GMT+7 24/04/2018 08:10

ນັກໂທດ 400 ກວ່າຄົນ ໄດ້ຮັບການຫຼຸດຜ່ອນໂທດ ແລະ ປ່ອຍຕົວ

 

 

ນສພ ຄວາມສະຫງົບລາຍງານວ່າ: ກົມຕຳຫຼວດຄຸມຂັງ-ດັດສ້າງ ກະຊວງ ປກສ ຈັດພິທິອະໄພຍະໂທດຫຼຸດຜ່ອນ ແລະ ປ່ອຍຕົວນັກໂທດທັງໝົດ 400 ກວ່າຄົນ. ໃນນີ້, 100 ຄົນແມ່ນໄດ້ຮັບການປ່ອຍຕົວ ໃນວັນທີ 22 ທັນວາ 2017 ໂດຍການເຂົ້າຮ່ວມເປັນປະທານຂອງ ພົຈວ ປອ ສົມຫວັງ ທໍາມະສິດ ຮອງລັດຖະມົນຕີ ກະຊວງ ປກສ, ມີຄະນະກົມຄຸມຂັງ-ດັດສ້າງ, ພາກສ່ວນທີ່ກ່ຽວຂ້ອງ, ຕະຫຼອດຮອດພໍ່-ແມ່ ແລະ ນັກໂທດທີ່ໄດ້ຮັບການອະໄພຍະໂທດເຂົ້າຮ່ວມ.

ພັອ ສົມລິດ ດາວຮຸ່ງສຸລິ ຫົວໜ້າກົມຄຸມຂັງ-ດັດສ້າງ ກະຊວງ ປກສ ໃຫ້ຮູ້ວ່າ: ການອະໄພຍະໂທດໃຫ້ແກ້ນັກໂທດ ປະຈໍາປີ 2017 ຄັ້ງນີ້ ອີງຕາມລັດຖະດໍາລັດຂອງປະທານປະເທດ ເລກທີ 268/ປປທ ລົງວັນທີ 24 ພະຈິກ 2017 ວ່າດ້ວຍການອະໄພຍະໂທດ ແກ່ນັກໂທດທີ່ມີຄວາມກ້າວໜ້າໃນຂອບເຂດທົ່ວປະເທດ ເນື່ອງໃນໂອກາດວັນຊາດ ຄົບຮອບ 42 ປີ ທັງເປັນການປະຕິບັດນະໂຍບາຍດ້ານມະນຸດສະທໍາຂອງພັກ-ລັດເຮົາ, ພ້ອມທັງເປັນການສຶກສາອົບຮົມນັກໂທດໃຫ້ເຫັນໄດ້ແນວທາງອັນຖືກຕ້ອງ ແລະ ເປັນທໍາຂອງພັກ-ລັດ, ເຮັດໃຫ້ນັກໂທດບຸກບືນຕົວຝຶກຝົນຫຼໍ່ຫຼອມດັດສ້າງຕົນເອງ ໃຫ້ກາຍເປັນພົນລະເມືອງດີຂອງຊາດ, ຂອງສັງຄົມ ແລະ ສາກົນ, ໃຫ້ຮັບຮູ້ ແລະ ເຂົ້າໃຈຕໍ່ແນວທາງນະໂຍບາຍດ້ານມະນຸດສະທໍາ, ສໍາລັບຜູ້ທີ່ໄດ້ຮັບການອະໄພຍະໂທດ ເລີ່ມຈາກການຝຶກຝົນຫຼໍ່ຫຼອມດັດສ້າງຕົວຈິງ ນັກໂທດແຕ່ລະຄົນມີການຮ່ວມຊີວິດການເມືອງ, ຄັດເລືອກປະເພດແຕ່ລະອາທິດ ເພື່ອສໍາຫຼວດຕີລາຄາແບ່ງປະເພດ 1 ຫາ 3 ໂດຍມີເຈົ້າໜ້າທີ່ຮັບຜິດຊອບ ເພື່ອມາສົມທຽບມາດຖານທີ່ທາງຄະນະກໍາມະການອະໄພຍະໂທດລະດັບຊາດ ວາງອອກ ເພື່ອຄັດເລືອກ ແລ້ວຂຶ້ນບັນຊີສະເໜີຈໍານວນນັກໂທດທີ່ມີເງື່ອນໄຂຕາມຂັ້ນຕອນ.

