GMT+7 14/12/2017 17:11

ໂຮງຮຽນສາທາລະນະສຸກ ແຂວງຄຳມ່ວນ ບໍລິຈາກເລືອດຊ່ວຍເຫລືອສັງຄົມ

 

 

ທ້າຍ​ເດືອນ​ພະຈິກ ຜ່ານ​ມາ, ອົງການກາແດງເມືອງທ່າແຂກ ຮ່ວມກັບ ສູນຮັບບໍລິຈາກເລືອດ ແຂວງຄຳມ່ວນ ໄດ້ລົງເຄື່ອນໄຫວ ຮັບບໍລິຈາກເລືອດ ຢູ່ໂຮງຮຽນສາທາລະນະສຸກຄຳມ່ວນ ໂດຍການ ນຳພາຂອງ ທ່ານ ດຣ. ຄຳພູມີ ພຸດທະວົງ ຫົວໜ້າອົງການກາແດງ ເມືອງທ່າແຂກ, ມີທ່ານນາງ ອຳມະລາ ຊໍຊະນະວົງສາ ຮອງຜູ້ອຳນວຍການ ໂຮງຮຽນສາທາລະນະສຸກແຂວງ, ມີບັນດາຄູ-ອາຈານ ແລະ ບັນດານັກຮຽນແພດເຂົ້າຮ່ວມ ທັງ​ນີ້ ກໍເພື່ອເປັນສ່ວນໜຶ່ງ ໃນການທຳບຸນ ແລະ ປະກອບສ່ວນ ໃຫ້ແກ່ການສະໜອງເລືອດ ໃຫ້ພຽງພໍກັບ ຄວາມຕ້ອງການຂອງສັງຄົມ ໃນວຽກງານຈັດຫາເລືອດ ທີ່ປອດໄພ ຊ່ວຍເຫລືອ ຜູ້ບາດເຈັບໃນໂຮງໝໍ.

            ​
ໂອກາດ​ນີ້, ທ່ານ ດຣ. ຄຳພູມີ ພຸດທະວົງ ໄດ້ອະທິບາຍກ່ຽວກັບຄວາມໝາຍ ແລະ ຄວາມສຳຄັນຂອງເລືອດ, ບັນດາໝວດເລືອດກຣຸບຕ່າງໆ ແລະ ການຜະລິດ, ສະໜອງເລືອດໃນຮ່າງກາຍຂອງຄົນເຮົາ ພ້ອມທັງ ຄຸນປະໂຫຍດຂອງເລືອດ ​ໂດຍ​ມີຜູ້ ບໍລິຈາກເລືອດ ຕົວຈິງທັງໝົດ 33 ຄົນ, ໄດ້ເລືອດທັງໝົດ  33 ຖົງ ​ເຊິ່ງເລືອດທີ່ໄດ້ຮັບ ແມ່ນຈະໄດ້ນຳໃຊ້ເຂົ້າ ໃນການປິ່ນປົວຄົນເຈັບ ເປັນຕົ້ນ ແມ່ນຄົນ ເຈັບຜ່າຕັດ, ເກີດລູກ, ເປັນພະຍາດຊຳເຮື້ອ ແລະ ອຸບັດເຫດຕ່າງໆ.


ອົງການກາແດງ ເມືອງທ່າແຂກ ແລະ ສູນຮັບບໍລິຈາກເລືອດແຂວງ ​ໄດ້ສະແດງຄວາມຂອບໃຈ ມາຍັງພາກສ່ວນກ່ຽວຂ້ອງທີ່ໃຫ້ການບໍລິຈາກເລືອດ ແບບບໍ່ຫວັງສິ່ງຕອບແທນ ຊ່ວຍເຫລືອສັງຄົມ ເພື່ອປະກອບ ສ່ວນອັນສຳຄັນ ໃຫ້ແກ່ການສະໜອງເລືອດໃຫ້ພຽງພໍ, ຊ່ວຍເຫລືອຄົນເຈັບ ໃນກໍລະນີຕ່າງໆ ທີ່ກຳລັງຂາດເລືອດ, ມີຄວາມຈຳເປັນ ຕ້ອງໄຊ້ເລືອດ ເພື່ອກອບກູ້ເອົາຊີວິດຄືນມາ.

 

 

ຂໍ້ມູນຈາກ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)