GMT+7 14/12/2017 17:13

ບັນດາປະເທດອາຊຽນ ຫາລືການລັກລອບເຂົ້າ- ອອກເມືອງ ແລະ ອາດຊະຍາກຳຂ້າມຊາດ

 

 

ກອງປະຊຸມຫົວໜ້າຕຳຫລວດກວດຄົນເຂົ້າ-ອອກເມືອງ ແລະ ຫົວໜ້າພະແນກກົມກົງສູນ ກະຊວງການຕ່າງປະເທດອາຊຽນ ຄັ້ງທີ 21 ໄດ້ໄຂຂຶ້ນຢ່າງເປັນທາງການ ໃນວັນທີ 22 ພະຈິກ 2017 ທີ່ນະຄອນຫລວງວຽງຈັນ ເພື່ອປຶກສາຫາລື ແລກປ່ຽນຂໍ້ມູນ ທາງດ້ານການຕ້ານ ແລະ ສະກັດກັ້ນການລັກລອບເຂົ້າ-ອອກເມືອງທີ່ຜິດກົດໝາຍ ລວມທັງອາດຊະຍາກຳຂ້າມຊາດ, ການຕ້ານການກໍ່ການຮ້າຍ ແລະ ການຄ້າມະນຸດ ແນໃສ່ ເພື່ອເຮັດໃຫ້ຂົງເຂດອາຊຽນມີຄວາມສະ ຫງົບທາງດ້ານການເມືອງ, ວັດທະນະທຳ-ສົງຄົມ ແລະ ເສດຖະກິດ.

 

ສປປ ລາວ ໄດ້ຮັບກຽດເປັນເຈົ້າພາບຈັດກອງປະຊຸມດັ່ງກ່າວ ​ເຊິ່ງຈັດໂດຍກົມຕຳຫລວດກວດຄົນເຂົ້າ-ອອກເມືອງ ກົມໃຫຍ່ສັນຕິບານ ກະຊວງປ້ອງກັນຄວາມສະຫງົບ ຮ່ວມກັບພະແນກກົມກົງສູນ ກະຊວງການຕ່າງປະເທດ ພາຍໃຕ້ ການເປັນປະທານຂອງ ທ່ານ ພັນໂທ ສາຍສະໝິງ ສີວິໄລ ຫົວໜ້າກົມຕຳຫລວດກວດຄົນເຂົ້າ-ອອກເມືອງ, ມີບັນດາຫົວໜ້າຄະນະຜູ້ແທນ ເຈົ້າໜ້າທີ່ກວດຄົນເຂົ້າ-ອອກເມືອງ, ຫົວໜ້າພະແນກກົມກົງສູນ ກະຊວງການຕ່າງປະເທດ ຈາກບັນດາປະເທດສະມາຊິກອາຊຽນ ແລະ ຫົວໜ້າກອງເລຂາອາຊຽນ ເຂົ້າຮ່ວມ.

 

ກອງປະຊຸມດັ່ງກ່າວ, ບັນດາຜູ້ແທນຈາກປະເທດສະມາຊິກອາຊຽນ ໄດ້ຮັບຟັງການລາຍງານສະພາບການຢູ່ພາຍໃນພາກພື້ນ ແລະ ຜົນສຳເລັດ ກ່ຽວກັບການຮ່ວມມືການຈັດຕັ້ງປະຕິບັດແຜນງານ, ໂຄງການ ທີ່ໄດ້ຮັບຮອງເອົາຢູ່ໃນ ກອງປະຊຸມຄັ້ງທີ 20 ໃນປີຜ່ານມາ, ພ້ອມທັງຄົ້ນຄວ້າພິຈາລະນາແລະ ຮັບຮອງເອົາບັນດາແຜນງານ, ໂຄງການ ກໍຄື ທິດທາງການຮ່ວມມືໃນຕໍ່ໜ້າ ເປັນຕົ້ນ ແມ່ນການແລກປ່ຽນຂໍ້ມູນຂ່າວສານ ກ່ຽວກັບວຽກງານຕ້ານ ແລະ ສະກັດກັ້ນການລັກລອບເຂົ້າ-ອອກເມືອງ ລວມທັງອາດຊະຍາກຳຂ້າມຊາດເຊັ່ນ: ການຕ້ານການກໍ່ການຮ້າຍ, ການຄ້າມະນຸດ ແລະ ອື່ນໆ. ພ້ອມກັນນີ້, ຍັງໄດ້ຮ່ວມກັນປຶກສາຫາລື ເພື່ອຫາວິທີແກ້ໄຂບັນຫາການເຄື່ອນຍ້າຍແຮງງານ, ການນຳໃຊ້ໜັງສືເດີນທາງບໍ່ຖືກຕ້ອງ ແລະ ບັນຫາອື່ນໆ ທີ່ເປັນໄພຂົ່ມຂູ່ຕໍ່ຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ສົ່ງຜົນກະທົບຕໍ່ການດຳລົງ ຊີວິດຂອງປະຊາຊົນ ລວມທັງການພັດທະນາເສດຖະກິດ-ສັງ ຄົມຂອງບັນດາປະເທດສະມາຊິກອາຊຽນ.

