GMT+7 23/04/2018 10:44

ໂຮງແຮມແລນມາກແມ່ຂອງຣີເວີໄຊ ກຽມພ້ອມທຸກດ້ານຮອງຮັບນັກທ່ອງທ່ຽວ

 

 

ໂຮງແຮມ​ແລນ​ມາກ​ແມ່​ຂອງຣີ​ເວີ​ໄຊ ເປັນ​ໂຮງແຮມ​ທີ່​ໃຫຍ່​ທີ່ສຸດ ໃນ​ນະຄອນຫຼວງ​ວຽງ​ຈັນ ໄດ້ມາດຕະຖານ 5 ດາວ ປັດຈຸບັນ ໂຮງແຮມ​ດັ່ງກ່າວ​ໄດ້​ມີ​ຄວາມພ້ອມ​ທຸກ​ດ້ານ​ ໃນ​ການ​ຮອງ​ຮັບນັກ​ທ່ອງ​ທ່ຽວ​ທີ່​ເຂົ້າ​ມາ​ທ່ຽວ ​ສປປ ລາວ.

ທ່ານ​ນາງ ອໍລະໄທ ສັນຕິ​ຄົງຄາ ອຳນວຍ​ການ​ໂຮງແຮມ​ແລນມາກ​ແມ່​ຂອງ​ຣີ​ເວີ​ໄຊ ໃຫ້​ສຳພາດ​ວ່າ: ມີ​ຄວາມ​ຮູ້ສຶກ​ພາກພູມໃຈ​ທີ່​ພັກ-ລັດຖະບານ​ເປີດ​ປີ​ທ່ອງທ່ຽວ​ລາວ 2018 ເຊິ່ງ​ເປັນ​ປີ​ທີ່​ມີຄວາມ​ສຳຄັນ ໄດ້​ຜັກ​ດັນ ແລະ ຊຸກຍູ້​ສົ່ງເສີມ​ໃຫ້​ຫົວໜ່ວຍ​ທຸລະກິດ ກໍ່​ຄືຜູ້​ປະກອບ​ການ​ດ້ານ​ອາຫານ ເຮືອນ​ພັກ ແລະ ໂຮງແຮມ ໄດ້​ມີ​ການ​ປັບປຸງໂຄສະນາ ພ້ອມພັດທະນາ​ຜະລິດ​ຕະ​ພັນ​ຂອງ​ຕົນເອງ​ໃຫ້​ນັບ​ມື້​ດີ​ຂຶ້ນ ເພື່ອ​ຮອງ​ຮັບໃຫ້​ພຽງພໍ​ກັບ​ຄວາມ​ຕ້ອງການຂອງ​ນັກ​ທ່ອງ​ທ່ຽວ ໃນ​ນີ້ ໂຮງແຮມ​ແລນ​ມາກແມ່​ຂອງ​ຣີ​ເວີ​ໄຊ ໄດ້​ມີ​ການ​ກຽມພ້ອມ​ທຸກ​ດ້ານ ເປັນຕົ້ນແມ່ນ​ອາຫານ ລາວ ຈີນ ຍີ່ປຸ່ນ ແລະ ຝຣັ່ງ ພ້ອມ​ນັ້ນຍັງ​ມີຫ້ອງ​ພັກ​ເຊົາ​ຫຼາຍ​ແບບ​ໃຫ້​ເລືອກ ຈຳນວນ 188 ຫ້ອງ ທີ່​ໄດ້​ມາດ​ຕະຖານ 5 ດາວ ເນື່ອງ​ໃນ​ໂອກາດເປີດ​ປີ​ທ່ອງ​ທ່ຽວ​ລາວ​ທາງ​ໂຮງແຮມ​ໄດ້​ມີ​ສ່ວນ​ຫຼຸດ​ລາຄາ​ເຖິງ 50-60% ນອກຈາກ​ນີ້ ທາງ​ໂຮງແຮມ​ຍັງ​ໄດ້​ມີ​ສ່ວນ​ຮ່ວມ​ໃນ​ກິດຈະ​ກຳ​ການທ່ອງທ່ຽວ ໂດຍ​ມີແພັກ​ເກັດ​ການທ່ອງທ່ຽວ​ຂອງລາວ​ຕື່ມ​ອີກ.

ທ່ານ​ນາງ ອໍລະໄທ ສັນຕິ​ຄົງ​ຄາ ກ່າວ​ຕື່ມ​ອີ​ກວ່າ: ໂຮງແຮມ​ຂອງພວກ​ເຮົາ​ຕັ້ງ​ຢູ່​ເມືອງ​ສີ​ສັດຕະນາກ ນະຄອນຫຼວງ​ວຽງ​ຈັນ ໃກ້ກັບ​ແມ່ນ້ຳ​ຂອງ ເຊິ່ງ​ໄລຍະ​ຜ່ານມາ ໂຮງແຮມ​ຂອງ​ພວກ​ເຮົາ​ ກໍ່​ໄດ້ມີ​ຜົນງານ​ພົ້ນ​ເດັ່ນ​ໃນ​ການ​ຕ້ອນຮັບ​ກອງ​ປະຊຸມ​ອາ​ເຊັມ ກອງ​ປະຊຸມ​ຕ່າງໆ​ຂອງ​ພາຍ​ໃນ-ສາກົນ ແລະ ຈັດ​ສຳ​ມະ​ນາ​ໃນ​ຫົວຂໍ້ຕ່າງໆ ນອກຈາກ​ນີ້ຍັງ​ໄດ້​ຈັດງານ​ລ້ຽງ ງານ​ແຕ່ງງານ ແລະ ອື່ນໆ ຫວັງ​ຢ່າງ​ຍິ່ງ​ວ່າ​ປີ​ທ່ອງທ່ຽວ​ລາວ 2018 ໂຮງແຮມ​ຂອງພວກ​ເຮົາ​ຈະ​ໄດ້​ຕ້ອນຮັບ​ພ້ອມ​ໃຫ້ການ​ບໍລິການ​ແກ່​ນັກ​ທ່ອງ​ທ່ຽວ ແລະ ແຂກ​ທີ່​ມາ​ຢ້ຽມຢາມ ສປປ ລາວ.

 

 

ຂໍ້ມູນຈາກ: ວຽງຈັນໃຫມ່

 

ຄວາມຄິດເຫັນຂອງຜູ້ອ່ານ (0)