ກະຊວງ​ຍຸຕິ​ທຳ​ຮ່ວມ​ກັບ​ສານປະຊາຊົນ​ສູງ​ສຸດ ອົງການ​ໄອ​ຍະການ​ປະຊາຊົນ​ສູງ​ສຸດ ແລະ ກະຊວງ​ປ້ອງ​ກັນ​ຄວາມ​ສະຫງົບ ຈັດກອງ​ປະຊຸມ​ກ່ຽວ​ກັບ​ການ​ດຳເນີນຄະດີ​ຕາມ​ຂະ​ບວນ​ຍຸຕິ​ທຳ ຄັ້ງ​ທີ IV ຂຶ້ນ​ວັນ​ທີ 5 ທັນວາ 2017 ທີ່ສູນ​ການ​ຮ່ວມ​ມື​ສາກົນ ລາວ-ຍີ່ປຸ່ນ ນະຄອນຫຼວງ​ວຽງ​ຈັນ ໂດຍເປັນ​ປະທານ​ຂອງ​ທ່ານ ໄຊ​ສີ ສັນຕິ​ວົງ ລັດຖະມົນຕີ​ກະຊວງ​ຍຸຕິ​ທຳ ມີ​ບັນດາ​ຜູ້ຕາງໜ້າ​ຈາກ​ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ກອງ​ປະຊຸມ​ໄດ້​ຮັບ​ຟັງ​ລາຍ​ງານ ແລະ ປະກອບ​ຄຳ​ຄິດ​ເຫັນ​ແລກປ່ຽນ​ບົດຮຽນ​ຢ່າງ​ກົງ​ໄປ​ກົງ​ມາ ເພື່ອ​ເປັນ​ແນວທາງ​ພື້ນຖານ​ໃນການ​ປັບປຸງ​ແກ້​ໄຂ ແລະ ສະກັດກັ້ນ​ບັນຫາ​ຫຍໍ້ທໍ້​ຕ່າງໆ​ທີ່​ເກີດ​ຂຶ້ນໃນ​ສັງຄົມ ເຊິ່ງ​ໃນ​ຊຸມ​ປີຜ່ານມາ (2013-2016) ທັງ 4 ຂະແໜງການ​ໃນ​ຂະ​ບວນ​ຍຸຕິ​ທຳ ​ໄດ້​ເອົາໃຈ​ໃສ່​ຢ່າງ​ຕັ້ງໜ້າ​ເຂົ້າ​ໃນ​ການຈັດ​ຕັ້ງ​ປະຕິບັດ ​ວຽກ​ງານ​ວິຊາ​ສະເພາະ​ຂອງ​ຕົນ​ດ້ວຍ​ຄວາມ​ຮັບ​ຜິດຊອບ​ສູງ ອົງການ​ສືບສວນ-ສອບສວນ​ຂອງ​ເຈົ້າ​ໜ້າທີ່​ຕຳຫຼວດ​ສາມາດ​ສັງ​ລວມ​ຄະດີ​ອາຍາ​ທີ່​ເກີດຂຶ້ນ​ທົ່ວ​ໄປ​ໄດ້​ທັງ​ໝົດ 9.360 ລາຍ ແກ້​ໄຂ​ສຳເລັດ 5.048 ລາຍ ຍັງ​ສືບຕໍ່ 4.312 ລາຍ ຄະດີ​ເສດຖະກິດ ມີ 1.551 ລາຍ ສຳເລັດ 1.173 ລາຍ ຍັງ​ສືບຕໍ່ 378 ລາຍ ຄະດີ​ຄ້າ​ມະນຸດ ມີ 402 ລາຍ ແກ້​ໄຂ 309 ລາຍ ສືບຕໍ່ 93 ລາຍ ມ້າງ​ຢາ​ເສບ​ຕິດ​ໄດ້ 7.743 ລາຍ ສຳເລັດ 4.806 ລາຍ ສືບຕໍ່ 2.937 ລາຍ ຢຶດຂອງ​ກາງ​ປະເພດ​ຢາ​ເສບ​ຕິດ​ປະເພດ​ຢາ​ບ້າ 10.511 ກິ​ໂລ ເຮ​ໂລອິນ 752,8 ກິ​ໂລ ຝິ່ນ 261,12 ກິ​ໂລ ກັນຊາ​ແຫ້ງ 10.234,76 ກິ​ໂລ ໂຄ​ເຄນ 10,51 ກິ​ໂລ ແປ້ງຝຸ່ນສານ​ເຄ​ມີ​ຢາ​ເສບ​ຕິດ 9.605 ກິ​ໂລ ແລະ ນ້ຳ​ຢາ​ສານ​ເສບ​ຕິດ 6.690,3 ກິ​ໂລ ເປັນຕົ້ນ ວຽກງານ​ອົງການ​ໄອ​ຍະ​ການ​ປະຊາຊົນ ​ໄດ້​ອອກ​ຄຳ​ສັ່ງ​ຈັບ​ຕົວ 4.777 ສະບັບ ຄຳ​ສັ່ງ​ກັກ​ຂັງ​ພາງ 27.146 ສະບັບ ຄຳ​ສັ່ງ​ຕໍ່​ກຳນົດເວລາ​ກັກ​ຂັງ​ພາງ 12.056 ສະບັບ ມີ​ອົງ​ປະກອບ​ຂອງ​ການ​ກະທຳ​ຜິດ​ຄົບ​ຖ້ວນ ​ແລ້ວ​ສັ່ງ​ຟ້ອງ​ໃຫ້ສານ​ພິຈາລະນາ​ຕັດສິນ 16.629 ເລື່ອງ ສົ່ງ​ຄືນ​ໃຫ້​ອົງການ​ສືບສວນ-ສອບ​ສວນ 8.510 ເລື່ອງ ໂຈະ​ການ​ດຳເນີນ​ຄະດີ 189 ເລື່ອງ ຊັດ​ມ້ຽນ​ຄະດີ 1.474 ເລື່ອງ ສົ່ງ​ພາກສ່ວນ​ອື່ນ​ແກ້​ໄຂທາງ​ບໍລິຫານ 482 ເລື່ອງ ວຽກງານ​ສານ​ປະຊາຊົນ ​ມີ​ຄະດີ​ເຂົ້າມາ​ສານ​ປະຊາຊົນ​ທົ່ວ​ປະເທດ 31.390 ເລື່ອງ ແກ້​ໄຂ​ໄດ້ 30.817 ເລື່ອງ ສືບຕໍ່ 2.186 ເລື່ອງ ໃນ​ນີ້ ສານ​ຂັ້ນ​ຕົ້ນ​ສາມາດຕັດສິນ​ໄດ້​ທັງ​ໝົດ 24.814 ເລື່ອງ ແລະ ວຽກ​ງານ​ຈັດ​ຕັ້ງ​ປະຕິບັດຄຳ​ຕັດສິນ​ຂອງ​ສານ ​ມີ​ຄຳ​ຕັດສິນເຂົ້າ​ມາ​ອົງ​ການຈັດຕັ້ງ​ຄຳ​ຕັດສິນຂອງ​ສານ​ທົ່ວ​ປະເທດ ທັງ​ໝົດ 27.469 ເລື່ອງ ໃນ​ນັ້ນ ຄະດີແພ່ງ 8.303 ເລື່ອງ ແລະ ຄະດີອາຍາ 3.010 ເລື່ອງ.

ຕອນ​ທ້າຍ​ກອງ​ປະຊຸມ ທ່ານ ທອງ​ລຸນ ສີ​ສຸ​ລິດ ນາຍົກ​ລັດ​ຖະມົນຕີ​ໄດ້​ໂອ້​ລົມ ເຊິ່ງ​ທ່ານ​ໄດ້​ເນັ້ນໃຫ້​ຂະແໜງ​ຍຸຕິ​ທຳທັງ 4 ພາກ ສ່ວນ​ເອົາໃຈໃສ່​ເຜີຍແຜ່​ເຊື່ອມ​ຊຶມ​ ແລະ ສ້າງ​ຄວາມ​ເຂົ້າໃຈ​ກ່ຽວ​ກັບບັນດາ​ກົດໝາຍ​ໃຫ້​ພະນັກງານ ຕະຫຼອດ​ຮອດ​ພໍ່​ແມ່​ປະຊາຊົນ​ບັນດາ​ເຜົ່າ​ຢ່າງ​ກວ້າງຂວາງເລິກ ເຊິ່ງສືບຕໍ່​ສ້າງ​ກົດໝາຍ ແລະ ຜັນ​ຂະຫຍາຍ​ບາງ​ກົດໝາຍ​ໃຫ້ເປັນ​ນິຕິ​ກຳ​ລຸ່ມ​ກົດໝາຍ​ທີ່​ລະອຽດ​ຈະແຈ້ງ ​ທີ່​ສາມາດ​ນຳ​ໃຊ້ເປັນ​ບ່ອນ​ອີງ​ໃນ​ການ​ດຳເນີນ​ຄະດີ​ທີ່​ຖືກຕ້ອງ ປົກ​ປ້ອງ​ຄົນ​ດີ ແລະ ລົງໂທດ​ຜູ້​ກະທຳ​ຜິດ​ຢ່າງ​ເຂັ້ມງວດ ສືບຕໍ່​ປັບປຸງ​ລະບົບ​ການ​ຈັດຕັ້ງ ກໍ່​ຄືການເຄື່ອນໄຫວ​ວຽກງານ​ທີ່​ເຮັດ​ໜ້າທີ່​ພິຈາລະນາ ແລະ ດຳເນີນ​ຄະດີ​ຕາມ​ຂະ​ບວນຍຸຕິ​ທຳ​ໃຫ້​ມີ​ຄວາມ​ກະທັດ​ຮັດ​ຖືກຕ້ອງ​ໂປ່ງ​ໃສ ຄຽງ​ຄູ່​ກັບ​ການ​ເພີ່ມທະວີ​ຊີ້​ນຳ​ທາງ​ດ້ານ​ກົດໝາຍ​ປັບປຸງ​ກົນ​ໄກ​ລະບົບ​ການ​ເຮັດ​ວຽກ ໃຫ້​ມີ​ຄວາມ​ສອດຄ່ອງ ທັງ​ລະດັບສູນ​ກາງ ແລະ ທ້ອງຖິ່ນ ເພື່ອ​ຮັບປະກັນ​ໄດ້​ຄວາມ​ຮຽກຮ້ອງ​ຕ້ອງການ​ໃນ​ໄລຍະ​ໃໝ່​ຂອງພັກ-ລັດຖະ​ບານ​ວາງ​ອອກ​ ໃຫ້​ປະສົບ​ຜົນສຳເລັດ​ຕາມ​ຄາດໝາຍ​ວາງ​ໄວ້ເປັນ​ກ້າວໆ.

ຂໍ້ມູນຈາກ:  ວຽງຈັນໃຫມ່