 

ທ່ານ ພົນຕີ ກົງທອງ ພົງວິຈິດ ຮອງລັດຖະມົນຕີກະຊວງປ້ອງກັນຄວາມສະຫງົບ ໄດ້ກ່າວວ່າ: ບັນຫາການເຄື່ອນຍ້າຍແຮງງານ, ການລັກລອບເຂົ້າອອກ-ເມືອງ, ການກໍ່ການຮ້າຍ, ອາດຊະຍາກຳຂ້າມຊາດ ແລະ ການນຳໃຊ້ໜັງສືເດີນທາງ ຂອງຄົນອື່ນ ທີ່ນອນຢູ່ໃນຂອບເຂດຄວາມຮັບຜິດ ຊອບຂອງອາຊຽນ ຍັງເປັນບັນຫາທີ່ທ້າທາຍ ແລະ ເປັນໄພຂົ່ມຂູ່ຕໍ່ຄວາມສະຫງົບ ແລະ ຄວາມເປັນລະບຽບ ຮຽບຮ້ອຍຂອງສັງຄົມ, ສົ່ງຜົນກະທົບ ໂດຍກົງຕໍ່ການດຳລົງຊີວິດ ຂອງປະຊາຊົນ ແລະ ການພັດທະນາເສດຖະກິດ-ສັງຄົມຂອງຫລາຍປະເທດ ໂດຍສະເພາະ ບັນດາປະເທດສະມາຊິກອາຊຽນ, ເຊິ່ງບໍ່ມີປະເທດໃດ ສາມາດແກ້ໄຂບັນຫາດ້ວຍຕົນເອງໄດ້ ຖ້າປາສະຈາກການ ຮ່ວມມື ແລະ ແລກປ່ຽນຂໍ້ມູນຂ່າວສານ. ສະນັ້ນ, ກອງປະຊຸມຄັ້ງນີ້ ຖືວ່າເປັນນິມິດໝາຍສຳຄັນ ເພາະເປັນການທົບທວນຄືນ ການຈັດຕັ້ງປະຕິບັດວຽກງານໄນໄລຍະຜ່ານມາ ແລະ ຄົ້ນຄວ້າວາງແຜນ ຮ່ວມມືກັນ ເພື່ອສ້າງ ເງື່ອນໄຂອຳນວຍ ຄວາມສະດວກໃຫ້ແກ່ ການພັດທະນາເສດຖະກິດ-ສັງຄົມ ຂອງບັນດາປະ ເທດຕ່າງໆ ໃນພາກພື້ນອາ ຊຽນ ກໍຄື ໃນໂລກ.

 

 ກອງປະຊຸມຄັ້ງນີ້ ຈະເປັນເວທີແຫ່ງຄວາມສາມັກຄີ, ມິດຕະພາບ ແລະ ການປຶກສາຫາລືທີ່ກົງໄປກົງມາ ເພື່ອຮ່ວມມືກັນຊອກຫາວິທີທາງແກ້ໄຂບັນຫາດັ່ງກ່າວ ໃຫ້ມີປະສິດທິຜົນສູງກວ່າເກົ່າ ເພື່ອໃຫ້ບັນດາປະເທດສະມາຊິກອາຊຽນ ແລະ ບັນດາປະເທດໃນໂລກ ມີຄວາມສະຫງົບ ແລະ ເປັນລະບຽບຮຽບຮ້ອຍໃນສັງຄົມ, ເສດຖະກິດໄດ້ຮັບການພັດທະນາຢ່າງຕໍ່ເນື່ອງ, ປະຊາດຊົນມີຄວາມຜາສຸກ ແລະ ຈະເລີນກ້າວໜ້າ, ພ້ອມທັງຮຽກຮ້ອງໃຫ້ບັນດາຜູ້ແທນ ຈົ່ງພ້ອມກັນປະກອບ ສ່ວນຢ່າງຫ້າວ ຫັນໃນການປຶກສາຫາລື ​ເພື່ອກຳນົດມາດຕະການ, ແຜນງານ ແລະ ໂຄງການຮ່ວມມືຕ່າງໆ ເພື່ອໃຫ້ບັນລຸຈຸດປະສົງ ແລະ ເປົ້າໝາຍທີ່ວາງໄວ້.

 

 

 

ຂໍ້ມູນຈາກ: ສຳນັກຂ່າວສານປະເທດລາວ

 

ຄວາມຄິດເຫັນຂອງຜູ້ອ່ານ (0)