GMT+7 14/12/2017 17:13

ຮັບຮອງຮ່າງກົດໝາຍ ຜັງເມືອງ-ກວດກາລັດ ສະບັບປັບປຸງ

 

 

ກອງ​ປະຊຸມ​ສະໄໝ​ສາມັນເທື່ອ​ທີ 4 ຂອງ​ສະພາ​ແຫ່ງ​ຊາດ ຊຸດ​ທີ VIII ໃນ​ວັນ​ທີ 16 ພະຈິກ 2017 ທີ່​ຫ້ອງ​ວ່າການ​ສູນ​ກາງພັກ ໂດຍ​ເປັນ​ປະທານ​ຂອງ​ທ່ານ ສົມ​ພັນ ແພງ​ຄຳ​ມີ ຮອງ​ປະທານສະພາ​ແຫ່ງ​ຊາດ ມີ​ບັນດາ​ຮອງປະທານ​ສະພາ​ແຫ່ງ​ຊາດ ສະ​ມາຊິກ​ສະພາ​ແຫ່ງ​ຊາດ (​ສສຊ) ແລະ ພາກສ່ວນ​ກ່ຽວຂ້ອງ​ເຂົ້າຮ່ວມ.

 

ສຳລັບ​ພາກ​ເຊົ້າ​ທ່ານ ບຸນ​ຈັນ ສິນ​ທະ​ວົງ ລັດຖະມົນຕີ​ກະຊວງໂຍທາ​ທິ​ການ ແລະ ຂົນສົ່ງ ໄດ້ສະເໜີ​ກົດໝາຍ​ວ່າ​ດ້ວຍ​ຜັງເມືອງ (ສະບັບ​ປັບປຸງ) ທີ່​ໄດ້​ປະກາດ​ໃຊ້​ປີ 1999 ເປັນຕົ້ນ​ມາ ເພື່ອ​ແນໃສ່​ຕອບ​ສະໜອງ​ຄວາມຕ້ອງການ​ຂອງ​ການ​ຄຸ້ມ​ຄອງ ແລະ ພັດທະນາ​ເສດຖະກິດ-ສັງຄົມ​ໃນ​ປັດຈຸບັນ ຈຶ່ງ​ຈຳເປັນ​ຕ້ອງໄດ້​ປັບປຸງ​ໃຫ້​ສອດຄ່ອງ ແລະ ຮັດກຸມ​ຂຶ້ນ​ຕື່ມ ໃນ​ນີ້ ກົດໝາຍ​ສະບັບນີ້ ປະກອບ​ມີ 9 ພາກ 14 ໝວດ 96 ມາດຕາ ໃນ​ນີ້ ປັບປຸງ​ຄືນໃໝ່ 32 ມາດຕາ ແລະ ເພີ່ມ​ເຂົ້າ​ໃໝ່ 64 ມາດຕາ ເປັນ​ການຈັດຕັ້ງ​ຜັນຂະຫຍາຍ​ນະໂຍບາຍ​ຂອງ​ພັກ ແລະ ແຜນການ​ຂອງ​ລັດ​ໃນ​ຂະແໜງ​ໂຍທາ​ທິ​ການ ແລະ ຂົນສົ່ງ ໃຫ້​ຮັດກຸມຈະແຈ້ງ ແລະ ປາກົດຜົນ​ເປັນ​ຈິງ ໂດຍ​ສະເພາະ ການແບ່ງ​ຂັ້ນ​ຄຸ້ມ​ຄອງ ລະຫວ່າງ​ສູນກາງ ແລະ ທ້ອງຖິ່ນ ເປັນ​ນິຕິ​ກຳ ແລະ ເຄື່ອງມື​ທີ່​ຮັດກຸມຄົບ​ຖ້ວນ ສຳລັບ​ວຽກ​ງານ​ຄຸ້ມ​ຄອງ ແລະ ພັດທະນາ​ຕົວ​ເມືອງ ສ້າງ​ເງື່ອນໄຂ​ອຳນວຍ​ຄວາມ​ສະດວກ​ໃຫ້​ສັງຄົມ ປະກອບສ່ວນ​ໃນ​ການ​ຈັດຕັ້ງ-ຄຸ້ມ​ຄອງ​ຜັງເມືອງ ລົງທຶນ​ໃນການ​ກໍ່ສ້າງ​ພື້ນຖານ​ໂຄງ​ລ່າງ​ຕົວເມືອງ​ໃຫ້​ມີ​ປະ​ສິດທິ​ຜົນ.

