GMT+7 23/01/2018 07:19

ນັກໂທດ ຄ້າຍຄຸມຂັງ-ດັດສ້າງ ແຂວງວຽງຈັນ ໄດ້ຮັບການອະໄພຍະໂທດ

 

 

ບັນດານັກໂທດ ຢູ່ຄ້າຍຄຸມຂັງ-ດັດສ້າງ ແຂວງວຽງຈັນ ຈຳນວນ 87 ຄົນ, ຍິງ 15 ຄົນ ໄດ້ຮັບອະໄພຍະໂທດ ເນື່ອງໃນໂອກາດ ວັນຊາດທີ 2 ທັນວາ ຄົບຮອບ 42 ປີ ຕາມດໍາລັດຂອງ ປະທານປະເທດ ປະຈໍາປີ 2017 ໃນນີ້, ນັກໂທດທີ່ໄດ້ຮັບ ການອະໄພຍະໂທດ ຫລຸດຜ່ອນໂທດ ມີ 75 ຄົນ, ຍິງ 14 ຄົນ, ນັກໂທດທີ່ໄດ້ຮັບການອະໄພຍະໂທດ ປ່ອຍຕົວມີ 12 ຄົນ, ຍິງ 1 ຄົນ ເຊິ່ງສ່ວນຫລາຍແມ່ນ ນັກໂທດຂໍ້ຫາຢາເສບຕິດ.


ໃນວັນທີ 26 ທັນວາ 2017, ແຂວງວຽງຈັນ ໄດ້ຈັດພິທີຜ່ອນໂທດ ແລະ ປ່ອຍໂຕນັກໂທດ ຈຳນວນດັ່ງກ່າວ ຢູ່ຄ້າຍຄຸມຂັງ-ດັດສ້າງດັ່ງກ່າວ ໂດຍການເປັນປະທານຂອງ ທ່ານ ຂັນທະວີ ວິໄລສັກ ຫົວໜ້າອົງການໄອຍະການ ປະຊາຊົນ ແຂວງວຽງຈັນ, ມີຄະນະກຳມະການ ອະໄພຍະໂທດຂັ້ນແຂວງ ແລະ ບັນດານັກໂທດ ທີ່ໄດ້ຮັບການອະໄພຍະໂທດ, ຜ່ອນໂທດ ແລະ ປ່ອຍຕົວເຂົ້າຮ່ວມ. ເຊິ່ງການອະໄພຍະໂທດນີ້ ເປັນການປະຕິບັດ ນະໂຍບາຍມະນຸດສະທຳ ດ້ວຍການ ຜ່ອນໂທດ ແລະ ການປ່ອຍຕົວນັກໂທດ ຕາມລັດຖະດຳລັດ ຂອງປະທານປະເທດ ເນື່ອງໃນໂອກາດວັນສຳຄັນຂອງຊາດ ກໍຄື ວັນຊາດທີ 2 ທັນວາ ຂອງແຕ່ລະປີ.


ທ່ານ ຄໍາໃບ ທໍາມະວົງ ຮອງປະທານສານປະຊາຊົນ ແຂວງວວຽງຈັນ ໄດ້ໃຫ້ຮູ້ວ່າ: ທົ່ວແຂວງວຽງຈັນ ມີນັກໂທດທັງໝົດ 439 ຄົນ, ຍິງ 63 ຄົນ (ຕ່າງປະເທດ 2 ຄົນ). ໃນນັ້ນ ນັກໂທດຂໍ້ຫາຢາເສບຕິດ ມີ 330 ຄົນ, ຍິງ 55 ຄົນ, ຕ່າງປະເທດ 2 ຄົນ, ນັກໂທດຂໍ້ຫາທົ່ວໄປ 109 ຄົນ, ຍິງ 8 ຄົນ.

 

 

ຂໍ້ມູນຈາກ: ສຳນັກຂ່າວສານປະເທດລາວ

 

ຄວາມຄິດເຫັນຂອງຜູ້ອ່ານ (0)