GMT+7 14/12/2017 17:10

ສຳນັກຂ່າວສານ ລາວ-ຫວຽດນາມ ເປີດວາງ ສະແດງຮູບພາບ ສາຍພົວພັນ

 

 

ສຳນັກຂ່າວສານປະເທດລາວ ຮ່ວມກັບ ສຳນັກຂ່າວສານຫວຽດນາມ ປະຈຳລາວ ​ຈັດ​ກິດຈະກຳ​ວາງສະ​ແດງ​ຮູບ​ພາບ “ສາຍ​ພົວພັນ ລາວ-ຫວຽດນາມ ໜັກ​ແໜ້ນ, ຍືນ​ຍົງ​ກວ່າ​ພູ​ເຂົາ​ກ້າ, ກວ່າ​ແມ່​ນ້ຳ​ລຳ​ເຊ” ຢູ່​ຫໍ​ວັດທະນະທຳ​ແຫ່ງ​ຊາດ ນະຄອນຫລວງ​ວຽງ​ຈັນ, ​ເພື່ອ​ສະ​ເຫລີ​ມສະຫລອງ​ວັນ​ສ້າງ​ຕັ້ງ​ສາຍ​ພົວພັນ​ການ​ທູດ ລາວ-ຫວຽດນາມ ຄົບຮອບ 55 ປີ ​ແລະ ວັນ​ເຊັນ​ສົນທິສັນຍາ​ມິດຕະພາບ ​ແລະ ການ​ຮ່ວມ​ມື ລາວ-ຫວຽດນາມ ຄົບຮອບ 40 ປີ, ​ໂດຍ​ມີ ທ່ານ ​ສະຫວັນ​ຄອນ ລາຊະ​ມຸນຕີ ຮອງ​ລັດຖະມົນຕີ​ ກະຊວງ​ຖະ​ແຫລ​ງຂ່າວ, ​ວັດທະນະທຳ ​ແລະ ທ່ອງ​ທ່ຽວ,  ມີ​ບັນດາ​ຫົວໜ້າ, ຮອງ​ຫົວໜ້າ ສຳນັກ​ຂ່າວສານ​ປະ​ເທດ​ລາວ ​ແລະ ສຳນັກ​ຂ່າວສານ​ຫວຽດນາມ, ພ້ອມ​ດ້ວຍ​​ແຂກ​ຖືກ​ເຊີນ ​ເຂົ້າ​ຮ່ວມ.

