GMT+7 14/12/2017 17:09

ສະພາແຫ່ງຊາດ ຮັບຮອງເອົາຮ່າງກົດໝາຍ ສະບັບປັບປຸງ 2 ສະບັບ

 

 

ກອງ​ປະຊຸມສະ​​ໄໝ​ສາມັນ​ ເທື່ອ​ທີ່ 4 ຂອງ​ສະພາ​ແຫ່ງ​ຊາດ ​ຊຸດ​ທີ XIII ​ໃນ​​ວັນ​ທີ 15 ພະຈິກ 2017 ນີ້ ໂດຍການເປັນປະທານ ຂອງທ່ານ ສົມພັນ ແພງຄຳມີ ຮອງປະທານ ສະພາແຫ່ງຊາດ ນັ້ນ ກອງ​ປະຊຸມ​ໄດ້ ຮັບຮອງ​ເອົາຮ່າງ​ກົດໝາຍ​ປັບປຸງ 2 ສະບັບ ຄື: ຮ່າງ​ກົດໝາຍວ່າ​ດ້ວຍ ຊັບສິນ​ທາງ​ປັນຍາ ​ ທີ່​ສະເໜີໂດຍທ່ານ ບໍ່ວຽງຄຳ ວົງດາລາ ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ ແລະ ຮ່າງໝາຍວ່າ​ດ້ວຍ ກຳມະບານ​ລາວ ສະເໜີໂດຍ ທ່ານ ປ້ານ ນ້ອຍມະນີ ປະທານສູນກາງກຳມະບານລາວ.

 

ກົດໝາຍວ່າດ້ວຍ ຊັບສິນທາງປັນຍາ ສະບັບປັດຈຸບັນ ຊຶ່ງໄດ້ຖືກຮັບຮອງ ໃນກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ VIIປີ 2011 ແລະ ໄດ້ປະກາດໃຊ້ ໃນປີ 2012 ເຊິ່ງປະກອບມີ 10 ພາກ 25 ໝວດ 169 ມາດຕາ ໃນນັ້ນໄດ້ປັບປຸງເນື້ອໃນ ຈຳນວນ 66 ມາດຕາ, ສ້າງຂຶ້ນໃໝ່ 5 ມາດຕາຄື: ມາດຕາ 54, 78, 79, 81 ແລະ 152, ລົບລ້າງ 1 ມາດຕາຄື: ມາດຕາ 127 ແລະ ຮັກສາເນື້ອໃນເກົ່າໄວ້ 98 ມາດຕາ, ໃນນັ້ນ ມີ 28 ມາດຕາໄດ້ຮັບການປັບປຸງຄຳສັບ.

 

ສຳລັບ ກົດໝາຍວ່າ​ດ້ວຍ ກຳມະບານ​ລາວ ​ໄດ້​ຖືກ​ຮັບຮອງ​ເອົາ​ ຢູ່​ກອງ​ປະຊຸມ​ສະ​ໄໝ​ສາມັນ ​ເທື່ອ​ທີ 4 ຂອງ​ສະພາ​ແຫ່ງ​ຊາດ ​ຊຸດ​ທີ VI ປີ 2007 ​ແລະ ​ໄດ້​ມີ​ລັດຖະດຳລັດ ຂອງ​ປະທານ​ປະ​ເທດ​ ປະກາດ​ໃຊ້ ​ໃນ​ປີ 2008 ​ໃນ​ໄລຍະ 10 ປີ ທີ່​ປະກາດ​ໃຊ້​ກົດໝາຍ​ສະບັບ​ນີ້ ​ໄດ້​ເປັນ​ບ່ອນ​ອີງ​ ອັນ​ແໜ້ນ​ແກ່ນ ​ໃນ​ການ​ປະຕິບັດ​ບົດບາດ, ສິດ ​ແລະ ໜ້າ​ທີ ຂອງ​ກຳມະບານ​​ແຕ່ລະ​ຂັ້ນ ​ເຮັດ​ໃຫ້​ສາຍ​ພົວພັນ​ແຮງ​ງານ​ ລະຫວ່າງ ​ຜູ້​ອອກ​ແຮງ​ງານ ກັບ​ຜູ້​ໃຊ້​ແຮງ​ງານ​ ໄດ້​ຮັບ​ການ​ປັບປຸງ​ດີ​ຂຶ້ນ ສ້າງ​ເງື່ອນ​ໄຂ ​ໃຫ້​ເຂົາ​ເຈົ້າ​ໄດ້​ຕັ້ງໜ້າ​ ປະກອບສ່ວນ​ປະຕິບັດ ​ແນວທາງ​ຂອງ​ພັກ, ​ແຜນ​ພັດທະນາ​ ເສດຖະກິດ-ສັງຄົມ​ ແຕ່ລະ​ໄລຍະ. ສ່ວນ​ຮ່າງກົດໝາຍວ່າ​ດ້ວຍ ກຳມະບານ​ລາວ ສະບັບປັບປຸງ ປີ 2017 ປະກອບ​ມີ 12 ພາກ, 53 ມາດຕາ ​​ເຊິ່ງໂຄງ​ສ້າງ​ຮ່າງ​ກົດໝາຍ​ ສະບັບ​ປັບປຸງ​ນີ້ ​ແມ່ນ​ໄດ້​ກຳນົດ​ແຈ້ງວ່າ​ ອົງການ​ຄຸ້ມ​ຄອງ ​ແລະ ການ​ກວດກາ​ ວຽກ​ງານ​ກຳມະບານ ​ແມ່ນ​ອົງການ​ດຽວ​ ໃນ​ລະບົບ​ການຈັດ​ຕັ້ງ​ ຂອງກຳມະບານ, ດັ່ງ​ນັ້ນ ​ເພື່ອ​ຫລີກ​ລ້ຽງ​ ການ​ຊ້ຳ​ຊ້ອນທາງ​ດ້ານ​ເນື້ອ​ໃນ ​ຢູ່​ພາກ​ຕ່າງໆ​ຈຶ່ງ​ມີ​ຄວາມ​ຈຳ​ເປັນ​ ປັບປຸງ​ໂຄງ​ສ້າງ​ຂຶ້ນ​ໃໝ່ ດ້ວຍ​ການ​​ໂຮມ​ເຂົ້າ, ຕັດ​ອອກ, ສ້າງ​ໝວດ, ສ້າງ​ມາດຕາ​ໃໝ່ ​ຈຳນວນ​ໜຶ່ງ ​ແລະ ຈັດ​ລຽງ​ຄືນ​ໃຫ້​ໄປ​ຕາມ​ໂລ​ຊິກ​ຂອງ​ວຽກ. ຈາກ​ການຈັດ​ວາງ​ໃໝ່​ນັ້ນ ​ເຮັດ​ໃຫ້​ຮ່າງ​ກົດໝາຍ ​ສະບັບ​ປັບປຸງ ຫລຸດ​ລົງ 1 ພາກ ລວມມີ 11 ພາກ, ​ເພີ່ມ​ຕື່ມ 4 ມາດຕາ ລວມມີ 57 ມາດຕາ, ​ໃນ​ນັ້ນ​ປັບປຸງ 35 ມາດຕາ ສ້າງ​ໃໝ່ 15 ມາດຕາ ​ແລະ ບໍ່​ໄດ້​ປັບປຸງ 7 ມາດຕາ.          

 

 

 

ຂໍ້ມູນຈາກ: ສຳນັກຂ່າວສານປະເທດລາວ

 

ຄວາມຄິດເຫັນຂອງຜູ້ອ່ານ (0)