GMT+7 23/01/2018 07:17

ມຽນມາ ແຜ່ນດິນໄຫວຮຸນແຮງ 6.0ແມັກນິຈູດ

 

 

ເກີດແຜ່ນດິນໄຫວຮຸນແຮງ 6.0ແມັກນິຈູດ ບໍລິເວນຕອນກາງຂອງມຽນມາ ເມື່ອຊ່ວງຕອນເຊົ້າມືດຂອງວັນສຸກຕາມເວລາທ້ອງຖິ່ນ ເບື້ອງຕົ້ນຜູ້ຊ່ຽວຊານປະເມີນມີແນວໂນ້ມຕໍ່າທີ່ຈະເກີດຄວາມເສຍຫາຍ ເພາະເປັນພື້ນທີ່ທີ່ມີຄົນອາໄສ ຢູ່ຫນ້ອຍ

 

ສຳນັກຂ່າວຕ່າງປະເທດລາຍງານຈາກເມືອງຍ່າງກຸ້ງ ປະເທດມຽນມາ ເມື່ອວັນທີ 12ມັງກອນວ່າ: ສຳນັກງານສຳຫລວດທໍລະນີວິທະຍາສະຫະລັດ ກວດພົບແຜ່ນດິນໄຫວຮຸນແຮງ 6.0ແມັກນິຈູດ ເມື່ອເວລາ 00:56ນາທີ ຕາມເວລາທ້ອງຖິ່ນ ຂອງມຽນມາ ໂດຍມີຈຸດສູນກາງຢູ່ເລິກລົງໄປໃຕ້ດິນພຽງ 10ກິໂລແມັດ ຫ່າງຈາກເມືອງພະຍູໄປທາງຕາເວັນຕົກປະມານ 40ກິໂລແມັດ ແລະ ຫ່າງຈາກກຸງເນປິດໍລົງໄປທາງຕອນໃຕ້ປະມານ 139ກິໂລແມັດ

 

ຕໍ່ຈາກນັ້ນເກີດແຜ່ນດິນໄຫວຕາມ ຫລື ອັບເຕີຊ໋ອກຍ່າງຫນ້ອຍ 3ຄັ້ງ ເຊິ່ງຍູເອັສຈີເອສ ວັດຄວາມຮຸນແຮງໄດ້ 5.3ແມັກນິຈູດເທົ່າກັນທັງຫມົດ ເຖິງແມ່ນວ່າໃນເບື້ອງຕົ້ນຍູເອັສຈີເອສປະເມີນແນວໂນ້ມການເກີດຄວາມເສຍຫາຍຢູ່ໃນ ລະດັບຕໍ່າ ເນື່ອງຈາກສູນກາງຂອງແຜ່ນດິນໄຫວຕັ້ງຢູ່ບໍລິເວນທີ່ມີຄົນອາໄສຢູ່ຈຳນວນຫນ້ອຍ ແຕ່ຍອມຮັບວ່າໂຄງສ້າງຂອງທີ່ຢູ່ອາໄສ ແລະ ລະບົບສາທາລະນຸປະໂພກໃນບໍລິເວນນັ້ນຍັງຖືວ່າອ່ອນແອ ທີ່ຈະຮັບມືກັບສະຖານະການ ທີ່ເກີດຂື້ນ

 

ທັງນີ້ມຽນມາເປັນຫນື່ງໃນປະເທດແຖບເອເຊຍທີ່ປະເຊີນກັບການເກີດແຜ່ນດິນໄຫວຫລາຍຄັ້ງ ໂດຍປະວັດການຮັບມືກັບແຜ່ນດິນໄຫວທີ່ມີຄວາມຮຸນແຮງ 7.0ແມັກນິຈູດ ຍ່າງຫນ້ອຍ 6ຄັ້ງ ລະຫວ່າງປີ 2473 ເຖິງ 2499 ບໍລິເວນຮອຍ ເລື່ອນສະກາຍທີ່ຜ່າກາງມຽນມາຈາກເຫນືອຮອດໃຕ້ ແລະ ຍ້ອນກັບໄປເມື່ອເດືອນສິງຫາ 2559 ເກີດແຜ່ນດິນໄຫວຮຸນແຮງ 6.8ແມັກນິຈູດ ທີ່ເມືອງພຸກາມ ເຊິ່ງເປັນເມືອງບູຮານຕັ້ງຢູ່ທາງຕອນກາງຂອງປະເທດ ມີຜູ້ເສຍຊີວິດ 3ຄົນ ແລະ ສ້າງຄວາມເສຍຫາຍໃຫ້ກັບບູຮານສະຖານໃນບໍລິເວນນັ້ນ

 

 

 

ຂໍ້ມູນຈາກ: ເດລິນີວ

ຄວາມຄິດເຫັນຂອງຜູ້ອ່ານ (0)