GMT+7 23/04/2018 10:38

ໂຄງການກໍ່ສ້າງທາງລົດໄຟ ລາວ-ຈີນ ຄືບໜ້າ 16%

 

 

ໂຄງການ​ກໍ່ສ້າງ​ເສັ້ນທາງ​ລົດ​ໄຟ​ ລາວ-ຈີນ​ ແຕ່ບໍ່ຫານ-​ບໍ່​ເຕັນ ເຖິງນະຄອນຫລວງວຽງຈັນ​ ໄດ້​ຮັບ​ການຈັດ​ຕັ້ງ​ປະຕິບັດຢ່າງ​ຕັ້ງໜ້າ ​ແລະ ມີ​ຄວາມຄືບໜ້າ, ມາ​ຮອດ​ປັດຈຸບັນ​ໄດ້​ສຳ​ເລັດ​ແລ້ວ 16,4% ຄາດວ່າຈະໃຫ້ສຳເລັດ ຕາມ​ແຜນການ ໃນທ້າຍປີ 2021. ​ຕະຫລອດໄລຍະ 2 ປີ ຜ່ານ​ມາ, ບັນດາ​ບໍລິສັດ​ຜູ້​ຮັບ​ເໝົາໄດ້​ດຳ​ເນີນ​ການເຈາະ​ອຸມົງ ຈຳນວນ 53 ​ແຫ່ງ, ກໍ່ສ້າງ​ຂົວ ຈຳນວນ 36 ​ແຫ່ງ, ຍາວ 54.000 ກວ່າ​ແມັດ, ບຸກ​ເບີກ​ເສັ້ນທາງ​ເຂົ້າ​ຫາ​ສະຖານ​ທີ່​ກໍ່ສ້າງ 800 ກວ່າ​ກິ​ໂລ​ແມັດ, ຕິດ​ຕັ້ງ​ສາຍ​ສົ່ງ​ໄຟຟ້າ 400 ກວ່າ​ກິ​ໂລ​ແມັດ, ຕິດ​ຕັ້ງໝໍ້​ແປງ 233 ໜ່ວຍ ​ແລະ ສ້າງ​ລະບົບ​ນ້ຳ​ປະປາ 93 ກິ​ໂລ​ແມັດ.

