GMT+7 23/04/2018 10:44

ໂຮງແຮມອາມາຣີວັງວຽງແກຣນ ຈະເປີດໃຫ້ບໍລິການໄວໆນີ້

 

 

ເມື່ອ​ບໍ່​ດົນ​ມາ​ນີ້ ໂຮງແຮມອາ​ມາ​ຣີ​ວັງ​ວຽງ​ແກຣນ (Amari Vangvieng Grand Hotel) ໄດ້​ຈັດ​ພິທີ​ທາງ​ສາສະໜາ​ເອົາ​ເລີກ​ເອົາ​ໄຊ ແລະ ທົດ​ລອງ​ເປີດ​ໃຫ້​ບໍລິການ​ລູກ​ຄ້າ ເພື່ອ​ກະກຽມ​ຄວາມ​ພ້ອມ​ໃຫ້​ດີ​ທີ່​ສຸດ ​ໃນ​ການ​ຮອງ​ຮັບ​ບັນດາ​ລູກ​ຄ້າ​ພາຍ​ໃນ ແລະ ຕ່າງປະເທດ ທັງ​ເປັນ​ການ​ສະເຫຼີມສະຫຼອງ ​ໃນ​ໂອກາດ​ສົ່ງ​ທ້າຍ​ປີ​ເກົ່າ ​ແລະ ຕ້ອນຮັບ​ປີ​ໃໝ່​ສາກົນ ກໍ່​ຄື​ການ​ເປີດ​ປີ​ທ່ອງ​ທ່ຽວ​ລາວ 2018 ກ່ອນ​ທີ່​ຈະ​ມີ​ການ​ເປີດ​ໃຫ້​ບໍລິການ​ໂຮງແຮມ​ດັ່ງກ່າວ​ເປັນ​ທາງ​ການ​ໃນ​ໄວໆ​ນີ້.

ທ່ານ ຄຳ​ໄຕ ແກ້ວ​ດວງ​ດີ ຮອງ​ປະທານ​ກຸ່ມ​ບໍລິສັດ ຕັງ​ຈະເລີນ ຈຳກັດ ໃຫ້​ສຳພາດ​ເມື່ອ​ບໍ່​ດົນ​ນີ້​ວ່າ: ໂຮງແຮມອາ​ມາ​ຣີ​ວັງ​ວຽງ​ແກຣນ ເປັນ​ໂຮງແຮມ​ທີ່​ທັນ​ສະໄໝ​ໄດ້​ມາດຕະຖານ​ສາກົນ ຕັ້ງ​ຢູ່​ລຽບ​ແຄມ​ນ້ຳ​ຊອງ ເມືອງ​ວັງ​ວຽງ​ແຂວງ​ວຽງ​ຈັນ ມີ​ຂະໜາດ 6 ຊັ້ນ 160 ຫ້ອງ​ພັກ ພ້ອມ​ທັງ​ມີ​ຫ້ອງ​ປະຊຸມ​ຂະໜາດ​ໃຫຍ່-ນ້ອຍ ເພື່ອ​ຮອງ​ຮັບ​ການ​ຈັດ​ປະຊຸມ ສຳ​ມະ​ນາ ແລະ ງານ​ອີ​ເວັນ​ຕ່າງໆ ນອກ​ນີ້​ຍັງ​ມີ​ຟິດ​ເນັດ ສະ​ປາ ສະ​ລອຍນ້ຳ ແລະ ສິ່ງ​ອຳນວຍ​ຄວາມ​ສະດວກ​ແບບ​ຄົບ​ຊຸດ ຈຸດ​ເດັ່ນ​ແມ່ນ​ມີ​ຫ້ອງ​ພັກ​ທີ່​ທັນ​ສະໄໝ ​ໄດ້​ມາດຕະຖານ​ສາກົນ ພ້ອມ​ກັບ​ວິວ​ແມ່ນ້ຳ​ຊອງ ພູຜາ ທຳ​ມະ​ຊາດ​ທີ່​ອຸດົມສົມບູນ ແລະ ອາກາດ​ສົດຊື່ນ​ຕະຫຼອດ​ປີ ມີ​ອາຫານ​ລາວ ອາຫານ​ນາໆຊາດ ພ້ອມ​ເຄື່ອງ​ດື່ມ​ ແລະ ການ​ບໍລິການ​ທີ່​ໄດ້​ມາດຕະຖານ​ສາກົນ ທັງ​ຕັ້ງ​ຢູ່​ໃກ້​ສະຖານທີ່​ທ່ອງ​ທ່ຽວ​ທີ່​ສຳຄັນ ເປັນຕົ້ນ​ນ້ຳຕົກ​ແກ້ງ​ຫຍຸຍ ຖ້ຳ​ລົມ ຖ້ຳ​ປູ​ຄຳ ຜ່າ​ເງິນ ສວນ​ໝາກກ້ຽງ ຕະຫຼາດ ແລະ ສະຖານທີ່​ທ່ອງ​ທ່ຽວ​ອື່ນໆ.

ໂຮງແຮມ ອາ​ມາ​ຣີ​ວັງ​ວຽງ​ແກຣນ ແມ່ນ​ໜຶ່ງ​ໃນ​ບັນດາ​ໂຮງແຮມ​ທີ່​ກຸ່ມ​ບໍລິສັດ ຕັງ​ຈະເລີນ ຈຳກັດ ເປັນ​ຜູ້​ລົງທຶນ​ພັດທະນາ ເຊິ່ງ​ດຳເນີນ​ງານ​ໂດຍ​ທີມ​ງານ ONYX ປັດຈຸບັນ​ແມ່ນ​ຢູ່​ໃນ​ໄລຍະ​ເປີດ​ທົດ​ລອງ​ໃຫ້​ບໍລິການ​ລູກ​ຄ້າ ແລະ ຄາດ​ວ່າ​ຈະ​ເປີດ​ນຳ​ໃຊ້​ເປັນ​ທາງ​ການ​ໃນ​ໄວໆ​ນີ້ ເພື່ອ​ຮອງ​ຮັບ​ນັກ​ທ່ອງ​ທ່ຽວ​ຈາກ​ທົ່ວ​ທຸກ​ມຸມ​ໂລກ ສະນັ້ນ​ ບັນດາ​ທ່ານ​ທີ່​ມີຄວາມ​ສົນໃຈ​ ກໍ່​ສາມາດ​ມາ​ສຳຜັດ​ກັບ​ຄວາມ​ສະດວກ​ສະບາຍ ແລະ ການ​ບໍລິການ​ແບບ​ມື​ອາຊີບ.

 

 

 

ຄວາມຄິດເຫັນຂອງຜູ້ອ່ານ (0)