GMT+7 23/01/2018 07:19

ໂຄງການກໍ່ສ້າງຊົນລະປະທານນ້ຳທູນ ເມືອງຊະນະຄາມສຳເລັດ 7%

 

 

ເມືອງ​ຊະນະ​ຄາມ ເປັນ​ເມືອງໜຶ່ງ​ທີ່​ນອນ​ຢູ່​ໃນແຂວງ​ວຽງ​ຈັນ ປະຊາຊົນ​ສ່ວນ​ຫຼາຍ​ແມ່ນ​ຢຶດ​ຖືອາຊີບ​ປູກຝັງ-ລ້ຽງ​ສັດ​ເປັນ​ອາຊີບ​ຕົ້ນຕໍ ເພື່ອ​ຍົກ​ລະດັບ​ຊີວິດການ​ເປັນ​ຢູ່​ຂອງ​ປະຊາຊົນ​ ໃຫ້​ນັບມື້​ດີ​ຂຶ້ນ ​ຈາກ​ການ​ຜະລິດ​ກະສິກຳເປັນ​ສິນຄ້າ ຫຼຸດຜ່ອນ​ການ​ຖາງປ່າ​ເຮັດ​ໄຮ່ ແລະ ກ້າວ​ໄປ​ເຖິງການ​ຫຼຸດ​ພົ້ນ​ອອກ​ຈາກ​ຄວາມທຸກຍາກ​ເທື່ອ​ລະ​ກ້າວ ຕາມ​ແນວທາງ​ນະໂຍບາຍ​ຂອງ​ພັກ-ລັດ​ທີ່ວາງ​ໄວ້.

ເພື່ອ​ບັນລຸ​ຄາດໝາຍ​ດັ່ງກ່າວ ພັກ ແລະ ລັດຖະບານ ກໍ່​ຄືອຳນາດ​ການ​ປົກຄອງ​ແຂວງ​ວຽງ​ຈັນ ໄດ້​ສຸມ​ໃສ່​ພັດທະນາ​ພື້ນຖານ​ໂຄງລ່າງ​ການ​ຜະລິດ​ກະສິກຳ​ເປັນ​ສິນຄ້າ ສະນັ້ນ ຈຶ່ງ​ໄດ້​ສົມທົບ​ກັບບໍ​ລິສັດ​ ແພງ​ພອນກໍ່ສ້າງ​ຂົວ​ທາງ ແລະ ຊົນລະປະທານ ຈຳກັດຜູ້​ດຽວ ເປັນ​ຜູ້​ຮັບ​ເໜົາ​ກໍ່ສ້າງ​ໂຄງການ​ອ່າງເກັບນ້ຳ​ນ້ຳ​ແກບ ແລະ ໂຄງການ​ຟື້ນ​ຟູ ແລະ ສ້ອມແປງ ເພື່ອ​ຍົກ​ລະດັບ​ຊົນລະປະທານ​ນ້ຳທູນ ທີ່​ນອນ​ຢູ່​ເມືອງ​ຊະນະ​ຄາມ ເຊິ່ງ​ທັງ​ສອງ​ໂຄງການ​ນີ້​ແມ່ນກວມ​ເອົາ​ເນື້ອທີ່​ທັງ​ໜົດ 1.000 ເຮັກຕາ ກວມ​ເອົາ 7 ບ້ານ ຄື: ບ້ານ​ນາ​ແກບ​ນາ​ກາງ ນາ​ມອຍ ໂຄກ​ເຂົ້າດໍ ຫ້ວຍ​ເຕົ່າ​ໃໝ່ ປາກທູນ ແລະ ບ້ານ​ປຸ່ງ​ມາ ຖ້າ​ໂຄງການ​ນີ້​ສ້າງ​ສຳເລັດ​ ຈະ​ສາມາດສະໜອງ​ນ້ຳ​ໃຫ້​ແກ່​ເນື້ອທີ່​ການຜະລິດ​ຂອງ​ປະຊາຊົນ​ເຂດ​ເມືອງຊະນະ​ຄາມ ໄດ້ 1.000 ກວ່າ​ເຮັກຕາ.

ທ່ານ​ນາງ ແພງ​ພອນ ຂັນ​ທະຍົງ​ທອງ ປະທານ​ບໍລິສັດ ​ແພງພອນ​ກໍ່ສ້າງ​ຂົວ​ທາງ ແລະ ຊົນລະ​ປະທານ ຈຳກັດ​ຜູ້​ດຽວ ໃນນາມ​ຜູ້​ຮັບ​ເໜົາ​ກໍ່ສ້າງ​ໄດ້​ກ່າວວ່າ: ໂຄງການ​ກໍ່ສ້າງ​ອ່າງ​ຊົນ​ລະປະທານ​ແຫ່ງ​ນີ້ ໄດ້​ເລີ່ມ​ມາ​ແຕ່ເດືອນ​ພະຈິກ 2017 ມູນ​ຄ່າ 150 ຕື້​ກີບ ປັດຈຸບັນ ບໍລິສັດ​ໄດ້​ເອົາໃຈໃສ່​ຈັດ​ສັນ​ຄອງ​ເໜືອງ ແລະ ບຸກເບີກ​ລອກ​ໜ້າດິນ​ແລວ​ຄອງເໜືອງ ສຳເລັດ 7% ຖ້າວ່າໂຄງການ​ຊົນລະປະທານ​ແຫ່ງ​ນີ້​ສ້າງສຳເລັດ ຈະ​ນຳ​ຜົນ​ປະໂຫຍດຫຼາຍ​ສົມຄວນ​ໃຫ້​ແກ່​ປະຊາຊົນເຂດ​ດັ່ງກ່າວ ເປັນຕົ້ນ ຈະ​ມີ​ເນື້ອທີ່​ທຳ​ການ​ຜະລິດ​ກະສິກຳ​ເພີ່ມ​ຂຶ້ນ ສາມາດ​ປູກ​ເຂົ້າ​ໄດ້ 2 ລະດູ ສ້າງພື້ນຖານ​ເສດຖະກິດ​ຂອງ​ປະຊາຊົນ​ບັນດາເຜົ່າ​ໃນ​ເຂດ​ໂຄງການໃຫ້​ເຂັ້ມແຂງ ເຮັດ​ໃຫ້​ປະຊາຊົນ​ມີອາຊີບ​ທີ່​ໝັ້ນຄົງ ແລະ ສ້າງ​ລາຍຮັບ​ໃຫ້​ແກ່​ຄອບຄົວ​ຫຼາຍ​ຂຶ້ນ ການບໍລິຫານ​ຄຸ້ມ​ຄອງ​ຊັບພະຍາກອນນ້ຳ​ແບບ​ປະສົມ​ປະສານ ​ເຮັດ​ໃຫ້ປະຊາຊົນ​ຫຼຸດ​ພົ້ນ​ອອກ​ຈາກ​ບ້ານທຸກ​ຍາກ​ຂອງ​ເມືອງ​ຊະນະ​ຄາມ ໃນ​ປີ 2020.

 

 

ຂໍ້ມູນຈາກ: ວຽງຈັນໃຫມ່

ຄວາມຄິດເຫັນຂອງຜູ້ອ່ານ (0)