GMT+7 14/12/2017 17:09

ສຄສ ຝຶກອົບຮົມການຂຶ້ນແຜນຄົ້ນຄວ້າ ແລະ ຫລັກສູດສິດສອນ

 

 

ສະ​ຖາ​ບັນ​ຄົ້ນຄວ້າ ນິຕິກໍາສະພາແຫ່ງຊາດ (ສຄສ) ໄດ້ຈັດຊຸມຝຶກອົບຮົມ ເພື່ອສ້າງຄວາມເຂັ້ມແຂງ ໃຫ້ແກ່ພະນັກງານຂອງຕົນ ໃນຫົວຂໍ້ “ ການ​ຂຶ້ນ​ແຜນ​ຄົ້ນຄວ້າ ແລະ ການຂຶ້ນ​ແຜນ​ຫລັກສູດ​ສິດສອນ​ປະຈຳປີ ” ລະຫວ່າງ ວັນທີ 5-9 ທັນວາ 2017 ທີ່​ທ່າ​ລາດ ​ແຂວງ​ວຽງຈັນ, ໂດຍການເປັນປະທານຂອງທ່ານ ຄໍາມ່ວນ ຊົມສີຫາປັນຍາ ຮອງຫົວໜ້າສະຖາບັນຄົ້ນຄວ້ານິຕິກໍາສະພາແຫ່ງຊາດ; ເຂົ້າຮ່ວມມີຫົວໜ້າສະຖາບັນຂໍ້ມູນ-ຂ່າວສານ ແລະ ວາລະສານວິທະຍາສາດ ສັງຄົມ, ພ້ອມດ້ວຍພະນັກງານວິຊາການພາຍໃນສະຖາບັນດັ່ງກ່າວ.

ຈຸດປະສົງການຝຶກອົບຮົມໃນຄັ້ງນີ້, ເພື່ອຍົກລະດັບຄວາມ​ຮູ້, ຄວາມ​ສາມາດດ້ານການ​ຂຶ້ນ​ແຜນ ການ​ຄົ້ນຄວ້າ ໃຫ້​ພະນັກງານ​ມີ​ຄວາມ​ເຂັ້ມ​ແຂງ ໃນ​ການ​ເຄື່ອ​ນ​ໄຫວ​ວຽກງານ ​ຄວາມ​ຮັບຜິດຊອບ ​ໃຫ້​ມີ​ປະສິດທິ​ຜົນ​ຫລາຍ​​ຂຶ້ນ; ທັງຍົກສູງ ຄຸນນະພາບແກ່ພະນັກງານ ໃນການເປັນເສນາທິການໃຫ້ ສຄສ ນັບມື້ນັບເຂັ້ມແຂງຂຶ້ນເທື່ອລະກ້າວ.

ທ່ານ ຄໍາມ່ວນ ຊົມສີຫາປັນຍາ ກ່າວວ່າ: ການຝຶກອົບຮົມໃນຄັ້ງນີ້, ມີຄວາມສຳຄັນຫລາຍ ທັງເປັນການສ້າງຊັບພະຍາກອນ ຂອງສະຖາບັນຄົ້ນຄ້ວານິຕິກຳ, ເຊິ່ງຈະກາຍເປັນນັກຝຶກອົບຮົມ ແລະ ນັກຄົ້ນຄວ້າ ທີ່ມີຄວາມຊໍານານ. ທັງນີ້, ກໍເພື່ອເປັນການສ້າງເງື່ອນໄຂສະດວກ ໃຫ້ແກ່ພະນັກງານໃນ ການຝຶກອົບຮົມໃຫ້ແກ່ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ, ປະກອບສ່ວນເຂົ້າ ໃນວຽກງານການຂຶ້ນ ແຜນຄົ້ນຄວ້າ ແລະ ການຂຶ້ນແຜນສິດ ສອນປະຈໍາປີ ໃຫ້ມີປະສິດທິ​ຜົນ​ຫລາຍ​ຂຶ້ນ.

ເນື້ອໃນທີ່ນຳມາຝຶກອົບຮົມ ​ແມ່ນທິດສະດີ ແລະ ພຶດຕິ​ກໍາ​ຕົວ​ຈິງ​ ​ກ່ຽວກັບການຂຶ້ນແຜນຄົ້ນຄວ້າ ແລະ ການຂຶ້ນແຜນຫລັກສູດສິດສອນປະຈໍາປີ, ເຊິ່ງຜູ້ເຂົ້າຮ່ວມໄດ້​ມີຄໍາ​ຖາມ​ແລກປ່ຽນ​ຄວາມຄິດ​ເຫັນ​ນໍາ​ກັນ ​ກ່ຽວກັບບັນຫາ​ທີ່​ຕັ້ງ​ຂຶ້ນ, ໂດຍຈັດເປັນກຸ່ມເພື່ອຂຽນລາຍງານ ແລະ ຂຶ້ນລາຍງານຫົວຂໍ້ທີ່ໄດ້ຄົ້ນຄວ້າ.

 

 

ຂໍ້ມູນຈາກ: ສຳນັກຂ່າວສານປະເທດລາວ

 

ຄວາມຄິດເຫັນຂອງຜູ້ອ່ານ (0)