GMT+7 14/12/2017 17:13

ເຈົ້າແຂວງໆວຽງຈັນ ຢ້ຽມຢາມໂຮງໝໍ ໂອກາດວັນຊາດ 2 ທັນວາ

 

 

​ໃນ​ໂອກາດ​ສະ​ເຫລີ​ມສະຫລອງ​ວັນຊາດ 2 ທັນວາ ຄົບຮອບ 42 ປີ ​ແລະ ດ້ວຍ​ຄວາມ​ເປັນ​ຫ່ວງ​ເປັນ​​​ໃຍ​ຈາກ​ການ​ນຳ​ຂອງ​ແຂວງ ​ທີ່​ມີ​ຕໍ່​ ພະນັກງານ, ທະຫານ, ຕຳຫລວດ​ ແລະ​ ປະຊາຊົນ​ບັນດາ​ເຜົ່າ​ຊາວ​ແຂວງ​ວຽງ​ຈັນ. ​ໃນວັນ​ທີ 5 ທັນວາ 2017 ນີ້, ທ່ານ ​ວິ​ດົງ​ ໄຊ​ຍະ​ສອນ ​ ເຈົ້າ​ແຂວງໆ​ວຽງ​ຈັນ, ພ້ອມ​ດ້ວຍ​ການນຳ​ຫ້ອງ​ວ່າການ​ປົກຄອງ​ແຂວງ​ ໄດ້​ລົງ​ຢ້ຽມຢາມ​ ໂຮງໝໍ​ທະຫານ​ແຂວງ​ ແລະ​ ໂຮງໝໍ​ແຂວງ​ວຽງ​ຈັນ,​​ ​ເພື່ອໃຫ້​ກຳລັງ​ໃຈ​ຄົນ​ເຈັບ​ທີ່​ພວມ​ປິ່ນປົວ​ຢູ່​ໂຮງໝໍ. ພ້ອມ​ທັງ​ໄດ້​ຮັບ​ຟັງ​ການ​ລາຍ​ງານ​ສະພາບ​ການ​ປິ່ນປົວ ​ແລະ ການຮັກສາ​ຄົນ​ເຈັບ​ຢູ່​ພາຍ​ໃນ​ໂຮງໝໍ​ດັ່ງກ່າວ.

ໂອກາດ​ນີ້ ທ່ານ ​ວິ​ດົງ​ ໄຊ​ຍະ​ສອນ​ ​ໄດ້​​ໂອ້​ລົມ​ພະນັກງານ​ແພດ​ໝໍ​ ທີ່​ໂຮງໝໍ​ແຂວງ ເຊິ່ງທ່ານ​ໄດ້​ເນັ້ນ​ໃຫ້​ຄະນະ​ພັກ​ຂອງ​ໂຮງ​ໝໍ​ດັ່ງກ່າວ​​ ເອົາ​ໃຈ​ໃສ່​ພົວພັນ​ຮ່ວມ​ມື​ກັບສາກົນ​ ໃຫ້​ຫລາຍ​ຂຶ້ນ​ກວ່າ​ເກົ່າ, ​ເອົາ​ໃຈ​ໃສ່​ພັດທະນາ​ດ້ານ​ຄວາມ​ຮູ້​ຄວາມ​ສາມາດ ​ຂອງ​ພະນັກງານ​ແພດ​ໝໍ ​ເພື່ອ​ສ້າງ​ພ​ະນັກງານ​ຮຸ່ນ​ສືບ​ທອດ​ໃຫ້​ໄດ້​ທັງ​ປະລິມານ ​ແລະ ​ຄຸນ​ນະພາ​ບ​ ແລ້ວ​ສົ່ງ​ລົງ​ໃຫ້​​ເຂດ​ຫ່າງ​ໄກ​ສອກຫລີກ​ ຂອງ​ແຂວງ​ໃຫ້​ທົ່ວ​ເຖິງ, ການ​ບໍລິການ​ຕ້ອງ​ໃຫ້​ທົ່ວ​ເຖິງ​ທັນ​ກັບ​ເຫດການ.​ ຈາກ​ນັ້ນທ່ານ​ເຈົ້າ​ແຂວງ​ຍັງ​ໄດ້​ລົງ​ຢ້ຽມຢາມພະນັກງານ, ທະຫານ, ຕຳຫລວດ ​ແລະ​ ປະຊາຊົນ​ບັນດາ​ເຜົ່າ​ ທີ່​ພວມ​ປິ່ນປົວ​ຢູ່​ສອງ​ໂຮງ​ໝໍ​ດັ່ງກ່າວ ​ພ້ອມ​ທັງ​ມອບ​ເງິນ​ຊ່ວຍ​ເຫລືອ​ໃຫ້ຄົນ​ເຈັບ​ຈຳນວນ​ໜຶ່ງ​.

 

 

ຂໍ້ມູນຈາກ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)