GMT+7 14/12/2017 17:10

ສ້າງຂີດຄວາມສາມມາດແກ່ນັກສຶກສາ ໃນການຂຽນແຜນທຸລະກິດດ້ານກະສິກຳ

 

 

ວິທະຍາໄລ ກະສິກຳ ແລະ ປ່າໄມ້ພາກເໜືອ ໄດ້ຈັດງານແຂ່ງຂັນ ແນວຄວາມຄິດທຸລະກິດກະສິກຳ ແລະ ປ່າໄມ້ທີ່ຍືນຍົງ ຄັ້ງທີ II ຮອບສຸດທ້າຍ ​ໃນ​ວັນ​ທີ 25 ສິງຫາ 2017 ພາຍຫລັງ​​ເລີ່​ມ ແຂ່ງຂັນມາແຕ່ວັນທີ່ 5 ສິງຫາ ຜ່ານ​ມາ. ທັງ​ນີ້ ກໍເພື່ອ​ເປັນ​ການສ້າງຂີດຄວາມສາມາດ ໃຫ້ນັກສຶກສາປີທີ 3 ຮຸ່ນທີ 6 ຂອງທຸກສາຂາວິຊາ ໃນການຂຽນແຜນທຸລະກິດກະສິກຳ ແລະ ສະໜັບສະໜູນດ້ານວິຊາການ ເພື່ອກໍ່ສ້າງຜູ້ປະກອບການໄວໜຸ່ມ ໃຫ້ເຂົາເຈົ້າສາມາດໄດ້ປະກອບທຸ ລະກິດ ເປັນຂອງຕົນເອງໃນອານາຄົດ.

ໃນປີນີ້ ມີນັກສຶກສາເຂົ້າຮ່ວມແຂ່ງຂັນທັງໝົດ 16 ທີມ ໃນ 60 ແນວຄວາມຄິດ ແລະ ຄັດເລືອກໄດ້ 11 ທີມ ແລະ 11 ແນວຄວາມຄິດ ເຂົ້າຮ່ວມແຂ່ງຂັນໃນຮອບສຸດທ້າຍ, ໂດຍມີການນຳເອົາຜະລິດຕະພັນທີ່ຜະລິເອງ ມາປຸງແຕ່ງໃຫ້ສອດ ຄ່ອງກັບຫົວຂໍ້ ທີ່ຄົ້ນຄ້ວາຮ່ວມກັນ ແລະ ມີທຶນສະໜັບສະໜູນຈາກໂຄງການ ແລະ ຫົວໜ່ວຍທຸລະກິດຕ່າງໆ. ​ໃນ​ການ​ແຂ່ງຂັນຜູ້ຕາງໜ້າແຕ່ລະທີມ ໄດ້ນຳສະເໜີ ກ່ຽວກັບທຸລະກິດທີ່ໄດ້ຄົ້ນຄວ້າ ຮ່ວມກັນພາຍໃນກຸ່ມ. ຜ່ານ​ການ​ແຂ່ງ​ຂັ້ນ ຄະນະກຳມະການໄດ້ລົງຄະແນນສຽງຕັດສີນໃຫ້ທີມ: ຈິ່ງລີດແປຮູບ ເປັນທີມຊະນະເລີດ ໄດ້ຮັບເງິນ 6.500.000 ກີບ, ຮອງຊະນະເລີດ ແມ່ນທີມ ສວນກະສິກຳຍືນຍົງ ໄດ້ຮັບເງິນ 5 ລ້ານກີບ ແລະ ອັນ​ດັບ​ທີ 3 ແມ່ນທີມ ໄກ່ອົບໄຫສະ ໝຸນໄພ ໄດ້ຮັບເງິນ 3 ລ້ານກີບ, ສ່ວນລາງວັນຂວັນໃຈມວນຊົນ ແມ່ນທີມນາງງາມໃນຫ້ອງມືດ ໄດ້ຮັບເງິນ 2 ລ້ານກີບ, ພິເສດ ໂຄງການຕາບີ(ໂຄງການພັດທະນາກະສິກຳທີ່ຍືນຍົງ) ໄດ້ມອບເງິນຊົມເຊີຍ ຈຳນວນ 1.500.000 ກີບ ໃຫ້ທີມ ຊານາງພັນປີ ແລະ ທີມເຫັດບົດທອດສະໝຸນໄພ. ສ່ວນທີມທີ່ບໍ່ຕິດ​ອັນ​ດັບ ແມ່ນໄດ້ລາງວັນຊົມເຊີຍທີມລະ 500.000 ກີບ.

ການແຂ່ງຂັນທັງສອງຄັ້ງ ແມ່ນໄດ້ຮັບການສະໜັບສະໜູນ ຈາກໂຄງການຊູລາໂກ, ໂຄງການດູລັດສ (ໂຄງການສົ່ງເສີມກະສິກຳຮອບດ້ານ) ແລະ ບໍລິສັດປຶກສາດ້ານການພັດທະນາວິສາຫະກິດຈຳກັດEDC. 

 

 

ຂໍ້ມູນຈາກ: ສຳນັກຂ່າວສານປະເທດລາວ

 

ຄວາມຄິດເຫັນຂອງຜູ້ອ່ານ (0)