GMT+7 14/12/2017 17:12

10 ເດືອນ ໄອຍະການແຂວງອັດຕະປືຮັບສໍານວນ ຄະດີມາຄົ້ນຄ້ວາ 325 ເລື່ອງ

 

 

ໃນໄລຍະ 10 ເດືອນຂອງປີ 2017 ນີ້ ອົງການໄອຍະການປະຊາຊົນແຂວງ ແລະ ໄອຍະການເຂດ ຂອງແຂວງອັດຕະປື ໄດ້ຮັບສໍານວນຄະດີມາຄົ້ນຄວ້າ ລວມມີຄະດີອາຍາຂັ້ນຕົ້ນ 325 ເລື່ອງ, ຄະນະທີ່ຄະດີຄ້າ-ຂາຍຢາເສບຕິດ ແລະ ຄະດີລັກຊັບພົນລະເມືອງຍັງແມ່ນຄະດີທີ່ພົ້ນເດັ່ນ ເຊິ່ງກວມອັດຕາຫລາຍກວ່າຄະດີອື່ນໆ.

ທ່ານ ສົມພົງ ສີຊານົນ ຫົວໜ້າອົງການໄອຍະການປະຊາຊົນ ແຂວງອັດຕະປື ໃຫ້ຮູ້​ເມື່ອ​ບໍ່​ດົນ​ນີ້ວ່າ: ນັບແຕ່ເດືອນມັງກອນຫາເດືອນຕຸລາ ອົງການໄອຍະການປະຊາຊົນແຂວງອັດຕະປື ໄດ້ຮັບສໍານວນຄະດີ ເພື່ອມາຄົ້ນຄວ້າມີທັງໝົດ 325 ເລື່ອງ, ທຽບໃສ່ໄລຍະດຽວກັນຂອງປີຜ່ານມາຄະດີຫລຸດລົງ 52 ເລື່ອງ, ໃນຈໍານວນຄະດີທັງໝົດແກ້ໄຂໄດ້ແລ້ວ 318 ເລື່ອງ, ສົ່ງໃຫ້ເຈົ້າໜ້າທີ່ສືບສວນ-ສອບສວນຄືນ 122 ເລື່ອງ, ສັ່ງຟ້ອງຂຶ້ນສານ 172 ເລື່ອງ, ຊັດມ້ຽນ 20 ເລື່ອງ, ໂຈະການດໍາເນີນຄະດີ 3 ເລື່ອງ, ຍັງຄ້າງ 7 ເລື່ອງ, ມີຄະດີອາຍາຂັ້ນອຸທອນ 1 ເລື່ອງແກ້ໄຂສໍາເລັດແລ້ວ. ພ້ອມນັ້ນຍັງໄດ້ອອກຄໍາສັ່ງຈັບຕົວ 52 ສະບັບ, ອອກຄໍາສັ່ງກັກຂັງພາງ 303 ສະບັບ ແລະ ຕໍ່ຄໍາສັ່ງກັກຂັງພາງມີ 137 ສະບັບ, ອອກຄໍາສັ່ງປ່ອຍຕົວພາງມີ 50 ສະບັບ, ອອກຄໍາສັ່ງກວດຄົ້ນເຄຫະສະຖານມີ 4 ສະບັບ, ອອກຄໍາສັ່ງຢຶດ ແລະ ອາຍັດມີ 1 ສະບັບ.

ທ່ານ ສົມພົງ ສີຊານົນ ຍັງ​ໃຫ້​ຮູ້​ອີກວ່າ: ນອກຈາກການຄົ້ນຄວ້າສໍານວນຄະດີແລ້ວທາງອົງ ການໄອຍະການປະຊາຊົນແຂວງອັດຕະປື ຍັງໄດ້ຕິດຕາມກວດກາເກັບກໍາສະຖິຕິຜູ້ຖືກຫາ ແລະ ນັກ ໂທດ, ໃນນັ້ນມີຜູ້ຖືກຫາທັງໝົດ 174 ຄົນ, ຜູ້ຖືກຫາຄົນຕ່າງປະເທດ 10 ຄົນ, ອອກອະນຸຍາດປິ່ວປົວມີ 2 ຄົນ, ນັກໂທດມີທັງໝົດ 272 ຄົນ, ຍິງ 78 ຄົນ, ນັກໂທດຄົນຕ່າງປະເທດມີ 9 ຄົນ, ຍິງ 5 ຄົນ, ອະນຸຍາດນັກໂທດອອກປິ່ນປົວ 45 ຄົນ, ຍິງ 25 ຄົນ, ມີຜູ້ຖືກຫາ ແລະ ນັກໂທດໂຕນຄ້າຍຄຸມຂັງ 6 ຄົນ, ເປັນຄົນຕ່າງປະເທດ 2 ຄົນ, ໄດ້ສະເໜີອະໄພຍະໂທດໃຫ້ນັກໂທດ 24 ຄົນ, ໃນນັ້ນສະເໜີອະໄພຍະໂທດຫລຸດຜ່ອນໂທດ 21 ຄົນ, ຍິງ 7 ຄົນ, ຄົນຕ່າງປະເທດ 2 ຄົນ, ຍິງ 1 ຄົນ ແລະ ສະເໜີອະໄພ ຍະໂທດປ່ອຍຕົວ 3 ຄົນ.

 

 

ຂໍ້ມູນຈາກ: ສຳນັກຂ່າວສານປະເທດລາວ

 

ຄວາມຄິດເຫັນຂອງຜູ້ອ່ານ (0)