GMT+7 23/01/2018 07:23

ໝາກຕາວ ສິນຄ້າຄຸນະພາບດີ ສົ່ງອອກຂາຍຕ່າງປະເທດ

 

 

ເສັ້ນທາງ​ຫຼວງ​ແຫ່ງ​ຊາດ R3 ຖື​ວ່າ​ເປັນ​ເສັ້ນທາງ​ຫຼັກ ແລະ ສຳຄັນ​ໃນ​ການ​ຄົມມະນາຄົມ​ທີ່​ປະຊາ​ຊົນ​ແຂວງ​ພາກ​ເໜືອ ໄດ້​ຮັບ​ຜົນ​ປະໂຫຍດ​ຢ່າງ​ແທ້​ຈິງ ອັນ​ເຮັດ​ໃຫ້ຊີວິດ​ການ​ເປັນ​ຢູ່​ນັບ​ມື້​ດີ​ຂຶ້ນ​ລວມ ທັງ​ວຽກ​ງານ​ການ​ຂົນສົ່ງ​ສິນຄ້າ ອອກ​ສູ່​ຕ່າງປະເທດ​ຂອງ​ປະຊາຊົນ​ບັນດາເຜົ່າ ​ກໍ່​ໄດ້​ຮັບ​ການ​ປັບປຸງ​ເຊັ່ນ​ກັນ ໂດຍ​ເສັ້ນທາງ​ນີ້​ເປີດນຳ​ໃຊ້​ແຕ່​ປີ 2008 ເປັນຕົ້ນ​ມາ ໂດຍ​ການ​ກູ້​ຢືມ​ເງິນ​ດອກ​ເບ້ຍ​ຕ່ຳຈາກ​ທະນາຄານ​ພັດທະນາ​ອາຊີ ລັດຖະບານ​ຈີນ ແລະ ລັດຖະບານໄທ ລວມ​ມູນ​ຄ່າ 95 ລ້ານ​ໂດ​ລາສະຫະລັດ ຫຼື ປະມານ 480 ຕື້​ກີບ.

ທ່ານ ບຸນ​ໂຮມ ກັນ​ທະ​ວົງ ປະທານ​ບໍລິສັດ ກັນ​ທະ​ວົງ​ສົ່ງເສີມການ​ຜະລິດ ແລະ ປຸງ​ແຕ່ງ​ສິນຄ້າກະສິກຳ ​ຈຳກັດ ຢູ່​ບ້ານ​ໜອງ​ຄຳ ເມືອງ​ວຽງ​ພູ​ຄາ ແຂວງ​ຫຼວງ​ນ້ຳທາ ກ່າວ​ວ່າ: ຈາກ​ການ​ກໍ່ສ້າງ ແລະ ເປີດ​ນຳ​ໃຊ້​ເສັ້ນທາງ​ຫຼວງແຫ່ງ​ຊາດ R3 ແຕ່​ປີ 2008 ເປັນຕົ້ນ​ມາ ປະຊາຊົນ ກໍ່​ຄືບໍລິສັດພວກ​ເຮົາ​ໄດ້​ຮັບ​ຜົນ​ປະໂຫຍດ​ທັງທາງ​ກົງ ແລະ ທາງ​ອ້ອມ ການດຳເນີນ​ທຸລະ​ກິດ​ກໍ່​ມີ​ການ​ຂະຫຍາຍ​ຕົວຢ່າງ​ຕໍ່​ເນື່ອງ ໂດຍ​ສະເພາະ ໄດ້​ສ້າງ​ຄວາມ​ສະດວກສະບາຍ​ແກ່​ການ​ຂົນສົ່ງ​ສິນຄ້າສູ່​ຕ່າງປະເທດ ຫຼຸດຜ່ອນ​ຕົ້ນ​ທຶນ ແລະ ທີ່​ສຳຄັນ​ໄລຍະ​ການ​ຂົນສົ່ງສັ້ນ​ລົງ ເຮັດ​ໃຫ້​ຄຸນະພາບ​ຂອງຜົນ​ຜະລິດ​ສິນຄ້າ​ກະສິກຳ​ສູງ​ຂຶ້ນລາຄາ​ດີ ແລະ ໄດ້​ສົ່ງ​ຜົນ​ໃຫ້​ປະຊາ​ຊົນ​ທີ່​ເກັບ​ໝາກ​ຕາວ​ມາ​ປ້ອນ ໃຫ້​ບໍລິສັດມີ​ລາຍ​ຮັບ​ສູງ​ຂຶ້ນ​ເຊັ່ນກັນ ປັດຈຸບັນ ບໍລິສັດ​ໄດ້​ເກັບ​ຊື້ຜົນ​ຜະລິດ​ໝາກ​ຕາວ​ຈາກ​ປະຊາຊົນ​ໃນ​ລາຄາ​ກິ​ໂລ​ລະ 4-5 ພັນກີບ ການ​ເກັບ​ຊື້​ນັບ​ແຕ່​ເດືອນ​ທັນວາຫາເດືອນ​ເມສາ​ຂອງ​ທຸກ​ປີ ແຕ່​ລະ​ປີ​ບໍລິສັດ​ໄດ້​ສົ່ງ​ອອກໝາກ​ຕາວ​ໃຫ້​ປະເທດ​ໄທ ຈຳນວນ 500-600 ໂຕນ ມູນ​ຄ່າ​ປະມານ 27.000 ບາດຕໍ່​ໂຕນ ເຊິ່ງ​ໄດ້​ສ້າງ​ລາຍ​ຮັບ​ແກ່​ບໍລິສັດປະມານ​ປີ​ລະ 4 ຕື້​ກີບ ພ້ອມ​ດຽວກັນ​ນັ້ນ ບໍລິສັດ​ຍັງ​ໄດ້​ຮັບ​ຊື້​ດອກແຂມ (ສຳລັບ​ເຮັດ​ເປັນ​ຟອຍກວາດ​ເຮືອນ) ນຳ​ປະຊາຊົນ ໃນກິ​ໂລ​ລະ 4.000 ກີບ ແລະ ໃນອະນາຄົດ ບໍລິສັດ​ມີ​ແຜນ​ຂະຫຍາຍ​ການ​ຜະລິດ​ໃຫ້​ມີ​ຄວາມເຂັ້ມແຂງ ແລະ ຍືນ​ຍົງ ໂດຍ​ປຸກລະດົມ​ໃຫ້​ປະຊາຊົນ​ປູກ​ໝາກຕາວ ແລະ ພືດ​ກະສິກຳ​ອື່ນໆ​ເປັນສິນຄ້າ ເພື່ອ​ສ້າງ​ລາຍ​ຮັບ​ໃຫ້​ເຂົາເຈົ້າ ແລະ ເປັນ​ການ​ປະກອບສ່ວນ​ສ້າງ​ເສດຖະກິດ-ສັງຄົມ ຂອງ​ເມືອງ ແລະ ແຂວງ​ໃຫ້​ເຕີບໃຫຍ່​ຂະຫຍາຍຕົວ​ຍິ່ງ​ຂຶ້ນ​ ຕາມແນວທາງ​ນະໂຍບາຍ​ຂອງ​ພັກ-ລັດ​ວາງ​ອອກ​ໃຫ້​ປາກົດ​ຜົນ​ເປັນຈິງ.

 

 

 

ຂໍ້ມູນຈາກ: ວຽງຈັນໃຫມ່

ຄວາມຄິດເຫັນຂອງຜູ້ອ່ານ (0)