ສຳລັບ​ກຸ່ມ​ບໍລິສັດ ວິ​ສາວະ​ກຳ​ທາງ​ລົດ​ໄຟ ​ເລກ 2 ສປ ຈີນ ​ໄດ້ຮັບ​ເໝົາກໍ່ສ້າງ​ ໃນ​ໄລຍະ​ສັນຍາ​ທີ VI ​ເລີ່​ມ​ແຕ່​ຈຸດ DK343+300 ຫາ​ຈຸດ DK409+000​ ຂອງ​ແລວ​ທາງ​ລົດ​ໄຟ ແຕ່​ເມືອງ​ໂພນ​ໂຮງ ​ແຂວງ​ວຽງຈັນ ຫາ ນະຄອນຫລວງ​ວຽງຈັນ, ​ເຊິ່ງມີ​ຄວາມ​ຍາວ ປະມານ 65,7 ກິ​ໂລ​ແມັດ, ປະກອບ​ມີໜ້າວຽກ ກໍ່ສ້າງ​ພື້ນຖານ​ໂຄງ​ລ່າງ 51 ກິ​ໂລ​ແມັດ, ກໍ່ສ້າງ​ຂົວ​ມີ 17 ​ແຫ່ງ, ຍາວ 14.000 ​ແມັດ, ກໍ່ສ້າງ​ສະຖານີ 4 ​ແຫ່ງ. ​ໃນ​ນັ້ນ, ມີ​ສະຖາ​ນີຂົນ​ສົ່ງ​ໂດຍສານ 1 ​ແຫ່ງ ຢູ່​ນະຄອນຫລວງ​ວຽງຈັນ, ສະຖານີ​ລະຫວ່າງ​ທາງ 1 ​ແຫ່ງ ຢູ່​ໂພນ​ໂຮງ ​ແລະ ສະຖານີ​ຫລີກ​ລົດ 2 ​ແຫ່ງ. ປັດຈຸບັນ, ​ໄດ້​ສຳ​ເລັດ​ການ​ຕັ້ງ​ເສົາ​ຈຳນວນ​ 130 ຕົ້ນ, ຄາດ​ວ່າ​ຮອດ​ກາງ​ປີ 2018 ນີ້ ຈະ​ໃຫ້​ສຳ​ເລັດ​ການ​ຕັ້ງ​ເສົາ​ທັງໝົດ. ໂຄງການລົດໄຟ ລາວ-ຈີນ ແຕ່ບໍ່ຫານ-​ບໍ່​ເຕັນ ເຖິງນະຄອນຫລວງວຽງຈັນ ມີຄວາມຍາວ 417 ກິໂລແມັດ, ເປັນລົດໄຟ ມາດຕະຖານຊັ້ນ 1 ປະເພດລາງດ່ຽວ, ການກໍານົດຄວາມໄວອອກແບບສໍາລັບຂົນສົ່ງໂດຍສານ ມີ​ຄວາມ​ໄວ​ສູງ 160 ກິ ໂລແມັດຕໍ່ຊົ່ວໂມງ, ລວມມູນຄ່າການກໍ່ສ້າງທັງໝົດ  6 ຕື້ໂດລາສະຫະລັດ.ໂຄງການ​​ລົດ​ໄຟ​ ລາວ-ຈີນ​ ​ເປັນ​ໂຄງການ​ແບບຢ່າງ ​ໃນ​ການ​ຮ່ວມ​ມື​ສອງ​ປະ​ເທດ ​ເພື່ອ​ຊຸກຍູ້​ການ​ເຊື່ອມ​ໂຍງ ກັບ​ບັນດາ​ປະ​ເທດ​ພາກພື້ນອາ​ຊຽນ. ໂຄງການ​ນີ້​, ໄດ້​ເປີດ​ຂຶ້ນ​ຢ່າງ​ເປັນ​ທາງ​ການ ໃນ​ໂອກາດ​ສະຫລອງ​ວັນ​ສະຖາປະນາ ສປປ ລາວ ຄົບຮອບ 40 ປີ ວັນ​ທີ 2 ທັນວາ 2015, ເຊິ່ງຈະ​ປະກອບສ່ວນ​ສຳຄັນ ​ແກ່​ການ​ພັດທະນາ​ເສດຖະກິດ-​ສັງຄົມ ຂອງ​ລາວ ​ໃຫ້​ມີ​ການ​ເຕີບ​ໂຕ ​ແລະ ມີ​ຄວາມ​ກ້າວໜ້າ.​

ສປປ ລາວ ​ແລະ ສປ ຈີນ ​ແມ່ນ​ປະຊາ​ຄົມ​ຮ່ວມ​ຊະ​ຕາ​ກຳ​ ທີ່​ໄວ້​ເນື້ອ​ເຊື່ອ​ໃຈ​ເຊິ່ງກັນ ​ແລະ ກັນ, ຍຸດ​ທະ​ສາດ​ທີ່​ຫັນ​ອອກ​ຈາກ​ປະ​ເທດ​ບໍ່ມີ​ທາງ​ອອກ​ສູ່​ທະ​ເລ ກາຍ​ເປັນ​ປະ​ເທດ​ເຊື່ອມ​ຕໍ່​ໃນ​ອານຸພາກ​ພື້ນ ຂອງ​ປະ​ເທດ​ລາວ ​ແມ່ນ​ຕິດ​ພັນ​ກັບ​ຂໍ້​ລິ​ເລີ່​ມ ໜຶ່ງ​ແລວ​ທາງ ໜຶ່ງ​ເສັ້ນທາງ ຂອງ​ຈີນ​ຢ່າງ​ແໜ້ນ​ແຟ້ນ ​ເຊິ່ງ​ໄດ້​ເຮັດ​ມີ ໂຄງການ​​ລົດ​ໄຟ​ ລາວ-ຈີນ​ ກໍາເນີ​ດ​ເກີດ​ຂຶ້ນ ​ແລະ ມີ​ຜົນສຳ​ເລັດ​ເປັນ​ກ້າວໆ.

 

 

ຂໍ້ມູນຈາກ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)