ໃນປີ 2017, ກົມຕຳຫຼວດຄຸມຂັງ-ດັດສ້າງ ກະຊວງ ປກສ ມີນັກໂທດທີ່ໄດ້ຮັບການອະໄພຍະໂທດຫຼຸດຜ່ອນ ແລະ ປ່ອຍຕົວນັກໂທດທັງໝົດມີ 460 ຄົນ ຍິງ 77 ຄົນ. ໃນນີ້, ຫຼຸດຜ່ອນໂທດ ຈໍານວນ 360 ຄົນ ຍິງ 66 ຄົນ, ຄົນຕ່າງປເທດ 14 ຄົນ ຍິງ 6 ຄົນ ປະກອບມີຄະດີຢາເສບຕິດ 324 ຄົນ ຍິງ 61 ຄົນ ຕ່າງປະເທດ 11 ຄົນ ຍິງ 6 ຄົນ, ຄະດີທົ່ວໄປ 36 ຄົນ ຍິງ 5 ຄົນ, ຕ່າງປະເທດ 3 ຄົນ, ນັກໂທດຕັດອິດສະລະພາບຕະຫຼອດຊີວິດ ລົງມາໂທດ 20 ປີ ມີ 16 ຄົນ ຍິງ 4 ຄົນ ແລະ ຈໍານວນທີ່ໄດ້ຮັບການປ່ອຍຕົວທັງໝົດ 100 ຄົນ ຍິງ 11 ຄົນ ຕ່າງປະເທດ 3 ຄົນ ໃນນັ້ນ ຄະດີຢາເສບຕິດ 89 ຄົນ ຍິງ 10 ຄົນ, ຕ່າງປະເທດ 1 ຄົນ ແລະ ຄະດີທົ່ວໄປມີ 11 ຄົນ ຍິງ 1 ຄົນ ແລະ ຕ່າງປະເທດ 2 ຄົນ.

ໂອກາດດຽວກັນນີ້, ພົຈວ ປອ ສົມຫວັງ ທໍາມະສິດ ໃຫ້ກຽດມອບໃບປ່ອຍຕົວ ແລະ ໂອ້ລົມແກ່ນັກໂທດຜູ້ທີ່ໄດ້ຮັບການຫຼຸດຜ່ອນໂທດ ແລະ ປ່ອຍຕົວວ່າ ພາຍໄດ້ຮັບການປ່ອຍຕົວ ແລ້ວໃຫ້ເພີ່ມສະຕິໃນການດໍາລົງຊີວິດຮູ້ດີ ແລະ ຮູ້ຊົ່ວ ຮູ້ແລກປ່ຽນກັບຄອບອອ້ມຂ້າງ ແລະ ສັງຄົມ ນໍາໄປພັດທະນາຊີວິດຕົນເອງ ແລະ ອັນໃດດີໃຫ້ສົ່ງເສີມ, ເສີມຂະຫຍາຍ ແລະ ຍາດແຍ່ງ ແລະ ອັນໃດຊົ່ວໃຫ້ຮູ້ປະຕິເສດ ມີອຸດົມຄະຕິຢູ່ໃນໃຈບໍ່ກັບມາກະທໍາຜິດໃນຮູບແບບເກົ່າ ແລະ ໃໝ່ ທີ່ຂັດຕໍ່ລະບຽບກົດໝາຍບ້ານເມືອງ, ສໍາລັບຜູ້ທີ່ໄດ້ຮັບການຫຼຸດຜ່ອນໂທດ ໃຫ້ຝຶກຝົນຫຼໍ່ຫຼອມຕົນເອງ ເພື່ອໃຫ້ໄດ້ຮັບການປ່ອຍຕົວໃນໂອກາດຕໍ່ໄປ.

 

 

ຂໍ້ມູນຈາກ: ຫນັງສືພິມຄວາມສະຫງົບ

ຄວາມຄິດເຫັນຂອງຜູ້ອ່ານ (0)