GMT+7 23/04/2018 10:41

ປີ 2017 ໄອຍະການປະຊາຊົນສາລະວັນ ແກ້ໄຂຄະດີ 253 ເລື່ອງ

 

 

ໃນປີ 2017 ຜ່ານມາ, ອົງການໄອຍະການປະຊາຊົນ ແຂວງສາລະວັນ ໄດ້ຮັບສຳນວນອາຍາຄະດີ ທັງໝົດ 269 ເລື່ອງ, ໄດ້ແກ້ໄຂແລ້ວ 253 ເລື່ອງ, ຄະດີທີ່ພົ້ນເດັ່ນແມ່ນ ຄະດີຢາເສບຕິດ 135 ເລື່ອງ ກວມ 51,92% ຂອງຄະດີທົ່ວແຂວງ ແລະ ເທົ່າກັບ 82,31% ຂອງຄະດີຂັ້ນແຂວງ. ຂະນະດຽວກັນສານປະຊາຊົນແຂວງ ໄດ້ຮັບສຳນວນຄະດີທັງໝົດ 190 ເລື່ອງ ໃນນັ້ນຄະດີອາຍາ 156 ເລື່ອງ, ຂັ້ນອຸທອນ 3 ເລື່ອງ, ຄະດີແພ່ງ 19 ເລື່ອງ, ຄະດີຄອບຄົວ 10 ເລື່ອງ, ຄະດີການຄ້າຂັ້ນຕົ້ນ 1 ເລື່ອງ, ຄະດີເດັກ 4 ເລື່ອງ.

 
ຜ່ານການກວດກາ ແລະ ປະເມີນຜົນການແກ້ໄຂຄະດີຂອງສານ ໄລຍະຜ່ານມາເຫັນວ່າ ການພິຈາລະນາຄະດີ ຂອງສານປະຊາຊົນ ມີຄວາມວ່ອງໄວ, ມີຄຸນນະພາບເຮັດໃຫ້ໂຈດ ແລະ ຈຳເລີຍ ມີຄວາມພໍໃຈ ຕໍ່ການຕັດສິນຂອງສານ. ນອກຈາກການແກ້ໄຂບັນຫາຄະດີຕ່າງໆແລ້ວ, ຄະນະພັກອຳນາດການປົກຄອງແຕ່ລະຂັ້ນ, ຂະແໜງການ ແລະ ທ້ອງຖິ່ນໄດ້ນຳເອົາແນວທາງ ປ້ອງກັນຊາດ-ປ້ອງກັນ ຄວາມສະຫງົບ ໄດ້ສຶກສາອົບຮົມໃຫ້ ພະນັກງານ-ລັດຖະກອນ, ປະຊາຊົນບັນດາເຜົ່າ ໄດ້ຮັບຮູ້ເຊື່ອມຊຶມໄດ້ຫລາຍຮູບຫລາຍວິທີ, ແຕ່ລະຂະແໜງການ ແລະ ກົມກອງຮອດຮາກຖານບ້ານ.


ຂໍ້ມູນດັ່ງກ່າວ ໄດ້ຮັບການລາຍງານ ໃນກອງປະຊຸມຄົບຄະນະ ກຳມະການຍຸຕິທຳ ແລະ ປ້ອງກັນຊາດ-ປ້ອງກັນຄວາມສະຫງົບ ໃນທ້າຍອາທິດຜ່ານມາ ພາຍໃຕ້ການເປັນປະທານຂອງ ທ່ານ ຄຳເຫລັກ ອິນດາວົງ ກຳມະການພັກແຂວງ ປະທານສະພາປະຊາຊົນແຂວງ, ມີ ທ່ານນາງ ສູນໄຖ ໄຊຍະແສງ ຮອງປະທານສະພາປະຊາຊົນແຂວງ ຜູ້ຊີ້ນຳວຽກງານຍຸຕິທຳ, ມີບັນດາ ສສຊ ແລະ ສສຂ  ພ້ອມດ້ວຍຄະນະກຳ ມະການຍຸຕິທຳ  ແລະ ພະນັກງານວິຊາການເຂົ້າຮ່ວມ.

 

 

ຂໍ້ມູນຈາກ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)