GMT+7 23/04/2018 10:35

ປີຜ່ານມາ ກາແດງແຂວງວຽງຈັນ ຮັບບໍລິຈາກເລືອດໄດ້ເກືອບ 3.000 ຖົງ

 

 

ໃນປີ 2017 ຜ່ານມາອົງການ​ກາ​ແດງ​ແຂວງ​ວຽງ​ຈັນ ໄດ້ເຄື່ອນໄຫວຮັບບໍລິຈາກເລືອດ ພາຍໃນແຂວງໄດ້ເກືອບ 3.000 ຖົງ,​ ແຕ່​​​ກໍຍັງ​ບໍ່​ທັນພຽງພໍ​ ກັບ​ຄວາມ​ຮຽກຮ້ອງ​ຕ້ອງການຕົວຈິງ ເຊິ່ງໄລຍະ​​ທີ່​ຂາດ​ເລືອດ ​ແມ່ນ​ຢູ່​ລະຫວ່າງ ເດືອນມິຖຸນາ​ ຫາ​ ເດືອນ​ຕຸລາ​ຂອງ​ທຸກ​ໆປີ.


ທ່ານ ບຸນ​ເນົາ​ ພະ​ຈອມພົນ ​ຫົວໜ້າ​ອົງການ​ກາ​ແດງ​ ແຂວງ​ວຽງ​ຈັນ ໄດ້ໃຫ້ຮູ້​ໃນ​ກອງ​ປະຊຸມ​ ສະຫລຸບ​ວຽກ​ງານ​ສູນ​ເລືອດ​ ​ໃນ​ວັນ​ທີ 9 ມັງ​ກອນ 2018 ນີ້ວ່າ:​ ໃນ​ປີ 2017ຜ່ານ​ມາ​ ​ການ​ຮັບ​ບໍລິຈາກ​ເລືອດ​ໃນ ​ແຂວງ​ວຽງ​ຈັນ ​ຖືກ​ຈັດ​ຕັ້ງ​ປະຕິບັດ​ ຢ່າງ​ມີ​ຜົນສຳ​ເລັດ​ ສະ​ແດງ​ອອກ​ໃນ​ຕົວ​ເລ​ກ ຮັບ​ບໍ​ລິ​ຈາກ​ເລືອດ​ມີ​ເຖິງ 2.975 ຖົງ​​ ລື່ນ​ແຜນການ​ທີ່​ວາງ​ໄວ້​ເກັບ 600 ຖົງ ຈາກ​ການ​ລົງ​ຮັບ​ບໍ​ລິ​ຈາກ​ທັງ​ໝົດ 109 ຄັ້ງ​​, ເຊິ່ງເລືອດ​ທີ່​ຈາກການຮັບບໍລິຈາກ ແມ່ນ​ໄດ້​ສະໜອງ​ໃຫ້​ໂຮງໝໍ ​ແຂວງ​ວຽງ​ຈັນ,​ ໂຮງໝໍ​ເມືອງ​ວັງ​ວຽງ, ​ໂຮງ ໝໍ​ເມືອງ​ຊະນະ​ຄາມ,​ ໂຮງໝໍ​ມິ​ຕະພາບ​, ໂຮງ​ໝໍ​ເສດ​ຖາ,​ ໂຮງໝໍ​ມະ​ໂຫສົດ​, ໂຮງໝໍ​ໄຊ​ມັງ​ກອນ ​ແລະ​ໂຮງໝໍ​​ແຂວງ​ຕ່າງໆ​ ​ເມື່​ອທຽບຕົວ​ເລກ​ເລືອດ​ທີ່ຮັບ​ບໍລິຈາ​ກ​ກັບ​ຈຳນວນ​ທີ່​ຕ້ອງການ​ແມ່ນ​ຍັງ​ບໍ່​ພຽງພໍ.


ທ່ານ​ຫົວໜ້າ​ຫ້ອງການ​ກາ​ແດງ​ແຂວງ​ວຽງ​ຈັນ ຍັງໃຫ້ຮູ້ອີກ​ວ່າ: ຄົນ​ເຈັບ​ທີ່​ຕ້ອງການ​ເລືອດ​ຫລາຍ​ກວ່າ​ໝູ່​ ແມ່ນ​ປະ​ເພດ​ຂາດ​ເລືອດ​ຊຳ​ເຮື້ອ (ປ້າງ​ກິ​ນເລືອດ),​ ເລືອດ​ຈາງ, ຜ່າຕັດ, ຟອກໝາກ​ໄຂ່​ຫລັງ ​ແລະ​ອຸບັດ​​ເຫດ​ຕ່າງໆ. ​​ເຖິງ​ແມ່ນ​ວ່າ​ຕົວ​ເລກ​ຮັບ​ບໍລິຈາ​ກ​ເລືອດຈະ​ໄດ້​ລື່ນ​ແຜນກໍ່ຕາມ ​ແຕ່​ວ່າ​​ໃນ​ຊ່ວງ​ເດືອນ​ມິ​ຖຸນາ ຫາເດືອນ​ຕຸລາ​ຂອງ​ທຸກ​ໆປີ​ ຈະ​ມີ​ບັນຫາ​ເລື່ອງ​ການ​ຂາດ​ເລືອດ​ເພາະ​ໃນ​ຊ່ວງ​ນີ້ ​ມັກ​ມີ​ພະຍາດ​ໄຂ້​ເລືອດ​ອອກ​ລະບາດ​ ເຊິ່ງມີ​ຄວາມ​ຕ້ອງການ​ເລືອດ​ຫລາຍ,​ ແຕ່​ກົງກັນ​ຂ້າມ​ຈຳນວນ​ຜູ້​ບໍລິຈາກ​ເລືອດ​ ສ່ວນ​ຫລາຍ​ແມ່ນ​ນັກຮຽນ​-ນັກ​ສຶກສາ​ ແຕ່ພັດເປັນ​ໄລຍະ​ພັກ​ຮຽນ​ ເຊິ່ງພາ​ໃຫ້ມີ​ບັນຫາ​ຂາດ​ເລືອດ.

 

 

ຂໍ້ມູນຈາກ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)