GMT+7 23/04/2018 10:36

ປະຊາຊົນຖືກຜົນກະທົບຈາກໂຄງການໄຟຟ້າຫົງສາ ໄດ້ຮັບການພັດທະນາອາຊີບ

 

 

ປັດຈຸບັນ ປະຊາຊົນ​ຈຳນວນຫຼາຍ​ພັນ​ຄົນ​ທີ່​ຖືກ​ຜົນ​ກະທົບ​ຈາກໂຄງການ​ຂອງ​ບໍລິສັດ ​ໄຟຟ້າ​ຫົງສາ ຈຳກັດ ເມືອງ​ຫົງ​ສາ ແຂວງໄຊ​ຍະ​ບູ​ລີ ໄດ້​ຮັບ​ການ​ພັດທະນາອາຊີບ​ຢ່າງ​ຕໍ່​ເນື່ອງ ພ້ອມ​ນີ້ ເຂົາເຈົ້າ​ກໍ່​ໄດ້​ຮັບ​ຄ່າ​ຊົດ​ເຊີຍ ຈັດ​ສັນທີ່ຢູ່​ອາໄສ​ພ້ອມ​ປຸກເຮືອນ​ໃຫ້​ຢູ່​ໃໝ່ ມີ​ດິນ​ທຳ​ການ​ຜະລິດ ໄຟຟ້າ ນ້ຳປະປາ ໂຮງຮຽນ ໂຮງໝໍ ແລະ ຍັງ​ໄດ້​ຈັດ​ຕັ້ງ​ກຸ່ມ​ຜະລິດ​ປູກຝັງ ແລະ ລ້ຽງສັດ​ເປັນ​ສິນຄ້າ ​ອັນ​ໄດ້ເຮັດ​ໃຫ້​ປະຊາຊົນ​ມີ​ອາຊີບ ແລະ ລາຍ​ຮັບ​ທີ່​ໝັ້ນຄົງ ກ້າວ​ສູ່​ການຫຼຸດ​ພົ້ນ​ອອກ​ຈາກ​ຄວາມທຸກ​ຍາກ ທັງ​ພັດທະນາ​ໄປ​ສູ່​ການ​ສ້າງຕັ້ງສະຫະກອນ​ຢູ່​ໃນ​ຊຸມ​ຊົນ​ບ້ານ​ຈັດສັນ​ໃນຕໍ່ໜ້າ.

ທ່ານ ນ້ອຍ​ໄຫວ ກາ​ມີ​ໄຊ ໜຶ່ງໃນ​ຄອບຄົວ​ທີ່​ຖືກ​ຜົນ​ກະທົບ​ຈາກໂຄງການ​ໄຟຟ້າ​ຫົງ​ສາ ຈຳກັດ ໃຫ້​ສຳພາດ​ວ່າ: ເມື່ອ​ກ່ອນ​ຢູ່​ບ້ານຈຳປາ (ບ້ານ​ເກົ່າ) ຕົນ​ກໍ່​ໄດ້​ເຮັດການ​ຜະລິດ​ປູກ​ຜັກ​ຂາຍ​ພໍ​ແກ້​ໄຂຊີວິດ​ການ​ເປັນ​ຢູ່​ຂອງ​ຄອບຄົວ ເຊິ່ງ​ການ​ຜະລິດ​ດັ່ງກ່າວ​ແມ່ນ​ຍັງເຮັດ​ແບບ​ຕາມ​ມີ​ຕາມ​ເກີດ ​ບໍ່​ມີເຕັກນິກ​ເຂົ້າ​ໃນ​ການ​ຜະລິດ​ເຮັດໃຫ້​ຜົນ​ຜະລິດ​ເປັນ​ສິນຄ້າ​ບໍ່​ໄດ້ຫຼາຍ ພາຍຫຼັງ​ທີ່​ບ້ານ​ຖືກ​ຜົນ​ກະທົບ​ໂຄງການ​ຂອງ​ບໍລິສັດ ແລະ ຍົກຍ້າຍ​ມາ​ຢູ່​ບ້ານ​ນາ​ແກ່ນ​ຄຳ ທາງ​ບໍລິສັດ​ເຫັນ​ຕົນ​ມັກ​ຮັກ​ອາຊີບ​ປູກ​ຜັກ ຈຶ່ງ​ໄດ້​ສົ່ງ​ໃຫ້​ສືບຕໍ່​ຜະລິດ​ຜັກ ໂດຍ​ບໍລິສັດ​ລົງທຶນ​ສ້າງເຮືອນ​ຮົ່ມ​ໃຫ້​ທົດ​ລອງ​ຜະລິດ​ໃນເນື້ອທີ່ 2 ໄລ່ ພ້ອມ​ທັງ​ສົ່ງ​ວິຊາການ​ໃກ້ຊິດຕິດແທດ ໂດຍ​ເນັ້ນ​ຊີ້ນຳ​ຜະລິດ​ພືດ​ຜັກ​ປອດ​ສານພິດ ກໍ່ເຮັດ​ໃຫ້​ຜົນ​ຜະລິດ​ເພີ່ມ​ຂຶ້ນ​ຫຼາຍກວ່າ​ຜ່ານ​ມາ ການ​ຜະລິດ​ດັ່ງກ່າວ​ ໃຊ້​ເວລາປະມານ 80 ວັນ ກໍ່​ສາມາດ​ເກັບ​ກູ້​ຂາຍ​ອອກ ເຊິ່ງຊຸດ​ໜຶ່ງ​ໄດ້ຜົນ​ຜະລິດ ປະມານ 200 ກວ່າ​ກິ​ໂລ ໃນ​ນັ້ນ ສາມາດສ້າງ​ລາຍ​ຮັບ​ເຂົ້າ​ຄອບຄົວ​ໄດ້ຫຼາຍ​ກວ່າ 4 ລ້ານ​ກີບ​ຕໍ່​ເດືອນ ນອກຈາກ​ນີ້ ທາງ​ບໍລິສັດ​ກໍ່​ຈັດຕັ້ງ​ກຸ່ມ​ຮັບ​ຊື້ ກໍ່​ຄືຕະຫຼາດ​ຮອງ​ຮັບຜົນ​ຜະລິດ ໂດຍ​ສະເພາະແມ່ນພາຍຫຼັງ​ພືດ​ຜັກ​ຮອດ​ກຳນົດ​ເກັບກູ້​ແລ້ວ ກໍ່​ມີ​ກຸ່ມ​ໜຶ່ງ​ມາ​ເກັບ​ຊື້​ກັບທີ່ ເຊິ່ງ​ໄດ້​ສ້າງ​ຄວາມ​ສະດວກ​ສະບາຍ​ໃຫ້​ແກ່​ຜູ້​ຜະລິດ​ທີ່​ບໍ່​ໄດ້​ນຳໄປສົ່ງ ຫຼື ໄປ​ນັ່ງ​ຂາຍ​ຢູ່​ຕະຫຼາດ​ຄືຜ່ານ​ມາ.

