GMT+7 27/05/2018 12:29

ປະເທດລຸ່ມແມ່ນ້ຳຂອງ ຮັບຮອງສາມເອກະສານສຳຄັນ

ວັນ​ທີ 14-16 ທັນວາ 2017 ຄະນະ​ຜູ້​ແທນ​ລາວ ນຳ​ໂດຍ​ທ່ານ ສະເຫຼີມ​ໄຊ ກົມ​ມະ​ສິດ ລັດ​ຖະ​ມົນຕີ​ວ່າການ​ກະຊວງ​ການ​ຕ່າງ​ປະເທດ ໄດ້​ເຂົ້າ​ຮ່ວມ​ກອງ​ປະຊຸມ​ລັດຖະ​ມົນຕີ​ຕ່າງປະເທດ​ ຂອບ​ການຮ່ວມ​ມື​ແມ່ນ້ຳ​ຂອງ-ແມ່ນ້ຳ​ລ້ານຊ້າງ ຄັ້ງ​ທີ 3 ທີ່​ຕ້າ​ຫຼີ່ ​ສປ ຈີນ ເປັນ​ປະທານ​ຮ່ວມ​ຂອງ​ທ່ານ ຫວາງ ອີ້ ລັດຖະມົນຕີ​ກະຊວງການ​ຕ່າງປະເທດ​ຈີນ ແລະ ທ່ານ ປຣາກ ໂຊ​ຄົນ ລັດຖະມົນຕີ​ອາ​ວຸໂສ ລັດຖະມົນຕີ​ກະຊວງ​ການຕ່າງປະເທດ ແລະ ການ​ຮ່ວມ​ມືສາກົນ​ ກຳປູເຈຍ ແລະ ມີ​ບັນດາລັດຖະມົນຕີ​ຕ່າງປະເທດ ພ້ອມດ້ວຍ​ຄະນະ​ຜູ້​ແທນ​ຈາກ​ປະເທດສະມາຊິກ ​ຂອບ​ການ​ຮ່ວມ​ມື​ແມ່ນ້ຳຂອງ-ແມ່ນ້ຳ​ລ້ານ​ຊ້າງ ຄື: ກຳປູເຈຍ ຈີນ ລາວ ມຽນ​ມາ ໄທ ແລະ ຫວຽດນາມ.

ກອງ​ປະຊຸມ​ຄັ້ງ​ນີ້ ໄດ້​ພ້ອມ​ກັນທົບ​ທວນຄືນ​ການຈັດຕັ້ງ​ປະຕິບັດຜົນ​ຂອງ​ກອງ​ປະຊຸມ​ຜູ້ນຳ​ປະເທດແມ່ນ້ຳ​ຂອງ-ແມ່ນ້ຳ​ລ້ານ​ຊ້າງ ຄັ້ງ​ທີ 1 ແລະ ຜົນ​ກອງ​ປະຊຸມ​ລັດຖະ​ມົນຕີ​ຕ່າງປະເທດ​ແມ່ນ້ຳ​ຂອງ-ແມ່ນ້ຳ​ລ້ານ​ຊ້າງ ຄັ້ງ​ທີ 2 ໂດຍສະເພາະແມ່ນ ​ຖະແຫຼງການ​ສັນຍາ​ບັນດາ​ໂຄງການ​ທີ່​ໄດ້​ຮັບ​ຜົນໄວ ​ທີ່​ລັດຖະບານ​ຈີນ​ໄດ້​ໃຫ້ການສະໜັບສະໜູນ​ໃນ​ປີຜ່ານມາ ລາວ​ເຮົາ​ໄດ້​ເຂົ້າ​ຮ່ວມ​ຈັດ​ຕັ້ງ​ປະຕິບັດ​ຫຼາຍ​ໂຄງການ ແລະ ໂຄງການ​ຈຳນວນ​ໜຶ່ງ ​ກໍ່​ຖືກ​ຈັດ​ຕັ້ງ​ປະຕິ​ບັດ​ຢູ່​ລາວ ເຊັ່ນ: ໂຄງການ​ປິ່ນປົວ​ແກ່ນ​ຕາ​ຂຸ້ນ ແລະ ໂຄງການທົດ​ລອງ​ແກ້​ໄຂ​ຄວາມທຸກ​ຍາກໃນ ລາວ-ຈີນ.

ພ້ອມ​ນີ້ ກອງ​ປະຊຸມ​ໄດ້​ປຶກສາຫາລື​ທິດ​ທາງ​ການ​ຮ່ວມ​ມື​ໃນ​ຕໍ່ໜ້າ ​ຂອງ​ການ​ຮ່ວມ​ມື​ແມ່ນ້ຳ​ຂອງ-ແມ່ນ້ຳ​ລ້ານ​ຊ້າງ ເປັນຕົ້ນ ການກະກຽມ​ດ້ານ​ຕ່າງໆ​ໃຫ້​ກອງ​ປະຊຸມ​ຜູ້ນຳ​ຂອບ​ການ​ຮ່ວມ​ມື​ແມ່ນ້ຳຂອງ-ແມ່ນ້ຳ​ລ້ານ​ຊ້າງ ຄັ້ງ​ທີ 2 ເຊິ່ງ​ຈະ​ຈັດ​ຂຶ້ນ​ໃນ​ເດືອນ​ມັງກອນ 2018 ທີ່​ກຳປູເຈຍ ແລະ ກອງ​ປະຊຸມ​ຄັ້ງ​ນີ້​ໄດ້​ຮັບຮອງ​ເອົາ 3 ເອກະສານ​ສຳຄັນ ຄື: ບົດ​ຖະແຫຼງ​ຂ່າວ​ຮ່ວມ​ຂອງ​ກອງ​ປະຊຸມລັດຖະມົນຕີ​ຕ່າງປະເທດ ​ຂອບການ​ຮ່ວມ​ມື​ແມ່ນ້ຳ​ຂອງ-ແມ່ນ້ຳ​ລ້ານ​ຊ້າງ ຄັ້ງ​ທີ 3 ບັນດາໂຄງການ​ທີ່​ໄດ້​ຮັບ​ການ​ສະໜັບສະ​ໜູນ​ຈາກ​ກອງ​ທຶນ​ພິເສດ​ ຂອບການ​ຮ່ວມ​ມື​ແມ່ນ້ຳ​ຂອງ-ແມ່ນ້ຳລ້ານ​ຊ້າງ​ປີ 2017 ແລະ ຂໍ້​ມູນຕິດຕໍ່​ສາຍ​ດ່ວນ​ກອງ​ເລຂາ​ແມ່ນ້ຳຂອງ-ແມ່ນ້ຳ​ລ້ານ​ຊ້າງ​ຂອງແຕ່​ລະ​ປະເທດ ເພື່ອ​ເປັນ​ພື້ນຖານການ​ຮ່ວມ​ມື​ໃນຕໍ່ໜ້າ.

 

ຂໍ້ມູນຈາກ: ວຽງຈັນໃໝ່

 

ຄວາມຄິດເຫັນຂອງຜູ້ອ່ານ (0)