ກຸ່ມຫັດຖະກຳ ຕ່ຳ​ແຜ່ນ-​ແພ ຝ້າຍ​ພື້ນ​ເມືອງ ບ້ານ​ນາ​ແກ່ນ​ຄຳ ​ເມືອງ​ຫົງ​ສາ ​ແຂວງ​ໄຊ​ຍະ​ບູລີ ສ້າງ​​ລາຍ​ຮັບ​ໃຫ້​ປະຊາຊົນ ຫລາຍລ້ານ​ກີບ ຕໍ່​ຄົນ​ຕໍ່​ເດືອ​ນ ພາຍຫລັງ​ທີ່​ບໍລິສັດ​​ໄຟຟ້າ​ຫົງ​ສາ ຈຳ​ກັດ ​ໄດ້​ຊຸກຍູ້​, ສົ່ງ​ເສີມ ​ແລະ ສ້າງ​ສິ່ງ​ອຳນວຍ​ຄວາມ​ສະດວກ​ຕ່າງໆ ​ເພື່ອ​ພັດທະນາ​ຊີວິດ​ການ​ເປັນ​ຢູ່ ຂອງ​ປະຊາຊົນ ​ໃຫ້​ດີ​ຂຶ້ນ​ເທື່ອ​ລະ​ກ້າວ.

ທ່ານ​ ນາງ ​ແສງ​ຈັນ ​ແສງ​ທາ​ແກ້ວ ຫົວໜ້າ​ກຸ່ມ​ຫັດຖະກຳ ຕ່ຳ​ແຜ່ນ-​ແພ ຝ້າຍ​ພື້ນ​ເມືອງ ​ໄດ້​ໃຫ້​ສຳພາດ ຕໍ່​ສື່​ມວນ​ຊົນ ​ເມື່ອ​ບໍ່​ດົນ​ມາ​ນີ້​ວ່າ: ນັບ​ແຕ່​ຖືກ​ຍົກຍ້າຍອອກ​ຈາກ​ພື້ນ​ທີ່​ ຂອງ​ໂຄງການ​ໄຟຟ້າ​ຫົງ​ສາ ​ໃຫ້​ມາ​ຢູ່​ບ້ານ​ໃໝ່ ຈັດ​ສັນ ບ້ານ​ນາ​ແກ່ນ​ຄຳ ບໍລິສັດ​ໄຟຟ້າ​ຫົງ​ສາ ກໍ​ໄດ້​ລົງມາ​ຊຸກຍູ້, ສົ່ງ​ເສີມ ​ແລະ ​​ໃຫ້​ຄຳແນະນຳ ກ່ຽວ​ກັບ​ວິທີ​ການປູກຝັງ-​ລ້ຽງສັດ, ​ເຮັດ​ກະສິກຳ, ຫັດຖະກຳ ​ແລະ ສ້າງ​ຕັ້ງ​ກຸ່ມ​ຫັດຖະກຳຕ່ຳ​ແຜ່ນ​-ແພ ຝ່າຍ​ພື້ນ​ເມືອງຂຶ້ນ ​ເພື່ອ​ໃຫ້​ປະຊາຊົນ​ພາຍ​ໃນ​ບ້ານ ມີ​ວຽກ​ເຮັດ​ງານ​ທຳ, ມີ​ຊີ​ວິດການ​ເປັນ​ຢູ່​ທີ່​ດີ​ຂຶ້ນ, ​ໂດຍ​ມີ​ສະມາຊິກ​ທັງ​ໝົດ 300 ກວ່າ​ຄົນ ສາມາດສ້າງ​ລາຍ​ຮັບ​ໃຫ້​ຄອບຄົວ​ ທີ່​ເປັນ​ສະມາຊິກ ໄດ້ 1.500.000 ກີບ​ຕໍ່​ຄົນ​ຕໍ່​ເດືອນ.

ສະ​ເພາະຫົວໜ້າ​ກຸ່ມ​ຫັດຖະກຳ ສາມາດ​ເກັບ​ລາຍ​ຮັບ​ໄດ້ 30 ລ້ານ​ກີບ​ຕໍ່​ເດືອນ ສິນຄ້າ​ທີ່​ຜະລິດ​ ​ແລະ ສົ່ງ​ຂາຍ ​ມີ: ​ແພສິ້ນ, ​ເສື້ອ, ຜ້າບ່ຽງ, ຜ້າພັນ​ຄໍ, ຜ້າ​ປູ​ໂຕະ, ຜ້າ​ເຊັດ​ມື. ​ ນອກຈາກ​ນັ້ນ, ຍັງ​ໄດ້​ລ້ຽງ​ໝູ, ປູກ​ຜັກ​ເພື່ອ​ເປັນ​ສິນຄ້າ ແລະ ອື່ນໆ ສິນຄ້າ​ສ່ວນ​ໃຫຍ່ແມ່ນ​ສົ່ງ​ອອກ​​ໄປຕະຫລາດ ນະ ຄອນຫລວງ​ວຽງ​ຈັນ ​ແລະ ພາຍ​ໃນ ​ເມືອງ​ຫົງ​ສາ.

ຂໍ້ມູນຈາກ: ສຳນັກຂ່າວສານປະເທດລາວ