GMT+7 14/12/2017 17:13

ອຸດສະຫະກຳ-ການຄ້າແຂວງເອົາໃຈໃສ່ວຽກງານກວດກາ

 

 

ຕາມ​ການ​ລາຍ​ງານ​ຈາກ ທ່ານ ສຸລິ​​ໃສ ​ແກ້ວ​ທິດາ ຫົວໜ້າຂະ​ແໜງການ​ຄ້າ​ ພາຍ​ໃນ​ແຂວງ​ສາລະ​ວັນ​ ​ໄດ້​ໃຫ້​ຮູ້​ເມື່ອ​ບໍ່​ດົນ​ນີ້​ວ່າ: ໃນ​ໄລຍະ​ຜ່ານ​ມາ​​ ໄດ້​ແຕ່ງ​ຕັ້ງ​ພະນັກງານ ​ລົງ​ສົມທົບ​ກັບ​ເມືອງ​ ໃນ​ການ​ຄຸ້ມ​ຄອງ​ລະ​ຄາ​ສິນຄ້າ ແລະ​ ການ​ບໍລິການ​ ເປັນ​ຕົ້ນ ​ແມ່ນ​ເຂົ້າ, ຊີ້ນ, ປາ, ນ້ຳມັນ ​ແລະ ​ອື່ນໆ ​ເນື່ອງ​ຈາກ​ວ່າວຽກງານ​ ຄຸ້ມ​ຄອງ​ກວດກາ​ສິນຄ້າ​ ​​ແມ່ນ​ວຽກໜຶ່ງທີ່​ສຳຄັນ ​ໃນ​ການ​ພັດທະນາ ​ເສດຖະກິດ-ສັງຄົມ​ ພາຍ​ໃນ​ແຂວງ​ໃຫ້​ສົມ​ຄູ່​ກັບ​ ການ​ຂະຫຍາຍຕົວ​ຂອງ​ເສດຖະກິດ ​ແລະ ​ຕາມ​ແນວທາງ​ນະ​ໂຍບາຍ​, ກົດໝາຍຕ່າງໆ ຂອງ​ພັດ​-ລັດວາງ​ອອກ​ໃຫ້ຖືກຕ້ອງ.


ຜ່ານ​ການຈັດ​ຕັ້ງ​ປະຕິບັດ​ ມາດ​ຕະການ​ຕ່າງໆ ຕາມ​ລະບຽບກົດໝາຍ ຕໍ່ຜູ້​ລະ​ເມີດ​ມີ 15 ກໍລະ​ນີ​, ​ໄດ້​ປັບ​ໃໝ​ເປັນ​ເງິນ 48 ລ້ານກ່ວາກີບ ​ແລະ ​ໄດ້​ມອບ​ເຂົ້າງົບ ປະມານ​ລັດເກືອບ 39 ລ້ານກີບ, ​ໄດ້​ກວດກາ​ສິນຄ້າ ​ທີ່​ຕ້ອງຫ້າມ​ຄ້າຂາຍ ​ແລະ ​ຈຳໜ່າຍ​ ເປັນ​ຕົ້ນ​ ຈັກ​ສະຕິ​ນ ພ້ອມ​ເຄື່ອງ​ອາ​ໄຫລ່, ອາວຸດ​ລ້າ​ເນື້ອ, ທາດ​ເຄມີ ​ແລະ​ ສິນຄ້າ​ບໍ່​ໄດ້​ມາດຖານ​ມີ 332 ຫົວໜ່ວຍ, ມີ​ມູນ​ຄ່າ 121 ລ້ານກວ່າກີບ, ນອກ​ນັ້ນ ​ກໍໄດ້​ເອົາ​ໃຈ​ໃສ່​ ໃນ​ການ​ເຄື່ອນ​ໄຫວກວດກາ​ ສິນຄ້າ​ນອກ​ລະບົບ ​ສາມາດ​ພົບ​ເຫັນ​ 5 ກໍລະນີ, ​ໃນ​ນີ້​ມີ​ການ​ເຄື່ອນ​ຍ້າຍ​ ນຳ​ເຂົ້າ-​ສິນຄ້າ​ປະ​ເພດ ​ເຄື່ອງ​ອຸປະ​ໂພ​ກ-ບໍລິ​ໂພ​ກ ຈາກ​ຕ່າງປະ​ເທດ ​ທີ່​ລົບຫລີກພາສີ​ອາກອນ ຫລື ​ເສຍ​ພັນທະບໍ່​ເຕັມ ອັດຕາ​ສ່ວນ ​ແລະ ​ເຄື່ອນ​ຍ້າຍ​ສິນຄ້າ​ປະ​ເພດ​ໄມ້​ດູ່​ ທີ່​ບໍ່​ໄດ້​ຮັບ​ອານຸຍາດ ​ຈາກ​ຂະ​ແໜງການ​ທີ່​ກ່ຽວຂ້ອງ​ ຈຳນວນ 21 ຕັບ, ມີ​ບໍລິ​ມາດ 0,732 ​ແມັດ​ກ້ອນ, ພ້ອມ​ທັງ​ໄດ້​ສຶກສາ​ອົບຮົມ ​ແລະ ປັບ​​ໃໝ່ 24ລ້ານກ່ວາກີບ, ​ໄດ້​ມອບ​ເຂົ້າ​ງົບປະມານ​ຂອງ​ລັດ ເກືອບ 20 ລ້ານກີບ.

 

 

ຂໍ້ມູນຈາກ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)