GMT+7 14/12/2017 17:13

ອົງການໄອຍະການ ປະຊາຊົນສູງສຸດ ສະເໜີຮ່າງກົດໝາຍ ວ່າດ້ວຍການດຳເນີນຄະດີອາຍາ ສະບັບປັບປຸງ

 

 

ອົງການ​ໄອ​ຍະ​ການ ​ປະຊາຊົນ​ສູງ​ສຸດ​ ໄດ້​ສະ​ເໜີ​ຮ່າງ​ກົດໝາຍວ່າ​ດ້ວຍ ​ການ​ດຳ​ເນີນ​ຄະດີ​ອາຍ​າ ສະບັບ​ປັບປຸງ ຕໍ່​ກອງ​ປະຊຸມ​ສະ​ໄໝ​ສາມັນ ​ເທື່ອ​ທີ່ 4 ຂອງ​ສະພາ​ແຫ່ງ​ຊາດ​ ຊຸດ​ທີ VIII ​ໃນ​ວັນ​ທີ 14 ພະຈິກ 2017 ​ໂດຍ​ການ​ເປັນ​ປະ​ທານ​ຂອງ ​ທ່ານ ​ສົມ​ພັນ ​ແພງ​ຄຳ​ມີ ຮອງ​ປະ​ທານ​ ສະພາ​ແຫ່ງ​ຊາດ. ການ​ປັບປຸງ​ກົດໝາຍວ່າ​ດ້ວຍ​ ການ​ດຳ​ເນີນ​ຄະດີ​ອາຍາ​ໃນ​ຄັ້ງ​ນີ້ ຕົ້ນຕໍ​ແມ່ນ ​ສຸມ​ໃສ່​ປັບປຸງ​ກ່ຽວ​ກັບ​ພາກ​ການ​ດຳ​ເນີນ​ການ ​ສື​ບສວນ-ສອບ​ສວນ, ວິທີ​ການ​ສືບສວນ-ສອບ​ສວນ ​ແລະ ມາດ​ຕະການ​ສະກັດ​ກັ້ນ, ການ​ດຳ​ເນີນ​ຄະດີ​ ຢູ່​ສານ​ຂັ້ນ​ຕົ້ນ, ຂັ້ນ​ອຸທອນ ​ແລະ ຂັ້ນ​ລົບ​ລ້າງ, ພາກ​ການ​ປະຕິບັດ​ ຄຳ​ຕົກລົງ​ຂອງ​ສານ, ​ເຊິ່ງຮ່າງ​ກົດໝາຍ​ດັ່ງກ່າວ ປະກອບ​ມີ 15 ພາກ, 31 ໝວດ ​ແລະ 275 ມາດຕາ ​ໃນ​ນັ້ນ​ປັງ​ປຸງ​ເນື້ອ​​ໃນ 35 ມາດຕາ.

 

ທ່ານ ຄຳ​ສານ ສຸ​ວົງ ຫົວໜ້າ​ອົງການ​ໄອ​ຍະ​ການ ​ປະຊາຊົນ​ສູງ​ສຸດ ​ໄດ້​ໃຫ້​ຮູ້​ວ່າ: ກົດໝາຍ​ວ່າ​ດ້ວຍ​ ການ​ດຳ​ເນີນ​ຄະດີ​ອາຍາ ມີ​ຄວາມ​ຈຳ​ເປັນ​ຕ້ອງ​ ໄດ້​ປັບປຸງ​ບາງ​ມາດຕາ ​ເພື່ອ​ໃຫ້ສອດຄ່ອງ​ກັບ​ ລັດຖະທຳ​ມະນູນ ​ແລະ​ ກົດໝາຍ​ອື່ນ ​ເປັນ​ຕົ້ນ​ແມ່ນ ​ກົດໝາຍ​ວ່າ​ດ້ວຍ​ອົງການ​ ໄອ​ຍະ​ການ​ປະຊາ​ຊົນ ​ແລະ ກົດໝາຍ​ວ່າ​ດ້ວຍ​ ສານ​ປະຊາຊົນ. ພ້ອມ​ນີ້, ກໍ​ເປັນ​ການ​ຕອບ​ສະໜອງ​ ຄວາມ​ຮຽກຮ້ອງ​ຕ້ອງການ ​ຂອງ​ການ​ພັດທະນາ​​ ເສດຖະກິດ​-ສັງຄົມ ​ໃນ​ໄລຍະ​ໃໝ່ ​ແລະ ​ເພື່ອ​​ໃຫ້​ສອດຄ່ອງ​ກັບ ລະບົບ​ການ​ດຳ​ເນີນ​ຄະດີ​ອາຍາ ​ຂອງ​ພາກ​ພື້ນ​ ​ແລະ ສາກົນ, ທັງ​ຮັບປະກັນ​ການ​ຮ່ວມ​ມື ​ແລະ ຊ່ວຍ​ເຫລືອ ​ທາງ​ດ້ານ​ຍຸຕິ​ທຳ​ທາງ​ອາຍາ ​ໃຫ້ມີ​ປະສິດທິພາບ​ຍິ່ງ​ຂຶ້ນ ປະກອບສ່ວນ​ເຂົ້າ​ ໃນ​ການຕ້ານ ​ແລະ ສະກັດ​ກັ້ນ​ ອາ​ຊະ​ຍາ​ກຳ​ ໃຫ້​ນັບ​ມື້​ນັບ​ຫລຸດ​ລົງ. ກົດໝາຍ​ວ່າ​ດ້ວຍ​ ການ​ດຳ​ເນີນ​ຄະດີ​ອາຍາ ສະບັບ​ທຳ​ອິດ​ໄດ້​ຖຶກຮັບຮອງ ​ແລະ ປະກາດ​ໃຊ້ ຕາມ​ສະບັບ​ເລກທີ 30/ສປສ, ລົງ​ວັນທີ 02 ທັນ​ວາ 1998, ​ໄດ້​ຖືກປັບປຸງ​ສອງ​ຄັ້ງ​ ຄື ຄັ້ງທີ 1 ​ໃນ​ປີ 2004 ​ແລະ ຄັ້ງ​ທີ 2 ​ໃນ​ປີ 2012. ຜ່ານ​ການຈັດ​ຕັ້ງ​ປະຕິບັດ​ ກົດໝາຍ​ດັ່ງກ່າວ, ​ເຫັນ​ວ່າກົດໝາຍ​ວ່າ​ດ້ວຍ​ ການ​ດຳ​ເນີນ​ຄະດີ​ອາຍາ ​ສະບັບ​ປັດຈຸ​ບັນ ມີ​ບາງ​ບັນຫາ​ຍັງ​ບໍ່​ໄດ້​ກຳນົດ​ ລະອຽດ​ຈະ​ແຈ້ງ, ຮັດກຸມ, ຄວາມ​ເຂົ້າ​ໃຈ ​ຕໍ່​ເນື້ອ​ໃນ​ບາງ​ມາດຕາ ຍັງ​ບໍ່​ທັນ​ເປັນ​ເອກະ​ພາບ​ກັນ. ດັ່ງ​ນັ້ນ, ​ຈຶ່ງ​ມີ​ຄວາມ​ຈຳ​ເປັນ​ທີ່​ຈະ​ຕ້ອງ​ປັບປຸງ, ຕັດ​ອອກ ​ແລະ ​ເພີ່ມ​ຕື່​ມ​ເນື້ອ​ໃນ​ຈຳນວນ​ໜຶ່ງ ​ເພື່ອ​ເຮັດ​ໃຫ້​ກົດໝາຍ​ສະບັບ​ນີ້​ ມີ​ຄວາມ​ຄົບ​ຖ້ວນ​ຈະ​ແຈ້ງ, ຮັດກຸມ​ກວ່າ​​ເກົ່າ ​ແລະ ​ເຂົ້າ​ໃຈ​ງ່າຍ, ​ເປັນ​ເຄື່ອງມື​ສຳຄັນ​ ໃນ​ການ​ດຳ​ເນີນ​ຄະດີ​ອາຍາ​ ໃຫ້​ມີ​ ຄວາມ​ເປັນ​ເອກະ​ພາບ, ຖືກຕ້ອງ, ຄົບ​ຖ້ວນ, ຮອບດ້ານ ​ແລະ ພາວະ​ວິ​ໄສ.

