GMT+7 24/04/2018 08:10

ເຈົ້າຄອງ ລົງຊຸກຍູ້ການຜະລິດກະສິກຳ-ສະບຽງອາຫານ

 

 

ວັນ​ທີ 4 ມັງກອນ 2018 ທ່ານ ສິນ​ລະ​ວົງ ຄຸດ​ໄພທູນ ເຈົ້າ​ຄອງນະຄອນຫຼວງ​ວຽງ​ຈັນ ພ້ອມ​ດ້ວຍຄະນະ ແລະ ພາກສ່ວນ​ກ່ຽວຂ້ອງ​ ໄດ້​ລົງ​ຢ້ຽມຢາມ​ຊຸກຍູ້​ການຜະລິດ​ກະສິກຳ ແລະ ສະບຽງ​ອາຫານ​ຢູ່​ນະຄອນຫຼວງ​ວຽງ​ຈັນ ເຊິ່ງຈຸດ​ທຳ​ອິດ​ຄະນະ​ໄດ້​ລົງ​ສຳ​ຫຼວດສະຖານທີ່​ຕົວ​ຈິງ ພ້ອມ​ກັບ​ບໍລິສັດ ຊີ​ພີ ເພື່ອ​ສຳ​ຫຼວດ​ເນື້ອທີ່​ການ​ຜະລິດ​ກະສິກຳ​ປູກ​ໝາກສາລີ ຢູ່​ພື້ນທີ່​ຂອງ​ບ້ານ​ໂຊກ​ນ້ອຍ ແລະ ບ້ານ​ໂຊກ​ໃຫຍ່ ເຊິ່ງ​ຜ່ານ​ການ​ສຳຫຼວດ​ກໍ່​ເຫັນ​ໄດ້​ວ່າ​ ໃນ​ເນື້ອທີ່​ຫຼາຍຮ້ອຍ​ກວ່າ​ເຮັກຕາ​ທີ່​ຍັງ​ເປັນ​ດິນຫວ່າງ ແລະ ບາງ​ພື້ນ​ທີ່​ແມ່ນ​ນຳໃຊ້​ເຂົ້າ​ໃນ​ການ​ທຳ​ການ​ຜະລິດ ສະເພາະ​ນາແຊງ ແມ່ນ​ເຫັນ​ວ່າສາມາດ​ປູກ​ສາລີ​ໄດ້ ເຊິ່ງ​ຈະ​ສາມາດ​ສະໜອງ​ໄດ້​ທັງ​ສະບຽງ​ອາຫານ​ນຳ​ມາ​ເປັນ​ອາຫານ​ສັດ ແລະ ຍັງ​ສ້າງ​ທົ່ງ​ສີຂຽວ​ໃຫ້​ເຂດດັ່ງກ່າວ​ອີກ​ດ້ວຍ ໂດຍ​ພາຍຫຼັງສຳເລັດ​ການ​ລົງ​ກວດກາ​ເບື້ອງຕົ້ນ ຄະນະ​ກໍ່​ໄດ້​ຮ່ວມ​ປະຊຸມເພື່ອ​ປຶກສາ​ຫາລື​ເຖິງ​ຄວາມ​ເປັນໄປ​ໄດ້​ ໃນ​ການ​ດຳເນີນ​ໂຄງການດັ່ງກ່າວ.

