GMT+7 14/12/2017 17:08

ເຈົ້າແຂວງສະຫວັນນະເຂດ ພົບປະພະນັກງານປະຕິວັດ ທີ່ເສຍອົງຄະ

 

 

ທ່ານ ສັນຕິພາບ ພົມ​ວິຫານ ​ເລຂາ​ພັກ​ແຂວງ ​ເຈົ້າ​ແຂວງ​ສະຫວັນ​ນະ​ເຂດ ພ້ອມ​ດ້ວຍ​ການ​ນຳ​ຈາກ​ພະ​ແນ​ກການ​ອ້ອມ​ຂ້າງ ​ເປັນ​ຕົ້ນ ພະ​ແນ​ກ​ແຮງ​ງານສະຫວັດດີ​ການ-ສັງຄົມ, ພະ​ແນ​ກສາ ທາລະນະ​ສຸກ​, ກະ​ສິກຳ-ປ່າ​ໄມ້​, ການ​ເງິນ, ​ແຜນການ-ການ​ລົງທຶນ, ​ໂຍທາ​ທິການ ​ແລະ ​ຂົນ​ສົ່ງ, ດ່ານ​ຂົວ​ມິດຕະພາບ II, ກອງ​ຄຸມ​ຄອງ​ພາສີ, ສ່ວຍ​ສາ​ອາກອນ, ທະຫານ, ຕຳຫລວດ ຕະຫລອດ​ເຖິງ​ອຳນາດ​ການ​ປົກຄອງ​ເມືອງ​ພີນ ​ໄດ້​ໄປ​ພົບ​ປະຢ້ຽມຢາມ ​ແລະ ​ມອບ​ເຄື່ອງໃຫ້​ແກ່​ພະນັກງານ​ປະຕິວັດ​ທີ່​ເສຍ​ອົງຄະ ຢູ່​ທີ່​ສູນ 17 ບ້ານ​ໂນນ​ໄຊ ​ເມືອງ​ພີນ ​ໃນ​​ວັນ​ທີ 1 ທັນວາ​ 2017.

​ໂອກາດ​ນີ້, ທ່ານ​ເຈົ້າ​ແຂວງ​ສະຫວັນ​ນະ​ເຂດ ​ຕາງໜ້າ​ໃຫ້​ປະຊາ​ຊົນ​ທົ່ວ​ແຂວງ​ ກ່າວ​ສະ​ແດງ​ຄວາມ​ຢື້​ຢາມ​ຖາມ​ຂ່າວ, ຄວາມສາມັກ​ຄີ​ຮັກ​ແພງ ມາ​ຍັງ​ພະນັກງານ​ປະຕິວັດ​ອາວຸ​ໂສ ທີ່​ເສຍ​ອົງຄະ​ຈາກ​ສົງຄາມ,​ ມາ​ຕັ້ງ​ຖິ່ນ​ຖານ​ບ້ານ​ເຮືອນ​ຢູ່​ສູນ​ແຫ່ງ​ນີ້ ຈຳນວນ 28 ຄອບຄົວ, ​ໃນ​​ໂອກາດ​ທີ່​ປະ​ເທດ​ຊາດ​ໄດ້​ຮັບ​ການ​ປົດ​ປ່ອຍ​ມາ​ໄດ້ 42 ປີ, ປັດຈຸ​ບັນ​ປະ​ເທດ​ຊາດ​ໄດ້​ຮັບ​ການ​ພັດທະນາ, ສັງຄົມ​ມີ​ຄວາມ​ສະຫງົບ​ໂດຍ​ພື້ນຖານ, ​ແຕ່​ພັກ ​ແລະ ​ລັດ ກໍ​ຍັງ​​ເປັນ​ຫ່ວງ​ເປັນ​​ໃຍ ​ແລະ​ ຮູ້​ບຸນຄຸນ​ຕໍ່​ພວກ​ທ່ານ​ສະ​ເໝີ​ມາ. ຈາກ​ນັ້ນ​ທ່ານຍັງ​ໄດ້​ຮຽກຮ້ອງ​ມາ​ຍັງ ພະນັກງານ​ປະຕິວັດ​ທຸກ​ທ່ານ ຈົ່ງ​ສືບ​ຕໍ່​ຮັກສາ​ມູນ​ເຊື້ອ​ອັນ​ດີງາມ​ນີ້​ໄວ້ ​ແລະ ​ພ້ອມ​ກັນ​ເຮັດ​ພາລະກິດ​ຕໍ່​ໄປ​ຄື: ສຶກສາ​ອົບຮົມ​ໃຫ້​ແກ່​ຄົນ​ຮຸ່ນ​ໃໝ່ ກໍຄື​ ລູກ​ຫລານ ​ໄດ້​ຮັບ​ຮູ້ ​ແລະ ​ພ້ອມ​ກັນສ້າງສາ​ພັດທະນາ​ປະ​ເທດ​ຊາດ ​ໃຫ້​ມີ​ຄວາມ​ຈະ​ເລີ​ນກ້າວໜ້າ​ຢ່າງ​ບໍ່​ຢຸດ​ຢັ້ງ.

ຈາກ​ນັ້ນ ທ່ານ​ເຈົ້າ​ແຂວງ ​ກໍໄດ້​ມອບ​ເຄື່ອງອຸປະ​ໂພ​ກ, ບໍລິ​ໂພ​ກ ຈຳນວນ 28 ຊຸດ ​ແລະ​ ເງິນ ຈຳນວນ 10 ລ້ານ​ໃຫ້​ແກ່ສູນ​ດັ່ງກ່າວ, ພ້ອມ​ນັ້ນ ບັນດາ​ພະ​ແນ​ກການ ກໍໄດ້​ປະກອບສ່ວນມອບ​ເຄື່ອງ ​ແລະ ​ເງິນ​ສົມທົບ​ໃນ​ການ​ສ້ອມ​ແປງ​ສະ​ໂມ​ສອນນ້ອຍ ລວມ​ເປັນ​ເງິນ​ທັງ​ໝົດ 21,5 ລ້ານ​ກີບ.

 

 

ຂໍ້ມູນຈາກ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)