກອັກຄະລາຊະທູດຈີນສະແດງທ່າທີຕໍ່ເຫດການທີ່ເກີດຂື້ນ ດ້ວຍການຍໍ້າກຳມະສິດຂອງລັດຖະບານປັກກິ່ງເຫນືອ ຫມູ່ເກາະແຫ່ງນັ້ນ ທີ່ມີຊື່ໃນພາສາຈີນວ່່າ: ຕຽວຫຍູ ນອກຈາກນີ້ຍັງຖືເປັນຄັ້ງທຳອິດນັບຕັ້ງແຕ່ເດືອນມິຖຸນາ 2559 ທີ່ເຈົ້າຫນ້າທີ່ລະດັບສູງຂອງກະຊວງການຕ່າງປະເທດຍີ່ປຸ່ນເຊີນເອກອັກຄະລາຊະທູດຈີນເຂົ້າພົບເພື່ອຫາລືເລື່ອງນີ້ ຫລັງຄວາມສຳພັນລະດັບທະວີພາຄີຕຶງຄຽດຕັ້ງແຕ່ປີ 2555ເປັນຕົ້ນມາຈາກການທີ່ລັດຖະບານໂຕກຽວສະໄຫມນາຍົກລັດຖະມົນຕີໂຍຊິຮິໂກະ ໂນດະ ຊື້ເກາະຍ່ອຍ 3ແຫ່ງ ຂອງຫມູ່ເກາະເຊນກາກຸ

 

ຂະນະທີ່ຂໍ້ມູນຈາກກະຊວງກະລາໂຫມຍີ່ປຸ່ນລະບຸວ່າ: ເຮືອກວດການຂອງຍີ່ປຸ່ນພົບການເຄື່ອນໄຫວຂອງເຮືອຟຣິເກດຊັ້ນຈຽງໄຄ2 ຂອງພີແອລເອ ເຊິ່ງມີລະດັບວາງຂັບນໍ້າປະມານ 4,000ຕັນ ລ່ອງເຂົ້າມາໃນບໍລິເວນຫມູ່ເກາະເຊນກາກຸຍ່າງ ຫນ້ອຍ 2ເທື່ອ ລະຫວ່າງວັນພຸດເຖິງວັນພະຫັດທີ່ຜ່ານມາ ແຕ່ຍືນຍັນບໍ່ມີການລຸລໍ້ານ່ານນໍ້າເກີດຂື້ນ ດ້ານທ່ານລູ່ ຄັງ ໂຄສົກກະຊວງການຕ່າງປະເທດຈີນກ່າວຂື້ນເມືອ່ວັນພະຫັດວ່າ: ເຮືອຕຽງໄຄ2 ພຽງປະຕິບັດພາລະກິດສັງເກດການ ຄວາມເຄື່ອນໄຫວຂອງຝ່າຍຍີ່ປຸ່ນເທົ່ານັ້ນ

 

 

 

ຂໍ້ມູນຈາກ: ເດລິນີວ

ຄວາມຄິດເຫັນຂອງຜູ້ອ່ານ (0)