ກອງ​ປະຊຸມ​ໄດ້​ຕົກລົງ​ເຫັນ​ດີ ກຳນົດ​ເອົາ​ເຂດ​ດັ່ງກ່າວ​ເປັນ​ບ່ອນເຮັດ​ທົດ​ລອງ​ໂຄງການ​ປູກ​ສາລີ ໂດຍ​ສະເໜີ​ໃຫ້ບໍລິສັດ ຊີ​ພີ​ລາວ ເປັນ​ຜູ້​ຊຸກຍູ້ ແລະ ດຳເນີນ​ການຜະລິດ​ດັ່ງກ່າວ ຄຽງ​ຄູ່​ກັນ​ນັ້ນ ຄະນະ​ກໍ່​ຍັງ​ຈະ​ໄດ້​ສົມທົບ​ກັບ​ພາກສ່ວນ​ກ່ຽວຂ້ອງ ແລະ ເມືອງ​ໄຊເຊດ​ຖາ ໃຫ້​ຄົ້ນຄວ້າ​ພິຈາລະນາຂັ້ນ​ຕອນ ແລະ ບັນຫາ​ຜົນ​ກະທົບທີ່​ຈະ​ຕາມ​ມາ ກ່ອນ​ຈະ​ດຳເນີນໂຄງການ​ດັ່ງກ່າວ ເຊັ່ນ: ການຊອກ​ຫາ​ແຫຼ່ງ​ນ້ຳ (ອ່າງ​ໂຕ່ງ​ນ້ຳ ເພື່ອ​ກັກ​ເກັບ​ນ້ຳ) ເຂົ້າ​ຊົມໃຊ້​ໃນການ​ຜະລິດ ປະຊາຊົນ ຫຼື ກຸ່ມ​ຜະລິດ​ກະສິກຳ​ທີ່​ຈະ​ເຂົ້າ​ຮ່ວມ​ໂຄງການ ການ​ກຳນົດ​ເນື້ອທີ່ ແລະ ຂອບ​ເຂດ​ການ​ຜະລິດ ແລະ ສິ່ງສຳຄັນ​ກວ່າ​ໝູ່​ແມ່ນ​ແຫຼ່ງ​ທຶນ​ໃນການ​ດຳເນີນ​ໂຄງການ ແລະ ການ​ໄກ່​ເກ່ຍ​ກໍລະນີ​ມີ​ຄອບຄົວປະຊາຊົນ​ຜູ້​ມີ​ສິດ​ໃຊ້ ແລະ ນຳ​ໃຊ້ທີ່​ດິນ​ໃນ​ພື້ນ​ທີ່​ດັ່່ງ​ກ່າວ.

ພ້ອມ​ນີ້ ຄະນະ​ດັ່ງກ່າວ​ໄດ້​ລົງຢ້ຽມ​ຢ້າມ ໂຮງງານ​ຂ້າ​ສັດ​ດອນ​ດູ່ ເຊິ່ງ​ເປັນ​ໂຮງງານ​ແຫ່ງ​ໃຫຍ່​ແຫ່ງໜຶ່ງ ທີ່​ສະໜອງ​ສະບຽງ​ອາຫານປະເພດ​ຊີ້ນ​ໝູ ງົວ ຄວາຍ ຂອງນະຄອນຫຼວງ​ວຽງ​ຈັນ ໂດຍ​ໃຫ້ການ​ຕ້ອນຮັບ​ຂອງ​ທ່ານ ຄຳ​ຫຼ້າ ແສງ​ດາ​ວົງ ອຳນວຍ​ການ​ລັດ​ວິສາ​ຫະ​ກິດ​ສະບຽງ​ອາຫານ ນວ ເຊິ່ງ​ທ່ານ​ໄດ້​ສະເໜີ​ກ່ຽວ​ກັບ​ແຜນພັດທະນາ​ໃນຕໍ່ໜ້າ​ວ່າ ໂຮງງານຂ້າ​ສັດ​ດອນ​ດູ່​ແຫ່ງ​ນີ້ ​ຈະ​ໄດ້​ຍົກລະດັບ​ຂຶ້ນ​ອີກ​ເພື່ອ​ໃຫ້​ຫັນ​ເຂົ້າສູ່​ການ​ຜະລິດ​ທີ່​ສະອາດ ແລະ ທັນ​ສະໄໝທຽບ​ເທົ່າ​ສາກົນ.

 

 

ຂໍ້ມູນຈາກ: ວຽງຈັນໃຫມ່

ຄວາມຄິດເຫັນຂອງຜູ້ອ່ານ (0)