ທ່ານ ນ້ອຍ​ໄຫວ ກາ​ມີ​ໄຊ ກ່າວ​ຕື່ມ​ວ່າ: ພາຍຫຼັງ​ທີ່​ໄດ້​ຍົກຍ້າຍ​ມາ​ຢູ່​ບ້ານ​ນາ​ແກ່ນ​ຄຳ ອັນໄດ້​ເຮັດ​ໃຫ້​ຊີວິດ​ປ່ຽນແປງ​ຫຼາຍກວ່າ​ເກົ່າ ໂດຍ​ສະເພາະ​ແມ່ນດ້ານ​ການ​ຜະລິດ​ເຫັນ​ວ່າ​ໄດ້​ຮັບຜົນ​ດີ ມີ​ເງິນ​ໃຊ້​ຈ່າຍ​ເຂົ້າ​ໃນ​ການດຳລົງ​ຊີວິດ​ປະຈຳ​ວັນ ມີ​ເງິນ​ສົ່ງລູກ​ຮຽນ​ລະດັບ​ມະຫາ​ວິ​ຍາ​ໄລ ຄອບຄົວ​ມີ​ອາຊີບ​ທີ່​ໝັ້ນຄົງ ການຊຸກຍູ້​ຂອງ​ບໍລິສັດ​ໄຟຟ້າ​ຫົງ​ສາ ໄດ້​ເຮັດ​ໃຫ້​ຊີວິດ​ການ​ເປັນ​ຢູ່​ຂອງຄອບຄົວ​ມີ​ການ​ພັດທະນາ​ນັບ​ມື້​ດີຂຶ້ນ​ເປັນ​ກ້າວໆ.

ສຳລັບ​ພັນທະ​ສັນຍາ​ທີ່​ໂຄງການ​ມີ​ຕໍ່​ຄອບຄົວ​ຍົກຍ້າຍ​ນັ້ນ ແຕ່​ລະ​ຄອບຄົວ​ຕ້ອງ​ໄດ້​ຮັບ​ການພັດທະນາ​ອາຊີບ​ ໃຫ້​ມີ​ລາຍ​ໄດ້ພົ້ນ​ຂີດ​ຈາກ​ຄວາມທຸກ​ຍາກ​ພາຍໃນ 3 ປີ ລາຍ​ໄດ້​ຕໍ່​ຄອບຄົວ​ຕ້ອງເພີ່ມ​ຂຶ້ນ 150% ພາຍ​ໃນ 10 ປີ ແລະ ລາຍ​ໄດ້​ຂອງ​ປະຊາຊົນ​ຕ້ອງພົ້ນ​ຂີດ​ຄວາມທຸກ​ຍາກ ໃນ​ປີ 2020.

 

 

ຂໍ້ມູນຈກາ: ວຽງຈັນໃຫມ່

ຄວາມຄິດເຫັນຂອງຜູ້ອ່ານ (0)