GMT+7 14/12/2017 17:12

ພິທີມອບ-ຮັບ ສູນວິໄຈທົດລອງວິທະຍາສາດ

 

 

ໃນວັນທີ 5 ທັນວາ 2017 ນີ້ ຢູ່ສະຖາບັນນິເວດວິທະຍາ ແລະ ຊີວະເຕັກໂນໂລຊີ ຫລັກ 14 ເມືອງໄຊທານີ ນະຄອນຫລວງວຽງຈັນ, ໄດ້ຈັດມີພິທີ ມອບ-ຮັບ ສູນວິໄຈ-ທົດລອງ ວິທະຍາສາດ ຕ່າງໜ້າມອບໂດຍ ທ່ານ ເຈົາວັນມິງ ກຳມະການສູນກາງພັກ, ປະທານສະພາວິທະຍາສາດ ແລະ ເຕັກໂນໂລຊີ ແຫ່ງ ສສ ຫວຽດນາມ ແລະ ຕາງໜ້າຮັບໂດຍ ທ່ານ ບໍ່ວຽງຄຳ ວົງດາລາ ກຳມະການສູນກາງພັກ, ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ, ປະທານສະພາ ວິທະຍາສາດແຫ່ງຊາດລາວ.

ທ່ານ ບໍ່ວຽງຄຳ ວົງດາລາ ກ່າວວ່າ: ການຈັດພິທີມອບ-ຮັບສູນດັ່ງກ່າວ, ແມ່ນມີຄວາມໝາຍຄວາມສຳຄັນ ຕໍ່ວຽກງານການຄົ້ນຄວ້າພັດທະນາວິທະຍາສາດ ແລະ ເຕັກໂນໂລຊີຂອງ ສປປ ລາວ ພວກເຮົາ, ສູນວິໄຈ-ທົດລອງດັ່ງກ່າວ, ພາຍໃຕ້ໂຄງການເພີ່ມທະວີຄວາມອາດສາມາດ ໃນການຄົ້ນຄວ້າ ແລະ ພັດທະນາວິທະຍາສາດເຕັກໂນໂລຊີ ໃຫ້ແກ່ສະພາວິທະຍາສາດແຫ່ງຊາດ ສປປ ລາວ, ໂດຍການຊ່ວຍເຫລືອລ້າ ຈາກລັດຖະບານ ສສ ຫວຽດນາມ ເວົ້າລວມ, ເວົ້າສະເພາະ ຍ້ອນຄວາມເອົາໃຈໃສ່ ແລະ ໃຫ້ການສະໜັບສະໜູນຂອງສະພາວິທະຍາສາດ ແລະ ເຕັກໂນໂລຊີ ສສ ຫວຽດນາມ ກໍຄື ຄະນະກຳມະທິການຮ່ວມມື ລະຫວ່າງ ລາວ-ຫວຽດນາມ, ຫວຽດນາມ-ລາວ ຕໍ່ສະພາວິທະຍາສາດແຫ່ງຊາດລາວ.

ເປົ້າໝາຍຂອງໂຄງການ ເບື້ອງຕົ້ນແມ່ນແນໃສ່ເພີ່ມທະວີຄວາມອາດສາມາດ ໃນການຄົ້ນຄວ້າວິ ທະຍາສາດ ແລະ ພັດທະນາເຕັກໂນໂລຊີ ໃນຂົງເຂດວິທະຍາສາດ, ທໍລະນີສາດ ແລະ ວິທະຍາສາດສິ່ງທີ່ມີຊີວິດ (ເຄມີ-ຊີວະ) ເພື່ອຕອບ ສະໜອງ ໃນການພັດທະນາເສດຖະກິດ-ສັງຄົມ ຂອງ ສປປ ລາວ. ສຳລັບໂຄງການດັ່ງກ່າວ ເລີ່ມແຕ່ 2016-2018 ດ້ວຍມູນຄ່າ 63 ຕື້ດົງ.

 

 

ຂໍ້ມູນຈາກ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)