GMT+7 14/12/2017 17:10

ສະຫະລັດ ລະງັບອອກວີຊ່າໃຫ້ຊາວກຳປູເຈຍ ທີ່ທຳລາຍປະຊາທິປະໄຕ

 

 

ລັດຖະບານວໍຊິງຕັນປະກາດຈຳກັດການອອກວີຊ່າໃຫ້ແກ່ພົນລະເມືອງກຳປູເຈຍ ເຊິ່ງມີພຶດຕິກຳຕໍ່ຕ້ານລະບອບປະຊາທິປະໄຕ ທ່າມກາງຄວາມສຳພັນລະດັບທະວີພາຄີອັນຕຶງຄຽດ ຈາກການທີ່ສົມເດັດຮຸນເຊັນ ເດີນຫນ້າກວດລ້າງຝ່າຍ ກົງກັນຂ້າມທາງການເມືອງ

 

ສຳນັກຂ່າວຕ່າງປະເທດລາຍງານຈາກກຸງວໍຊິງຕັນ ປະເທດສະຫະລັດອາເມລິກາເມື່ອວັນທີ 6ທັນວາວ່າ: ກະຊວງການຕ່າງປະເທດສະຫະລັດອອກຖະແຫລງການສະບັບລ່າສຸດກ່ຽວກັບສະຖານະການການເມືອງພາຍໃນກຳປູເຈຍເມື່ອວັນ ພຸດ ໂດຍຍັງຄົງຮຽກຮ້ອງໃຫ້ລັດຖະບານພະນົມເປນທົບທວນການໃຊ້ມາດຕະການກົດດັນຝ່າຍກົງກັນຂ້າມທາງການເມືອງ ປ່ອຍໂຕທ່ານເກິມ ສຸຂາ ຜູ້ນຳຝ່າຍຄ້ານ ແລະ ອານຸຍາດໃຫ້ພາກປະຊາສັງຄົມລວມເຖງິສື່ມວນຊົນກັບມາຈັດ ກິດຈະກຳທາງການເມືອງຕາມກອບຂອງລັດຖະທຳມະນູນອີກຄັ້ງ

 

ແນວໃດກໍ່ຕາມເພື່ອເປັນການດຳເນີນການຕອບໂຕ້ພຶດຕິກຳຕໍ່ຕ້ານປະຊາທິປະໄຕ ທີ່ຍັງຄົງເກີດຂື້ນໃນກຳປູເຈຍໃນລະຫວ່າງນີ້ ທ່ານເຣັກ ທິລເລີສັນ ລັດຖະມົນຕີກະຊວງການຕ່າງປະເທດສະຫະລັດ ຈື່ງມີຄຳສັ່ງບັງຄັບໃຊ້ມາດຕະການ ຈຳກັດການເຂົ້າເມືອງສຳລັບຜູ້ຖືສັນຊາດກຳປູເຈຍຄົນໃດກໍ່ຕາມ ທີ່ມີພຶດຕິກຳເປັນອຸປະສັກຕໍ່ຂະບວນການປະຊາທິປະໄຕ ເຊິ່ງຄຳສັ່ງດັງ່ກ່າວມີຜົນຄວບຄຸມສະມາຊິກໃນຄອບຄົວຂອງບຸກຄົນເຫລົ່ານີ້ເຊັ່ນກັສນ ຫລັງກ່ອນຫນ້ານີ້ບໍ່ດົນ ປະກາດລະງັບງົບປະມານສະຫນັບສະຫນູນຄະນະກຳມະການການເລືອກຕັ້ງແຫງ່ຊາດຂອງກຳປູເຈຍໄປແລ້ວ

 

ຂະນະດຽວກັນຖະແຫລງການຂອງກະຊວງການຕ່າງປະເທດສະຫະລັດລະບຸວ່າ: ນະໂຍບາຍຂອງລັດຖະບານພະນົມເປນເຂົ້າຂ່າຍລະເມີດຂໍ້ຕົກລົງສັນຕິພາບປາຣີ ສະບັບປີ 2534 ທີ່ລົງນາມໂດຍລັດຖະບານວໍຊິງຕັນ ແລະ ກຳປູເຈຍ ຮ່ວມ ນຳອີກ 17ປະເທດ ໃນການຈັດຕັ້ງອົງການບໍລິຫານຊົ່ວຄາວແຫ່ງສະຫະປະຊາຊາດໃນກຳປູເຈຍເພື່ອຈັດການເລືອກຕັ້ງທົ່ວໄປຫລັງຜ່ານພົ້ນຍຸກຂະເມນແດງເຊິ່ງຖືເປັນຄັ້ງທຳອິດທີ່ຍູເອັນເຂົ້າຄວບຄຸມການປົກຄອງຂອງລັດອະທິປະໄຕ ແຫ່ງໃດແຫ່ງຫນື່ງ

 

ຄວາມເຄື່ອນໄຫວດັ່ງກ່າວຂອງສະຫະລັດມີຂື້ນພຽງບໍ່ເທົ່າໃດຊົ່ວໂມງ ຫລັງສົມເດັດຮຸນເຊນ ນາຍົກລັດຖະມົນຕີກຳປູເຈຍປະກາດດຳເນີນຄະດີທາງກົດຫມາຍຂໍ້ຫາໃຫມ່ກັບທ່ານສົມ ຣັງສີ ຄູ່ປັບທາງການເມືອງຕະຫລອດການ ເຊິ່ງລີ້ໄພຢູ່ ຕ່າງປະເທດຖານເປັນກະບົດດ້ວຍການຍຸແຍ່ປຸກປັ້ນກອງທັບໃຫ້ຂັດຄຳສັ່ງຂອງລັດຖະບານ  ທັງນີ້ສານຖີກາໃນກຸງພະນົມເປນມີຄຳສັ່ງເມື່ອເດືອນທີ່ຜ່ານມາໃຫ້ຍຸບພັກກູ້ຊາດກຳປູເຈຍທີ່ທ່ານສົມ ຣັງສີ ກໍ່ຕັ້ງຮ່ວມກັບທ່ານເກິມ ສຸຂາ ແລະ ຕັດສິນທາງການເມືອງສະມາຊິກພັກຊີເອັນອາພີ ທັງ 118ຄົນ ເປັນເວລາ 5ປີ ຫມາຍຄວາມວ່າການເລືອກຕັ້ງທົ່ວໄປໃນປີຫນ້າຈະເຫລືອພັກໃຫຍ່ພຽງພັກດຽວຄືພັກປະຊາທິປະຊາຊົນກຳປູເຈນ ຂອງສົມເດັດຮຸນເຊນ ເຊິ່ງປະກາດວ່າການ ເລືອກຕັ້ງທີ່ຈະເກີດຂື້ນຕ້ອງເປັນໄຊຊະນະຂອງເຂົາເທົ່ານັ້ນ ຫລັງປົກຄອງປະເທດມາດົນກວ່າ 30ປີ

 

 

ຂໍ້ມູນຈາກ: ເດລິນີວ

 

ຄວາມຄິດເຫັນຂອງຜູ້ອ່ານ (0)