ງານ​ວາງສະ​​ແດງ​ຮູບ​ພາບໃນ​ຄັ້ງ​ນີ້, ​ໄດ້​ລວບລວມ​ເອົາ​ຮູບ​ຖ່າຍ​ທີ່​ຊົງ​ຄຸນຄ່າ ຮູບສີ ​ແລະ ຂາວ​ດຳ 100 ກວ່າ​ຮູບ ທີ່​ສ່ອງ​ແສງ​ຢ່າງ​ມີ​ຊີວິດ​ຊີວາ ​ແລະ ​ເລິກ​ເຊິ່ງ ​ໃນ​ໄລຍະ​ເວລາ​ກວ່າ​ເຄິ່ງສັດຕະວັດ ທີ່​ມີ​ຄວາມ​ສະໜິດ​ຕິດ​ພັນ, ຄຽງ​ບ່າ​ຄຽງ​ໄຫລ່ ລະຫວ່າງ​ສອງ​ພັກ, ສອງ​ລັດ ​ແລະ ປະຊາຊົນສອງ​ຊາດ ລາວ-ຫວຽດນາມ ​ໃນ​ການ​ຕໍ່ສູ້​ຍືດ​ເຍື້ອ​ຍາ​ວນານ, ຕ້ານ​ພວກ​ລ່າ​ເມືອງ​ຂຶ້ນ​ຈັກກະພັດ​ຜູ້​ມາ​ຮຸກ​ຮານ, ປົດ​ປ່ອຍປະ​ເທດ​ຊາດ​ຂອງ​ແຕ່ລະ​ປະ​ເທດ ​ແລະ ສາຍ​ພົວພັນ​ໄມຕີ​ຈິດ​ມິດຕະພາບ, ຄວາມ​ສາມັກຄີ​ແບບ​ພິ​ເສດ ລະຫວ່າງ​ສອງ​ປະ​ເທດ​ໃນ​ນັ້ນ, ມີ​ບັນດາ​ພາບ​ຖ່າຍ​ປະທານ​ໂຮ່ຈິ​ມິງ ພົບ​ປະ​ແລກປ່ຽນ​ກັບ​ປະທານ​ ສຸພາ​ນຸວົງ ຢູ່​ເຂດ​ຕໍ່ຕ້ານ​ຫວຽດບັກ, ກັບ​ອະດີດ​ເລຂາທິການ​ໃຫຍ່ ​ໄກສອນ ພົມວິຫານ ຢູ່​ຮ່າ​ໂນ້ຍ ປີ 1966, ຮູບ​ພາບບັນດາ​ການ​ນຳ​ສອງ​ປະ​ເທດ ລຸ້ນຕ່າງໆ​ ທີ່ໄດ້​ຄຽງ​ບ່າ​ຄຽງ​ໄຫລ່​ກັນ​ໃນ​ແຕ່ລະ​ໄລຍະ, ​ບັນດາ​ສັນຍາ, ສົນທິສັນຍາ, ຂໍ້​ຕົກລົງ​ຮ່ວມ​ມື​ທີ່​ໄດ້​ຮັບ​ການ​ລົງ​ນາມ, ບັນດາ​ຜົນສຳ​ເລັດ​ທີ່​ໃຫຍ່​ຫລວງ ​ໃນ​ທຸກ​ຂົງ​ເຂດ​ເຊັ່ນ: ການ​ເມືອງ, ​ປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບ, ​ເສດຖະກິດ, ວັດທະນະທຳ-ສັງຄົມ ລະຫວ່າງ ​ສ​ອງປະ​ເທດ ລາວ-ຫວຽດນາມ ​ແລະ ອື່ນໆ.