 

ສຳລັບ​ພາກ​ບ່າຍ ທ່ານ ບຸນ​ທອງ ຈິດ​ມະນີ ຮອງ​ນາຍົກລັດຖະມົນຕີ ປະທານ​ອົງການກວດກາ​ລັດຖະບານ ໄດ້​ສະເໜີກົດໝາຍ​ວ່າ​ດ້ວຍ​ການ​ກວດກາລັດ ສະບັບ​ປັບປຸງ ເຊິ່ງ​ໄດ້​ຖືກ​ປະກາດ​ໃຊ້​ແຕ່​ປີ 2007 ເປັນຕົ້ນ​ມາ ເພື່ອ​ໃຫ້​ສາມາດ​ສະໜອງ​ຄວາມຕ້ອງການ​ຂອງ​ການ​ຄຸ້ມ​ຄອງ ແລະ ພັດທະນາ​ເສດຖະກິດ-ສັງຄົມ​ໃນ​ປັດຈຸບັນ ຈຶ່ງ​ຈຳເປັນ​ຕ້ອງໄດ້​ປັບປຸງ​ໃຫ້​ສອດຄ່ອງ ແລະ ຮັດກຸມ​ຂຶ້ນ​ຕື່ມ ກົດໝາຍ​ສະບັບ​ນີ້​ປະກອບ​ມີ 10 ພາກ 6 ໝວດ 80 ມາດຕາ ໃນ​ນີ້ ໄດ້​ສ້າງ​ໃໝ່ 4 ມາດຕາ ປັບປຸງ 51 ມາດຕາ ແລະ ຮັກສາ​ເນື້ອ​ໃນ​ເກົ່າ 25 ມາດຕາ ກົດໝາຍ​ສະບັບ​ນີ້​ຈະເຮັດ​ໃຫ້ການ​ຄຸ້ມ​ຄອງ​ລັດ-ຄຸ້ມຄອງ​ເສດຖະກິດ-ສັງຄົມ ຫັນ​ເຂົ້າສູ່​ລະບຽບ​ກົດໝາຍ​ຢ່າງ​ເຂັ້ມ​ງວດ ມີ​ລະບົບ​ຕາ​ໜ່າງ​ການຈັດຕັ້ງ​ຕິດຕາມ-ກວດກາ ກວ້າງຂວາງ ແລະ ເຂັ້ມແຂງ ສາມາດ​ຕິດຕາມກຳ​ໄດ້​ຜູ້​ທີ່​ມີ​ພຶດຕິ​ກຳ​ບໍ່​ຖືກຕ້ອງ ແລະ ເປັນ​ເຄື່ອງມື​ໃຫ້​ແກ່​ການເຄື່ອນ​ໄຫວ ​ປະຕິບັດ​ໜ້າທີ່​ຂອງອົງການ​ກວດກາ​ລັດ​ແຕ່​ລະ​ຂັ້ນ ​ມີຄວາມ​ຄ່ອງ​ຕົວ ແລະ ສອດ​ຫ້ອຍໃນ​ທຸກ​ຂົງເຂດ​ວຽກ​ງານ ທັງ​ຈະຍົກ​ສູງ​ຄວາມ​ຮັບຜິດຊອບ​ຂອງອົງການ​ບໍລິຫານ​ລັດ​ແຕ່​ລະ​ຂັ້ນ ໃນ​ການຈັດຕັ້ງ​ປະຕິບັດ​ຜົນ​ຂອງການ​ກວດກາ ໃຫ້​ມີ​ປະ​ສິດທິ​ຜົນຂຶ້ນ​ຕື່ມ.

 

ພາຍຫຼັງ ​ສສຊ ກໍ່​ໄດ້​ປະກອບ​ຄຳເຫັນ​ຢ່າງ​ກົງ​ໄປ​ກົງ​ມາ ແລະ ດ້ວຍ​ຄວາມ​ຮັບຜິດຊອບ​ສູງ ເພື່ອໃຫ້​ມີ​ເນື້ອ​ໃນ​ຄົບ​ຖ້ວນ​ສົມບູນ ແລະ ເປັນ​ເຄື່ອງມື​ດ້ານ​ນິຕິ​ກຳ ທີ່​ໜັກ​ແໜ້ນ​ໃນ​ການ​ປະຕິບັດວຽກ​ງານ​ດັ່ງກ່າວ​ ໃຫ້​ມີ​ປະ​ສິດທິຜົນ ຕອນ​ທ້າຍ ​ສສຊ ກໍ່​ໄດ້​ເປັນເອກະ​ພາບ​ຮັບຮອງ​ເອົາ​ກົດໝາຍສອງ​ສະບັບ​ປັບປຸງ​ ດ້ວຍ​ຄະແນນສຽງ​ສ່ວນ​ຫຼາຍ.

 

 

ຂໍ້ມູນຈາກ: ວຽງຈັນໃຫມ່

 

 

ຄວາມຄິດເຫັນຂອງຜູ້ອ່ານ (0)