 

ພາຍ​ຫລັງ​ທີ່​ຮ່າງ​ກົດໝາຍ​ ວ່າ​ດ້ວຍ​ການ​ດຳ​ເນີນ​ຄະດີ​ອາຍາ ສະບັບ​ປັບປຸງ​ໃໝ່ ​ໄດ້ຖືກ​ຮັບຮອງ​ ຈາກ​ສະພາ​ແຫ່ງ​ຊາດ ຈະ​ມີ​ຄວາມ​ເປັນ​ເອກະ​ພາບ ​​ໃນ​ກາດ​ຈັດ​ຕັ້ງປະຕິບັດ​ ກົດໝາຍ​ຂອງ​ເຈົ້າໜ້າ​ທີ່ ທີ່​ກ່ຽວຂ້ອງ ​ແລະ ສ້າງ​ຄວາມ​ເຊື່ອ​ໝັ້ນ ​ຕໍ່​ລະບົບ​ຍຸຕິ​ທຳ​ຂຶ້ນ​ຕື່ມ​ ລະດັບ​ໜຶ່ງ ​ເຮັດ​ໃຫ້ການ​ປົກຄອງ​ ດ້ວຍ​ກົດໝາຍ​ມີ​ຄວາມ​ສັກສິດ​ເພີ່ມ​ຂຶ້ນ, ສັງຄົມ​ມີ​ຄວາມ​ສະຫງົບ, ​ເປັນ​ລະບຽບ​ຮຽບຮ້ອຍ ​ແລະ ຍຸຕິ​ທຳ. ພ້ອມນີ້, ກົດໝາຍ​ວ່າ​ດ້ວຍ ​ການ​ດຳ​ເນີນ​ຄະດີ​ອາຍາ ​ເປັນ​ກົດໝາຍ​ພື້ນຖານ ທີ່​ຈະ​ເປັນ​ນິຕິ​ກຳ​ອັນສຳຄັນ​​ ໃຫ້​ແກ່​ອົງການ​ລັດ ທີ່​ມີ​ສິດ​ອຳນາດ ​ໃນ​ການ​ດຳ​ເນີນ​ຄະດີ​ອາຍາ, ຜູ້​ດຳ​ເນີນ​ຄະດີ​ອາຍາ ​ແລະ ບັນດາ​ຜູ້​ເຂົ້າ​ຮ່ວມ​ໃນ​ການ​ ດຳ​ເນີນ​ຄະດີ​ອາຍາ ​ເພື່ອ​ຮັບປະກັນ​ສິດ ​ແລະ ພັນທະ​ພື້ນຖານ ​ຂອງ​ພົນລະ​ເມືອງ ມີ​ຄວາມ​ສະ​ເໝີ​ພາບ​ຕໍ່ໜ້າ​ກົດໝາຍ.

 

 

ຂໍ້ມູນຈາກ: ສຳນັກຂ່າວສານປະເທດລາວ

 

ຄວາມຄິດເຫັນຂອງຜູ້ອ່ານ (0)