​ທ່ານ ​ສະຫວັນ​ຄອນ ລາຊະ​ມຸນຕີ ​ໄດ້​​ມີ​ຄຳ​ເຫັນໃນບາງ​ຕອນ ວ່າ: ງານ​ວາງສະ​ແດງ​ຮູບພາບ ​ໃນ​ຄັ້ງນີ້, ສະ​ແດງ​ໃຫ້​ເຫັນ​ເຖິງ​ໝາກຜົນ ​ແລະ ​ໄຊ​ຊະ​ນະ​ແຫ່ງ​ການ​ພົວພັນ​ຮ່ວມ​ມື ທີ່​ເປັນ​ມູນ​ເຊື້ອ​ລະຫວ່າງ​ສອງ​ປະ​ເທດລາວ-ຫວຽດນາມ, ທັງ​ເປັນ​ການ​ສ່ອງ​ແສງ​ໃຫ້​ເຫັນ​ເຖິງສາຍ​ພົວພັນ​ຮ່ວມ​ມື​ຢ່າງ ​ສະໜິດ​​ແໜ້ນ ລະຫວ່າງ ສຳນັກ​ຂ່າວສານ​ປະເທດລາວລາວ ​ແລະ ສຳນັກຂ່າວສານຫວຽດນາມ ທີ່​ມີ​ມາ​ແຕ່​ດົນ​ນານ ນັບ​ແຕ່​ສະ​ໄໝ​ຕໍ່ສູ້​ກູ້​ຊາດ ໃນ​ເມືອ​ກ່ອນ ກໍ​ຄື​ ໄລຍະ​ແຫ່ງ​ການ​ປົກ​ປັກ​ຮັກສາ ​ແລະ ສ້າງສາ​ພັດທະນາປະ​ເທດ​ຊາດ​ ໃນ​ປັດຈຸບັນ. ຢ່າງ​ໃດ້ກໍຕາມ, ສຳນັກ​ຂ່າວສານ​ຫວຽດນາມ ກໍ​ໄດ້​ໃຫ້ການ​ຊ່ວຍ​ເຫລືອ​ຢູ່​ຄຽງ​ບ່າ​ຄຽງ​ໄຫລ່ ກັບ​ຂ່າວສານ​ປະ​ເທດ​ລາວ ມາ​​ໂດຍຕະຫລອດ, ​ເຊິ່ງການ​ຊ່ວຍ​ເຫລືອ​ເຊິ່ງກັນ ​ແລະ ກັນດັ່ງກ່າວ, ​ໄດ້​ກາຍ​ເປັນ​ປັດ​ໄຈ​ສຳຄັນ​ເພື່ອ​ກະຕຸກ​ຊຸກຍູ້​ ໃຫ້​ວຽກ​ງານ​ຂ່າວສານ ​ຂອງ​ສອງ​ປະ​ເທດ ລາວ-ຫວຽດນາມ ນັບ​ມື້​ເຕີບ​ໃຫຍ່​ເຂັ້ມ​ແຂງ ​ແລະ ​ໄດ້​ກາຍ​ເປັນ​ກຳລັງ​ແຮງ​ສຳຄັນ ປະກອບສ່ວນ​ເຂົ້າ ​ໃນ​ການ​ໂຄສະນາ​ປຸກລະດົມ​ໃຫ້​ຮຸ່ນຄົນ​​ຕ່າງໆ ຂອງ​ສອງ​ປະ​ເທດ ​ໄດ້​ຕັ້ງໜ້າ​ຖະໜຸຖະໜອມ ​ແລະ ​ເພີ່ມ​ພູນ​ຄູນ​ສ້າງ ສາຍ​ພົວພັນ​ສາມັກຄີ​ແບບ​ພິ​ເສດ ​ແລະ ກາ​ນຮ່ວມ​ມື​ຮອບດ້ານ ອັນ​ເປັນ​ມໍລະດົກ​ທີ່​ຫາ​ຍາກ ຂອງ​ສອງ​ປະ​ເທດລາວ-ຫວຽດນາມ ​ໃຫ້​ໝັ້ນຄົງ​ທະ​ນົງ​ແກ່ນ​ຕະຫລອດ​ກາລະ​ນານ.

​ໃນໂອກ​າດດຽວກັນ, ບັນດາ​ການ​ນຳ ກໍ​ໄດ້​ຂຶ້ນ​ຕັດ​ແຖບ​ຜ້າ ເພື່ອ​ເປີດ​ພິທີ​ວາງສະ​ແດງ​ຮູບ​ພາບ ດັ່ງກ່າວ, ຢ່າງ​ເປັນ​ທາງ​ການ ແລະ ​ໄດ້​ເລາະ​ຊົມ​ບັນດາ​ຮູບ​ພາບຕ່າງໆຕື່ມອີກ ແລະ ຂໍ​ເຊີນ​ຊວນ ມວນ​ຊົນ​ທັງ​ພາຍ​ໃນ ​ແລະ ຕ່າງປະ​ເທດ ໃຫ້​ເຂົ້າ​ມາ​ທ່ຽວ​ຊົມງານ​ວາງສະ​ແດງ​ຮູບ​ພາບ​ດັ່ງກ່າວ​​ ໂດຍ​ບໍ່​ໄດ້​ເສຍ​ຄ່າ​, ໂດຍ​ເລີ່​ມ​ແຕ່​ວັນ​ທີ 6-9 ທັນວານີ້ ຢູ່​ຫໍ​ວັດທະນະທຳ​ແຫ່ງ​ຊາດ ນະ​ຄອນ​ຫລວງ​ວຽງ​ຈັນ.

 

 

ຂໍ້ມູນຈກາ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)